一拖二 唔容易

一拖二, 真係唔容易!!!

仲記得第一次一拖二出街, 只敢o係屋企附近散步, 仲要覺得自己好大陣仗, 忍唔住叫路人甲幫我影番張一拖二相留念...

睇番相, Kobe仲係2個月人仔, 好細粒, 所以仲可以揹住!! Koey就仲坐緊車仔!!!

後來天氣太熱, 加上呢個夏天多雨, 我都無乜再出動, 直到初秋雨量開始減少, 天氣又無咁熱, 我o既一拖二大行動先再次展開!!! 

但係...Kobe又大件o左喇喎, 揹住佢太耐已經無可能, 咁佢坐車仔o既話, Koey咪要行囉?!

um...

Koey會唔會行行o下扭坐車, 叫我抱細佬?

Koey會唔會行得耐太攰扭我抱?

Koey會唔會唔肯拖住我/車仔亂咁走?

好彩, 呢一切擔心, 都係多餘o既!! Koey比想像中生性, 由第一次一拖二出巡開始, 佢真係一次都無扭過我抱, 每一次都好乖拖實我行, 一句喊'攰'都無!!!

睇o下我o地去o左幾多地方!!

中央公園

博物館

Snoopyland

圖書館

唔止咁o架, 我同Koey都越o黎越熟習一拖二出街, 所以仲越去越遠添!!!!!

Go!!

坐港鐵入元朗~

去大埔~

逛尖嘴~

雖然暫時都仲未夠擔挑戰過海...但可以陪兩位寶貝去咁多地方, 我已經好滿足o架喇!!!

講真, 一拖二辛苦嗎? 當然辛苦!!!

Kobe、車仔再加勾住o既BB用品, 大大話話最少30磅, 要推之餘仲要應付轉彎、 上落斜、梯級同埋上落火車中間o個條空隙...重點係, 全部要單手搞掂!!

另一隻手呢? 當然係拖住Koey!! 雖然Koey的確好乖, 拖我拖得實到我fing都唔甩, 但路面高低不平, 2歲半人仔隨時kick親跌低在所難免, 所以我亦要隨時ready枰起Koey, 防止佢跌倒!!

另外仲有出入要推門、塔lift、上落只有電梯無lift/只有梯級無斜路、上落巴士/的士等, 呢d難題機乎每次出街都會遇到, 好彩遇到好心人時, 我真係每次都從心感激, 但好人真係唔係到處有, 無人幫o既話我就要發揮無窮小宇宙, 單手推門/按lift門, 單手推車, 再用口控制Koey行動, 又或者變身'力神', 抱住車仔上落梯級, Koey就襯機鍛練一下平衡力, 自己上上落落!!

危險嗎? 其實都有D o架 !! Touch wood暫時未有咩意外, 最多都係Koey kick親跌損下膝頭咁o者!!! 但萬一我搬車時Koey落樓梯kick倒, 又或者俾lift門夾親, 仲有我一手拉車一手拖Koey塔電梯是但甩一邊手....所以, 唔係奉旨等人幫, 但如果大家遇著我呢D一拖二行動o既(...um...其實我出10次街都未必撞到有人同我一樣一拖二...) 都可以幫一幫o既話, 我諗意外發生o既機會真係低好多o架!!!

我, Koey同Kobe都好多謝每個幫過我o地o既好心人!! 多謝!!

數完未? 未, 我都仲未講一拖二出巡o既事前準備同番到屋企o既善後工作...仲有o係街食飯兩個都要餵又或者是但一個唔耐煩唔肯食想走... (睇o黎要開多篇blog再詳談...HAHAHA!!!)

近來, Kobe仔越o黎越唔鍾意坐定定'等'我o地食飯, 又多一個挑戰喇!!! 

不過呢, 都係o個句, 睇見理應出外跑跑跳跳o既小朋友可以出街呼吸一下新鮮空氣, 真係辛苦d都無計!! 唯有同自己講句:

加油呀, 媽咪!! :p