乖豬的名字 (32W)

31/3/2011 (32W2D)

肚圍: 37.5寸, 體重: 133磅

=========================================================

其實自結構檢查知道係女之後, 我同老公子就已經幫乖豬改好中文名喇!!

雖然, 我同老公子都覺得唔會再改第二個名, 但而家因為乖豬未出世, 都係保持神秘先, 等生o左先開估!!不過對於改名心德, 都可以share少少:

首先我係o係blog友小藍度睇到一個大陸改名website(http://hk.myblog.yahoo.com/littleblue619/article?mid=16714),佢入面介紹o左咩字適合兔B(印像中大約係話有'口'字, 草花頭, 禮衣邊等等o既中文字), 於是我就上網o係d字典度搵屬於呢d部首而又覺得好聽o既單字, mark低晒!!

知道乖豬係女之後, 我就捉住老公子一齊睇呢d單字, 老公子揀o野一向快手, 所以話咁快就俾佢ban 晒佢唔鍾意o既字, 選擇得番好少!! 之後左拼拼右拼拼, 最後得到'最後名字'!!

個名, 其實唔算好好聽, 因為讀出o黎唔算'響', 不過我同老公子都覺得意思重要過好聽 (其實而家d人改名, 我個人覺得似係以好聽行先囉!!), 所以都幾鍾意呢個名, 我老公子直頭好似唔想consider第二d option添, 因為我之後好間中又up d option出o黎, 老公子都係堅持呢個名最好, 似乎佢真係好鍾意, 所以呢個名, 都應該9成9會用o架喇, 我仲諗埋如果第二個係仔時個名叫咩添, hehe, 希望乖豬會鍾意啦!!

至於英文名, 其實o係未有BB前我已經諗好o左:

男仔: Kobe
女仔: Koey

原因其實有d'大女人'o既, 因為我唔抵得小朋友中文名跟老公子姓, 所以我要佢o地英文名跟我姓!!!

由於跟我姓o既英文名少之又少, 所以暫時得上面兩個名合適, 如果下一胎再生個女, 真係要諗o下仲有咩名係'KoXX'咁喇...haha!!

=========================================================

1/4/2011 (32W3D)

講完乖豬個名, 不如講o下我最想自己邊樣o野遺傳俾乖豬....

...無錯, 就係我對眼!!!

雖然擁有深深o既黑眼圈同大近視, 但對眼的確係我自己最滿意o既身體部份...

...至少...都算大, 雙眼皮又深, 睫毛仲ok長o架!!

其實我對眼, 係遺傳自我媽咪o架, 我媽咪成家人都擁有我公公o既大眼睛, 對比上o黎, 我細佬妹對眼相對無咁似媽咪!!

我對龍鳳胎細佬妹, 可惜我對咁細個o既佢o地無乜印像啦, 而家睇相真係好想mit佢o地呀!!!

至於長睫毛...我媽d睫毛其實頗短, 至於我爸, 其實都唔算太長, 但我好好彩, 睫毛竟然可以又多又長, 對眼就好似劃o左眼線咁...

 

我成日覺得我d睫毛似sesame street呢隻象...

總之呢...乖豬其他o野唔似我都ok, 但對眼呢, 似我都唔錯吧???(哎也, 如果乖豬出世對眼唔似我, 我係咪要delete o左呢個entry呢???)

最後post o下我自己細個d相啦, 幻想下, 唔知乖豬會有幾似我呢??

出世一星期左右o既我!!

...anyway, 我都係幻想o下o者...其實乖豬似邊個都好, 都係我同老公子o既愛情結晶, 應該遺傳o左我同老公子o既最好基因吧, 而且都係o個句, 最緊要健健康康!!!

輻射

尋晚睇晚間新聞, 講日本發現泥土有鈈元素, 即係話鈈燃料棒開始溶解 (其實我都唔明溶解即係點?), 之後新聞就講解咩係鈈, 講到好恐怖, 話只要一粒方糖咁大o既鈈就足以令全球人類滅亡...

唔知點解我聽完覺得好驚呀, 可能因為我始終唔多明核輻射呢樣o野啦...雖然我都明驚都無用, 因為好似避無可避咁...

Anyway, 今日lunch有個怪現像, 就係出去買飯見到好多同事折返, 原來話落雨喎...但其實d雨好細之嘛, 唔拎遮都OK, 但見個個都番轉頭, 我以為好大, 所以都有番去拎...

