石門森林公園婚照拍攝之旅 ~ 拍攝篇

車程大約兩個半至三個鐘,我同Wendy傾o左無一個鐘都有大半個鐘計,好開心呀,如果唔係咁長車程我又訓唔著都真係幾難過o架!!

大約十一點半,終於到步喇,我o地先去一家做農家菜o既地方化妝同用膳,聽麥田o既工作人員講,呢道做o既農家菜好好味,而且佢o地成日o黎己經熟晒,所以可係o黎到借地方化妝,唔使好似其他人咁,化完妝先坐幾個鐘車o黎呢!

大家睇o下呢度程o既瓜幾大!!

化完妝開餐,我當時未換衫,真係唔敢食太多,但我想講呢餐飯真係好美味,其中有碟好似腊肉o既一坐埋位己經聞到好香,食落仲超好味,另外有碟南瓜煮肉片,d南瓜好甜o架,但d工作人員好快夾晒,我食得一舊,哈哈!另外仲有雞,豆腐同菜,每pair人俾一百一十蚊,應該係包埋工作人員o既飯錢吧?真係又抵又好味,可惜無影底!

換好衫再坐幾分鐘車,正式開始拍攝!!先拍湖境,再拍梅花,最後拍紅葉!!影影影,最後一站影紅葉時日落,係高山上面真係倍感寒風刺骨,工作人員著住大褸都話凍,更何況胆胸露臂o既我!!仲記得最後幾張相,我真係凍到忍唔住震!!

最後等Wendy影埋佢帶去o既煙花後,大家六點幾回程,當時個天都黑晒喇,真係寒風刺骨呢!!!

番到Honey宿舍都十點幾,沖埋涼,用九牛二虎之力落妝同洗d硬頭髮,成十一點半睇住晚間新聞o黎食Honey煮o既福麵做晚餐,真係好支力呢!!

等我好似影第一輯相咁,對今次呢輯相做個小結先!!!

天氣:
雖然天氣真係好凍好凍,但天公造美,先前我最擔心o既煙霞一d都無,俾我o地影到上次輯相無o既藍天,真係好開心呀!!

拍攝景點:

今次拍攝得三個景點(湖,梅花同紅葉),雖然每個景點都會去幾個位置取景,但感覺唔係好夠多元化!!聽Wendy講佢o地去o左小溪影,我o地影完湖轉鏡去影梅花時我仲見到Wendy坐係湖邊門欄o既地上面影相,個構圖好靚呀,可惜我都無影,所以扣點分!!不過,梅花林同紅葉都真係好靚,只係盛開o既梅花已經令我猛叫'好靚',掂!!

 

湖景: 成日見到d人影石門個湖好似有點九寨溝feel,所以都有d期望,但原來唔係想像中咁靚,不過藍天映照下,都唔算好差o既,合格!!!

 

梅花林: 影完湖景移師去影梅花!!一去到就見到一大遍白雪雪o既梅花樹,真係好靚呀,原來梅花係好細朵o架,我仲以為好似過年d桃花咁大o既添!!!下面d相係我自己相機影o架,無用photoshop執過,無花無假,d花真係盛開o架,地上面都仲未見到落花,聽工作人員講過多個幾星期d花就開始謝,能夠影到盛開o既梅花,真係好呢!!

原來呢個梅花林有名堂,叫石門香雪!!

有d似去o左日本睇櫻花咁呢!!

路o既兩邊滿佈點點白梅,好靚呀!!

睇清楚d(唔係睇我!),d梅花細細粒,好可愛呢!!

Honey影o既,忽然好有影相sense咁,哈哈!

紅葉: 離開梅花林,我o地去影紅葉!!當時大約四五點,太陽斜照下,紅葉份外紅!!雖然同湖景一樣,紅葉並似睇相咁遍地紅色咁誇張,但都真係幾靚,成個地方都充滿秋意(不過氣溫係'冬'意...哈哈!!!)

其實並唔係每棵樹都咁橙咁紅o架,好似相中下方咁,仲見到綠色o架!!

呢張相都無執過o架!!又真係幾紅呢!!

化妝+髮型:
一直都好擔心大陸o既化妝,由於去到室外先化,我一路都無睇清自己影相個樣,一直到番到宿舍落妝先細望,當時覺得個妝唔多靚o架,可能係同我好少化妝有關啦,所以睇唔慣!!!不過睇番d相,影出o黎又好似幾自然,唔覺'娘',唔錯,化妝師彤彤應記一功!!

 

其實一朝見到彤彤覺得佢好cool o架,當時有d驚,仲有少少羡慕Wendy有個比較nice o既化妝師,不過熱身過後彤彤原來都幾nice o架,除o左個妝化得唔錯外,佢set頭亦好好靚,honey於拍攝途中都讚過幾次(雖然我睇唔到自己咩樣!),而且佢配襯飾物亦以簡約為主,唔會搞到我一抽二lung,清清o地我鍾意!!

 

要扣少少分當然係因為佢無check清楚我一早選好o既服裝啦,雖然可能真係麥田裝修唔見o左,但佢都走唔甩要負點責任吧?!另外,我第一個造型其實我係想set大S o個類大曲髮o架,但佢幫我夾完我覺得唔係我想要囉,都要扣點分!!

上次第一輯相我化完妝磈面好黑,今次正常番,同一般人一樣,變o左白面人,哈哈!!(圖中o既我預備去食農家菜,所以未塗口紅!)

