鐵人媽媽1湊3: 東京大阪親子遊2015 - 20150615 Day3 (上): Tokyo Dome City ASOBONO

叉完一晚電, 呢日9點幾就出發喇!!!

我o地行去酒店附近o既大手町站, 因為睇地圖好近酒店, 諗住近d就可以快d 去到今日o既目的地~ 位於水道橋站, 東京巨蛋Tokyo Dome City入面o既ASOBONO大型兒童室內Playhouse!!

點知...原來大手町站o既地底範圍好大, 分好多條線, 而我o地要坐o既都營三田線係要行到最最最遠先去到, 再加上上上落落o既梯級, 真係未出發我老公子已經抬BB車+細佬抬到手都軟, 我估我o地至少行o左20分鐘先到達都營三田線, 諗番轉頭, 早知去番東京駅坐JR中央線去水道橋站可能仲快呢...

好喇!! ASOBONO 10點鐘開, 我o地10點05分到, 點知....

人多到龍尾差唔多o係場外繞o左一圈!! 龍尾有職員拎住牌, 寫住要等80-90分鐘先入到場!!!

唉, 真係又失預算, 真係估唔到星期一朝早都會多人成咁!!!

老公子同細佬排隊, 我就帶Koey行一圈望下環境!!! 我見到大部份排隊o既都係日本當地人, 全部都係打扮時尚o既年輕媽媽, 佢o地多數都係約埋幾個媽媽朋友一齊o黎玩, 或1拖1或1拖2 , 小朋友主要都係3-4歲或以下o既學前兒童, 1拖2 o既細B大多數都未滿周歲, BB車當然不少, 但更多係用揹帶揹住!!

老實講, 呢個場面令我覺得有d異地文化衝擊!!

係喎~, 日本人無'工人姐姐'喎!!

係喎~, 無'工人姐姐', 所以年輕媽媽們就無選擇要做'全職媽媽'了!!

係喎~, 做'全職媽媽'一湊二, 但佢o地都可以搵到時間Keep住打扮得靚靚出街 (特別係頭髮, 個個都set得好靚, 一定花o左唔少功夫!), 我呢個懶打扮o既媽媽真係要檢討下呢!

係喎~, 佢o地多數3年抱2, 唔似HK咁多獨生小朋友, 就算生兩個都可能隔好多年!

係喎~, 佢o地咁多1拖2, 咁佢o地一個女人仔又點應付東京鐵路上上落落o既梯級o既呢?

係喎~, 做全職媽媽都可以約三唔知己一齊帶住小朋友出街玩, 咁咪唔會悶親囉!!

...如果...如果我都可以好似佢o地咁, 有多d朋友做全職媽媽, 又同我住得近, 咁就好喇!!

好喇好喇, 回歸正題, 由於得個等字, 我就同Koey周圍行下~~

呢張相睇唔出張畫有乜特別哩??

去片!

個效果都幾得意o架!!

好喇, 等o左真係大約80分鐘, 我o地終於入到場喇!!!

小朋友好開心呀, 終於有得玩喇!!!

其實唔好話小朋友, 大朋友見到呢個室內playhouse咁大, 都好想做番小朋友, 自己玩埋一份!!

呢個藍色'海洋'波波池真係幾正, d波多到真係好似游水咁!!

搖搖椅~

不同類烈o既攀爬~~ 總之每樣玩意玩一次都可以有排玩呢!!

波波池側邊有個大型彈床!!

開心到跳起!!!

好鍾意呢張, 影得好有動感!

好玩到爸爸都忍唔住跳埋一份呢!!

之後我o地去o左另一邊, 呢度成地車仔同路軌, o岩晒男孩子!!

條片好悶呢?? 無法子, 因為小朋友玩得太專心喇, 叫極影相拍片都唔會有反應, HAHAHA!!!

小朋友點都唔抬頭...

咁我同老公子就唯有玩下自拍啦!!

老公子後尾都有幫手起路軌, 不過Koey起o既高架橋太易斷, 最終都唔係太行到車!!

砌路軌玩Thomas實在太令人著迷, 我同老公子三催四請, Koey & Kobe都唔係太願意郁, 終於我講o左'N'次我o地只係玩o左個playhouse o既一半地方, 仲有好多地方未玩未睇, Koey先肯放低路軌, 跟我去場地另一邊繼續玩!!!

呢邊有好多超巿食物煮食玩意, 種類多到玩唔晒!!

兩位小朋友由鐵路維修員一變就變o左小廚師, 一樣玩得投入!!

由於Koey & Kobe又試玩得好投入, 所以佢o地玩緊時, 我就再周圍行o下未去o既地方喇!!

好多Hello Kitty 超巿收銀機俾小朋友扮買o野!

呢間房有好多台襟掣o既小玩意!!

呢度係Library, 全場最少人o既地方!!

呢邊仲有d木馬仔同足球機等兒童玩意!

煮完飯去做收銀!!

同埋繼續煮飯俾爸爸媽咪食!

超巿車仔都有!!! 睇o下Koey & Kobe買o左幾多o野!

對於小朋友o黎講呢度實在太好玩, 唔走就只會沒完沒了, 所以最後我o地玩o左個半鐘頭(全家4540yen)就走喇, 再唔走, 又到食o野o個邊排隊o架喇!!!!!

ASOBONO 對面就係food court, 好方便, 我o地12點半入去時其實都好多人喇, 等o左10-15min先有位!

Food Court都幾大, 位置都幾多!

食物方面都唔錯o架!!!

溝通問題, 我本來的確係話試炒麵, 但老公子話呢間無人排隊買, 於是我就答應再叫多個烏冬, 點知老公子聽唔到, 照叫炒麵....的確唔係太好味! :p

好喇, 食飽休息夠繼續玩喇!!!

先行行Food court 側邊o既店舖, 原來都係賣動漫人物o既舖頭!!!

爸爸好入戲喎!!

有IQ博士同龍珠!!! 其實仲有火影忍者同其他, 但我唔多熟悉喇!

到戶外喇!! 呢度係個室外遊樂場, 有摩天輪, 海盜船...

迷你洗衣機, 迷你跳樓機...

旋轉木馬..

仲有駕車仔!!

噢, 呢個小朋友咩事咁淒涼呀??

原來...

家姐有得玩駕車仔, 細佬未夠3歲無得玩!!!

喊得幾慘!!! 明明車車先係細佬最愛, 但竟然有得睇無得玩!!!

呢轉車仔400yen x 2玩得2min左右...其實都幾貴!!!

另一樣Koey & kobe想玩 o既, 就係Merry go round喇!!

唔使排隊就有得玩喇!! 好似都係400yen一個人!!

呵呵, 今次我o地就醒目喇, 話Kobe 3歲 (無錯, 木馬都限3歲以上先玩得!!), 終於唔使睇住家姐一個玩, 自己都可以坐喇!!! Kobe仔開心晒!!

不過呢...大家留意到嗎??? 原來爸爸揀o左隻唔識上下升降o既馬仔俾Kobe坐呀...真係失敗...好彩細佬無發現, 仲樂在其中, 如果唔係睇怕要坐多一round先心息喇!!

好喇, 下午又熱又曬, 玩完呢兩樣都差唔多3點喇, 其實呢度仲有好多地方可以行可以玩, 但為o左下午行程, 都係不得不走喇!!