石門森林公園婚照拍攝之旅 ~ 出發篇

尋晚終於番到自己屋企...好彩仲有一晚俾我訓番覺好o既o者,因為呢兩日係深圳實在訓得好差呀!

日期: 2009年1月9日

時間: 0600 (起床)
           0700 (到達麥田映像)
           0845 (啟程出發)
           1300 - 1800 (拍攝)
           2015 (番到Honey宿舍)

人物: 我同Honey (主角,哈哈!!)
           阿倫 (攝影師) & 助手 (唔知叫咩名!)
           彤彤 (化妝師)
           仲有司機、另一Pair香港人Wendy同阿言同埋佢o地team人

地點: 石門森林公園 (湖景 => 梅林 => 紅葉)

任務: 拍攝第二輯婚照 (上次香港外景以香港建築物為景,今次以大自然為景!)

話說1月8號我上o左深圳過夜,9號晨早6點起身,7點到達麥田,我成日以為一去到麥田就出發,所以當的士司機去錯地方(去o左麥田相反方向)時真係好擔心,好彩最後我o地都趕及到達,鬆一口氣!

上到麥田大吃一驚,原來麥田正在裝修,吉舖內得番影室內o既佈置同埋收錢櫃位,俾錢找尾數時見到另一pair人o既男方,好高大,國語好流利標準,我同honey當時都以為另一對係內地人呢!!

俾完錢落一層揀男裝,聽到另一pair人用廣東話對答先知原來另一pair都係香港人,就o係兩位超高o既男士正在煩惱大碼袖短,加大碼膊太闊o既時候,我同Wendy(即另一pair的女方,佢bf叫阿言)己經雞啄唔斷定(發揮女人本色),忙於互相交流,原來大家都係yahoo blog友,佢係睇BearSa個網認識麥田,而我就係睇Mrs Money o既,佢仲準備o左好多飾物同道具添呀,反觀我同honey得一個篋加一個紙袋原來都幾輕便,哈!!

男士們試好衫之際,化妝師同攝影師都陸續到齊,但惱人o既事亦發生喇,化妝師o黎到先問我hold o左邊幾套衫,咁我就係本衫catalog度指俾佢,當時己經心諗咁奇怪o既,我之前揀o左衫,佢o地明知我今日影,又話咩要盡早出發,咁唔係應該早一晚就應該拎定我hold o個幾件衫出o黎o既咩??

結果,令我百般無奈o既事發生喇!!!

佢o地搵極都搵唔到我揀o個套晚裝(我揀o左兩件婚紗,一件晚裝)!!

仲記得我幾星期前試衫,當時我仲o係blog度懶神秘話揀o左一套少人揀o既顏色eg影相,估唔到懶神秘o既結果係呢件我覺得自己著完'叮'一聲o既衫,跟本就無得影,大家能相像嗎?我當時失望之餘仲好嬲呀!!有乜理由唔係早一晚就check清楚我件衫係咪度,拎埋出o黎o既咩?而且,聽佢o地講,d衫無可能己經借o左出去,亦即係話件衫肯定係度,只係可能裝修搵唔到,所以我更加覺得無奈同失望!!

去石門車程需時,為o左搵我件衫己經用o左唔少時間,結果好求其之下,我揀o左另一件同色晚裝試身,唉,算啦,雖然我唔係太鍾意件衫中間d閃片(感覺好似著o左件奶奶衫!),但無辨法啦,認命,無謂阻住自己又阻住另一pair人出發!!

結果,男士們試好衫、搵晚裝不果再等我試埋衫後,大家終於八點幾九點先出發!!

我同Wendy都唔係好明點解男士們唔係o係我o地試衫時試埋,搞到一早七點上到去先試,其實佢o地準備充足d,大家唔係可以更早出發,又或者大家都可以訓多個鐘,精神點去影相嗎?