呢個就係彤彤,我o地無同佢影合照呀,番宿舍睇番佢幫我影d花絮先知佢自拍o左一張,外表酷酷o既佢原來都幾鬼馬!!

我幾鍾意彤彤幫我戴呢條頸鏈,同條裙好match,呢個就係honey猛讚個髮型!!

婚紗晚裝: 1/2
由join麥田o個刻已經知道佢o地d衫唔係太多o岩我口味,試衫時難得揀到我喜歡o既晚裝同婚紗本應值得高興o既,點知臨出發先知搵唔到我揀o個件晚裝,而另一件麥田新置o既婚紗(我揀衫時件衫出o左街,無得試!)一著就出事,映得我無腰(雖然本身都真係無乜!)之餘仲好肥...所以呢一項真係要俾低分!!!

至於honey,雖然佢一直百般不願著白色禮服,但今次都係著o左,其實影相都唔錯o既,叫做試過下囉,但我同honey都一致認為都係黑色好睇,所以BD o個日一定唔會再著白色!!

造型1: 呢條裙係我o係麥田相簿入面唯一睇得上眼o既,影出o黎都幾OK,但我媽就話唔好睇!!!

學freeze咁夾胸(其實係咁o岩o者...),件衫都幾sexy o架!!

側面!我鍾意呢條裙就係因為佢算o係麥田咁多衫入面比較簡約!!

造型2: 呢條裙係新衫,其實望落幾靚,所以我先無試都照揀,但相信我試o左都未必發現到原來件衫好有問題,唔知係件衫質料硬定胸口排閃石太重,化妝師幫我夾緊o左件衫後件衫都仲係好墜,成日下跌,我要不斷抽件衫,而且胸位仲成日接起(我都係睇番相先知),搞到我好似個胸大到墜晒落o黎咁,又唔修腰...bad!!!!

變o左無腰人...唉...唔知執相執唔執到...我唔想變水筒!!

 

抽抽抽,胸位成日接起!!

造型3: 唉,之前成日提住條靚靚晚裝裙俾唔到大家睇喇,唯有臨出發揀條同色,不過我其實麻麻地鍾意咋,估唔到影出o黎一樣,太老成喇,唔掂!!

信我,雖然我原本揀o個條都係黑色,但o個條一定young好多!!

呢件就係我原先揀o個件喇,係咪都幾靚呢...最緊要係我試衫時覺得自己著得幾好睇...唉...

攝影:
攝影師阿倫爬樹訓地好努力咁影,佢o既指示亦好清楚,不過pose離唔開ABCDE,影到尾聲我同honey都識背有每個位置要擺邊幾個pose,哈哈!!相片方面亦唔算有太大驚喜,不過不失!!!

高難度動作,小朋友切密模仿!

阿倫其實係小帥哥,好可惜唯一見到佢樣o既相既然out focus o左...可惜可惜!!

自己:
今次狀態無上次咁fit喇,肥上次五六磅都有,睇相都好明顯比上次肥同大隻呢!!!睇怕我BD前真係要努力減肥先得!!!

Honey:  
Honey同我一樣,比上次肥o左,而且可能今次唔係第一次影,我感覺到佢唔多投入,不過佢好乖,有幫我影花絮相!!

其他:
其他都無咩特別喇,係來回交通時間長o左d囉,其實無塞車o架喇,同埋所有都係高速公路,不過路程真係好遠,來回加埋6個鐘車都真係幾辛苦!!!!

道具方面,我自己帶o左花去影,本來d花隻色比較殘舊,但影相出o黎又唔覺,而且第二日係深圳拎住佢招搖過巿時仲吸引到路人問我d花係邊度買添,好surprise,乜真係好靚咩?!

其實d花係絲花o黎,我o係淘寶網上見到隻色唔係咁殘o架,買o左番o黎有d唔開心,但花o既質素真係幾好,幾可亂真,工作人員近望都唔係好分到d花係真定假,勁!!

最後,當然係好開心識到Wendy同阿言,估唔到我同Wendy都幾o岩咀形,識到你好開心呀!!

Wendy同阿言,其實我覺得阿言有d似長面版宋承憲!!工作人員見到我honey同阿言時話覺得佢o地好似兩兄弟喎,因為兩個都好高,面形又似,連髮型都一樣呢!!哈!!

總括o黎講,其實今次同第一輯影o既o野唔同,本來唔應該比較,但無論服裝造型定我同honey o既狀態都好明顯係上次好d,而且更重要係今次唔係第一次影婚照,所以心情真係無上次咁興奮,我諗呢點亦係令我覺得今次無咁滿意o既原因之一吧!!!(所以我奉勸各位千萬唔好用coupon去試影做練習,因為第一次影相印像真係深刻d,感覺亦興奮d,大家無謂去'練習'浪費一次美好回憶嘛,仲有,第一次用coupon影一定會被tong到一頸血!)

最後俾大家睇埋我部相機影o既花絮相!!

睇我幾無儀態,哈哈,呢d應該叫裙拉褲甩!!

唔知點解個表情咁o既...當時我腳下一片泥濘o黎o架,好彩係著住波鞋!!

肥美人!

扮cool!!

我要強調我d魚尾紋絕對無咁勁,係d乾粉同天氣太乾搞到個妝裂成咁!!

哈哈,honey好似好痛苦咁!!

我覺得我好似一名艷婦...

最後幾張相,honey要背起我,好似好困難咁,梗係啦,我咁肥美...!!!另外,大家睇,好彩我著o左Leggings咋,所以全程都唔太凍,仲可以成日拉高條裙周圍走唔怕走光!!