16項有關feon的事

係facebook被tag,但唔識係facebook寫notes...寫住係度先...

16項有關feon的事

1. 唔認路唔認舖名唔認大廈名唔認街名並曾經發生中環蕩失路成個鐘搞到喊o既事件!!所以每當我好想介紹人知某食肆好味,尋日去o左咩地方,往往只能講出'有條大馬路,有座圓形窗o既高樓大廈左面'等等...聽o既會一舊雲!!

2. 外表女性化,內裡其實幾Man!!細個既玩barbie亦陪我細佬玩孖寶賽車街頭霸王快打旋風(超任時代o既game我算幾熟!)!由細到大精於數理不會文化,細個已經唔睇星座運程心理測驗,更加討厭愛情小說,唯一睇過o既課外書只有金庸武俠小說!運動頗有天份(如果只跟女性比較!)而且力氣頗大,嬴過兩屆中學陸運會鉛球銀牌!!大個從事男性主導o既IT業,o係男人堆中工作沒有問題...嘩,越數越覺得自己似男人!

3. 表面上好慳,實際上未必!正如我曾經睇過報紙報導,女性看似天生購物狂,但其實女性花o既錢都係o係d物價相對唔太大o既物件,好似衫同化妝品上,至於男性,看似很少購物,但買親o既唔係貴價相機就係靚車靚HI-FI!!所以,內裡男性化o既我其實唔捨得買化妝品但極捨得買貴價傢俬電器!!

4. 約我出街如非必要唔可以即日通知!我個人好有plan,聽日o既行程,我最遲早一日要計劃,要做心理準備,唔鍾意即興!就算我夜晚唔係有節目,但我無心理準備(我都唔係好知自己要準備d咩),依然會覺得你打亂我番屋企食飯o既計劃!

5. 懶到出汁!!愛好運動但唔去做;沖完涼就唔想落街,覺得又要換衫好麻煩;貪靚但唔會去化妝,因為覺得落妝好麻煩;甚至洗面只用清水,沖完涼唔會搽lotion,因為覺得洗好耐搽好耐,好麻煩!

6. 成日覺得我就算唔番工,我都可以搵好多節目自娛!

7. 鍾意整齊,書台唔執堆滿o野後,我會覺得自己連個人都好亂,亂到諗唔到o野,繼而好忟憎!!

8. 表達能力極差!文字上表達沒有問題,因為我會revise又revise,但講o野就唔掂,成日辭不達意,好多時講唔到想講o既terms!

9. 放o係我面前o既食物,除非我真係飽到反胃又或者唔鍾意食,如果唔係我會因為覺得浪癈而食晒!所以,如果你o地想幫我keep fit,記住唔好係我面前食剩o野,如果唔係我又會食晒!

10.一唔夠訓就面色差,成日俾人問我係咪病,但其實我唔係...

11.好難有覺好訓!有光訓唔著,天光就醒(有眼罩後呢個現像少出現o左好多喇!)!好微細o既聲音都可以令我訓唔著,特別係有規律o既聲音,好似有秒針o既鬧鐘,巴士乘客o既透氣聲!下午兩點後盡量避免飲茶或咖啡,因為我會因此夜晚訓唔著!太支力又會訓唔著,玩天光又會訓唔著,玩得太興奮一樣訓唔著,個腦太多o野諗又訓唔著,擔心自己訓唔著而訓唔著...總之,最易訓著可能係要番工,平平無奇o既日子!!

12. 我好少憎人,但我真係好討厭o係巴士上釣魚o既人,討厭到想打佢o地!!訓覺咪訓覺囉,點解要挨過o黎,被我撞開之後仲可以照訓同照樣再捬,真係好乞人憎!!我試過有個女仔釣魚鈞到大半個上身'吊'係我坐o既位前面,仲要好大力咁'chok',o個下我真係好想打人!!

13. 年紀大o左,好脾氣o既我近年好似變得憤世嫉俗o左...我發現我多o左o野睇唔順眼,變得無咁friendly...

14. 好討厭一d'潮語',好似'kai','囧',越聽越'un'耳(我老喇,開始接受唔到新事物!)!!最最最唔明係我近年先發現原來好多人講'如估(如果)','龔樣(咁樣)','甚至無(甚至乎)',我唔知係咪我聽力有問題定點,總之我係近年先發現d人咁講o野,我硬係覺得又唔係痴脷筋,做乜好好地一個'如果'會變'如估'...

15. 自問記性唔算差,但我記人名好似麻麻,硬係唔明點解好似好多人記得我名(唔知係咪我個英文名同個姓比較特別),但我硬係介紹幾次都未必記得人個名,特別係未同過我講o野o既人!

16. 我好鍾意主動同我最愛惜o既人分享我o既日常生活!好似我媽咁,由細到大佢其實無查問過我交咩朋友,因為我會主動同佢講A朋友點點點,B朋友點點點,所以我o既朋友就算未見過我媽,但我媽一早就識得你,哈!!如果你俾我迫過聽我近況,你應該都係我好朋友!!

P.S. 仲有樣o野想大家知,就係我雖然有facebook account,但我只會睇,未試過寫,list上面百幾人得一個係我add...!今次亦係第一次寫notes,都係問人先知點寫notes...真落後...