鐵人媽媽1湊3: 11月 2013

2013年11月27日星期三

主婦手, 你幾時先肯走?

主婦手呀主婦手, 自從Koey出世後o個個冬天你出現後, 你就一直唔肯離開我...

仲記得o個個冬天只係我成為全職主婦o既第一個冬天, 因為要照顧Koey又要煮飯, 雙手不斷濕水, 再加上極度乾燥o既天氣, 你就慢慢出現o係我手指公上面...

開頭你都唔算惡, 但慢慢你就開始原形畢露, 侵佔我手指公都唔夠, 仲要去我食指霸地盤!!

還好, 你未算毒, 無令我痕癢難擋, 最多只係令我表皮不斷脫落, 最後指頭爆裂流血收場o者...

甩皮甩到好似路線圖咁...十指痛歸心呀陰公!!!

點對付你好呢?

搽cream?

唔係唔得, 但轉個頭又煮o野/換片/抱B, 基本上雙手真係要不斷掂水, 搽完轉頭又濕水, 咁搽o黎有咩用, 反而浪費晒...

用方間治主婦手方法?
曾上網查一D天然o既治主婦手方法, 有浸白醋或綠茶, 綠茶完全無效, 同用水浸無分別!! 至於白醋, 效果較好, 但如果手指頭有傷口, 就痛到媽媽聲...日日浸又會令手指長期有陣酸味...

戴膠手套洗碗?

以為手指唔使掂咁多水嗎? um... 可能, 但事際上又唔完全係!!! 因為洗洗o下碗可能又要搞BB, 成日又除又戴, 結果手套入面都會濕濕o地, 最後就係焗住D水再加埋手套邊刮住刮住手臂位, 搞到手臂位都益埋你囉!!!

o係手臂位o既你就毒喇, 又紅又痕!!! 雖然我無戴手套之後就漸漸好番, 但原來你只係搬o左去手指尾住...

(咁核突o既相, 都係細張D好...)

由於惡毒o既你搞到我手指尾又痕又紅, 結果我忍唔住R到損晒紅晒, 迫於無奈, 當時大住肚o既我只好搽有輕微類固醇o既藥膏(孕婦適用)先可以控制住你!!!

紅色o個支就係醫生俾, 含少量類固醇o既藥膏!!

其餘就係我有主婦手後試用過o既hand care用品!!! 不過無一隻完全有效, 因為一停用就番發, 同埋對手指公d菌有用唔等於對手指尾有效, 或相反...!!!!唉!!!

生o左Kobe後, 由於坐月期間我唔使掂水, 加上勤力搽cream, 惡毒o既你都弱o左好多, 但陪月一走, 你又強大起o黎, 直到最近都仲係時好時壞, 真係令我好頭痛!!!

主婦手呀主婦手, 你究竟幾時先捨得走呀??唔通要等到我'退休', 老o左洗唔到碗煮唔到飯先肯離開我?

2013年11月25日星期一

Koey講故事

講完一大輪後, 睡魔急Call... (呢日Koey無午睡!)

2013年11月20日星期三

Koey 2歲半喇!!!

Koey: 我2歲半喇!!!!

呢日我帶o左Koey同Kobe去傢俬舖玩!!

愛美係女仔o既天性!!

永遠不同步o既笑容!!

Koey 揀o左Jelly杯當生日蛋榚!!

細佬都好想食咁喎!!!

驚喜o既四口合照!! 因為爸爸本來唔得閒, 但後尾又趕得切番o黎同Koey影相!!!

好味!!

眨o下眼又半年....

同4個月前相比, 又大個女o左喇!!!

呢半年Koey大個o左好多, 適應o左細佬o既存在, 少o左為小事而大喊, 越大越懂事!!

食: 仲記得陪月未走前仲係食緊粥仔, 而家就完全食大人o野, 唔使分開煮!! 大部份時間都自己'畢', 不過食得超級慢, 好多時反而係大人怕佢食到凍晒而餵佢, 亦有時係佢見爸媽食晒離座洗碗做o野得番佢一個, 想人陪佢而叫我o地餵!! 每次食飯都要1.5hr, 真係食到凍冰冰, 又浪費時間...其實就算餵佢都係趙得好慢, 一係就掛住講o野, 真係好難improve...!!

訓: 半年前半夜訓覺一晚醒幾次o既情況持續個半月後終於完結, 而家Koey唔使人tum訓覺, 講完故事唱埋歌同佢講goodnight就自己訓, 讚!!!

自理: 半年前只係識拉拉鏈,扣啪扭同著/除鞋, 而家已經學識扣扣扭, 著褲著襪, 試過幫佢笠件衫落頭後就自己著晒成套衫出街, 真係方便o左我唔少!! 半年前開始戒片, 而家9成9成功, 連之前間中漏少少VV落褲先至出聲叫VV o既情況近排都無再出現, good!! 半夜條片一向係乾, 但早一個月無同佢著片佢朝早仲會lai到成床濕, 呢個月同佢著番片訓又無再lai, 我諗而家已經連續兩星期朝早係乾片, 不過咁凍, 猛一唔著片又lai濕晒都幾麻煩, 要再觀察多一段時間先正式同片片say bye!!!

說話能力: 超好, 同大人無分別!! 會講反話, 又識舉例, 間直係舉一反三, 仲會學足我語氣話爸爸無手尾, 試過話爸爸: "你有無見過媽咪將XX放o係呢度!!!" 第一次聽到時真係俾佢笑死!!

記性: 近日又約番陪月EE見面, 帶Koey出去時佢無啦啦同我講: "呢, 你記唔記得呢, 細佬個肚臍有o野夾住o架!!" 聽到o個下真係打個突, 因為臍帶呢樣o野, 真係細佬甩o左之後7個月以o黎都無人提起過, 估唔到佢咁耐之前o既o野都記得, 仲會表達番出o黎, 真係好驚喜, 唔可以睇少小朋友o既記憶力!!

體能: 差!! 仲未學識跳, 跑都係扭扭下咁, 不過點都比半年前有進步!

社交能力: 有待改善!! 不過比起半年前一有同齡小朋友埋佢身就喊有進步, 至少而家唔會喊, 最多避開, 間中都見到佢'話'其他小朋友阻住佢玩...!! 對大人方面, 有禮貌o左, 雖然大部份時間都要人提, 但對住日日見o既人, 好似管理員, 就開始主動同大聲叫人, 有時甚至會話俾管理員叔叔知佢去o左邊度玩!

希望半年後o既Koey繼續進步, 努力!!!!

2013年11月11日星期一

一拖二唔容易

一拖二, 真係唔容易!!!

仲記得第一次一拖二出街, 只敢o係屋企附近散步, 仲要覺得自己好大陣仗, 忍唔住叫路人甲幫我影番張一拖二相留念...

睇番相, Kobe仲係2個月人仔, 好細粒, 所以仲可以揹住!! Koey就仲坐緊車仔!!!

後來天氣太熱, 加上呢個夏天多雨, 我都無乜再出動, 直到初秋雨量開始減少, 天氣又無咁熱, 我o既一拖二大行動先再次展開!!!

但係...Kobe又大件o左喇喎, 揹住佢太耐已經無可能, 咁佢坐車仔o既話, Koey咪要行囉?!

um...

Koey會唔會行行o下扭坐車, 叫我抱細佬?

Koey會唔會行得耐太攰扭我抱?

Koey會唔會唔肯拖住我/車仔亂咁走?

好彩, 呢一切擔心, 都係多餘o既!! Koey比想像中生性, 由第一次一拖二出巡開始, 佢真係一次都無扭過我抱, 每一次都好乖拖實我行, 一句喊'攰'都無!!!

睇o下我o地去o左幾多地方!!

中央公園

博物館

Snoopyland

圖書館

唔止咁o架, 我同Koey都越o黎越熟習一拖二出街, 所以仲越去越遠添!!!!!

Go!!

坐港鐵入元朗~

去大埔~

逛尖嘴~

雖然暫時都仲未夠擔挑戰過海...但可以陪兩位寶貝去咁多地方, 我已經好滿足o架喇!!!

講真, 一拖二辛苦嗎? 當然辛苦!!!

Kobe、車仔再加勾住o既BB用品, 大大話話最少30磅, 要推之餘仲要應付轉彎、上落斜、梯級同埋上落火車中間o個條空隙...重點係, 全部要單手搞掂!!

另一隻手呢? 當然係拖住Koey!! 雖然Koey的確好乖, 拖我拖得實到我fing都唔甩, 但路面高低不平, 2歲半人仔隨時kick親跌低在所難免, 所以我亦要隨時ready枰起Koey, 防止佢跌倒!!

另外仲有出入要推門、塔lift、上落只有電梯無lift/只有梯級無斜路、上落巴士/的士等, 呢d難題機乎每次出街都會遇到, 好彩遇到好心人時, 我真係每次都從心感激, 但好人真係唔係到處有, 無人幫o既話我就要發揮無窮小宇宙, 單手推門/按lift門, 單手推車, 再用口控制Koey行動, 又或者變身'力神', 抱住車仔上落梯級, Koey就襯機鍛練一下平衡力, 自己上上落落!!

危險嗎? 其實都有D o架 !! Touch wood暫時未有咩意外, 最多都係Koey kick親跌損下膝頭咁o者!!! 但萬一我搬車時Koey落樓梯kick倒, 又或者俾lift門夾親, 仲有我一手拉車一手拖Koey塔電梯是但甩一邊手....所以, 唔係奉旨等人幫, 但如果大家遇著我呢D一拖二行動o既(...um...其實我出10次街都未必撞到有人同我一樣一拖二...) 都可以幫一幫o既話, 我諗意外發生o既機會真係低好多o架!!!