但事實上, 真係只係好細雨咋, 我有少少懷疑, 大家都咁'神心'番轉頭拎遮, 可能唔止怕落雨, 可能心理上唔多唔少怕d雨入面有日本飄o黎o既輻射都未定...唔知係咪我諗多左...

威爾斯超聲波檢查 (32W)

29/3/2011 (32W)

肚圍: 37.5寸, 體重: 133磅

=========================================================

32周, 正式8個月!!! 呢幾日朝早坐係office都要勁透大氣, 呼吸困難, 反而係街行下行下又會好D, 可能係個人屈住坐係office o卦, 頂住個Xo卦 (早幾日我咁講, 完全無講粗口意思囉, 但老公子猛話我~~~~唔通我會鬧自己咩)...至於食o野, 唔好講嘔, 而家好似連胃口都無埋, 唔識餓咁, 可能又係因為頂住左個胃...

今日下午有得去威爾斯照超聲波, 好開心呢, 又可以見到乖豬, 今日仲叫o左媽咪陪我去, 我媽未陪過我照o架!!

Lunch出o左去沙田同爸爸媽媽食飯, 之後就同媽咪周圍行o下, 見到Lancome好多人, 原來係林峯呢!!!

3點鐘去到威爾斯臨床醫學大樓(即係上次飲糖水o既地方), 先驗尿, 尿糖試紙有好輕微變色, 所以要我臨走時再驗多次!!!

之後就做問卷, 睇下過去一個月食o左d咩, 吸收幾多vit d, 再之後就抽血, 量血壓 (上壓10x, 下壓6x, 正常) 同磅重, 跟住就照超聲波喇!!不過, 因為呢度唔係正常做產檢o既地方, 所以得醫生睇o個個mon, 我要扭轉頭先睇到個screen!!!

醫生先度頭 (bpd 8.13cm), 肚圍(29cm)同大脾(5.89cm) (d數字我都係最後醫生入電腦時極速咁抄低, 但無私家醫生o個d %, 所以都唔係好知乖豬d size點, 只係知最後見到有個graph, 有三條線, 乖豬三個data都o係中間線上, 係其中一個data比中間線高少少, 但都唔係好知係邊條線lu...!!)!!

頭

肚

跟住醫生就應我要求, 照bb個樣, 因為我睇私家, 個私家都無照過bb個樣俾我睇呢, 呢個醫生做vit d research, 同我見過幾次面都幾好傾, 所以我就斗膽要求佢照bb個樣喇, hehe!!醫生話bb轉o左頭(乖豬面仔應該係向住我右邊, 面向上), 所以係難d睇到個樣, 加上佢隻手遮住o左塊面, 所以照得唔多清!!

醫生話相中間o個個係bb個鼻 (2個鼻孔都睇到呢!!)

screen中間綠色剪咀上面o個個係眼窩, 不過我都係睇得唔多明喇...anyway, 好過無得睇o既...hahaa!!!

我同媽咪都有問咁係咪BB個頭仔唔會再掉番上o黎, 醫生話機會唔會太大, 另外我又問埋BB會唔會臍帶纏頸, 醫生都有照埋, 話見唔到頸有臍帶, good 呀!!!最後, 問bb幾重, 醫生話大約4lb, 不過我唔記得問預計出世時幾重lu!!!之後, 醫生就幫我度埋骨質密度(應該都係正常啦~~), 最後驗多次小便, 試紙都有少少變色, 但醫生話無咩問題, 最後4點15分走得, 臨走前, 醫生叫我生得時call佢呢!!!!

今次係媽咪第一次陪我照超聲波, 佢話覺得而家d超聲波同佢當年照差唔多, 可能少d noise咁咋喎, haha!!

另外, 其實因為我周數開始大, 所以都成日問我媽生細佬妹時係點!!今日都一樣, 佢話以前照細佬妹好迫, 乜都睇唔到, 又話佢當時個肚5個月已經出現透氣唔順o既情況, 要放假成日坐係屋企!!訓覺更加慘, 我而都話可以打側訓, 但佢陀2個, 兩邊都有個B, 打側訓會札住其中一個B, 所以佢係平訓側訓都唔得, 只可以斜斜o地坐係度訓, 嘩...聽見都慘呢!!

另外, 原來佢o地o係快8個月時己經作動, 我媽痛o左一陣即call正去緊ball o既醫生番o黎開刀, 出世時各有4lbs, 嘩, 未夠8個月都有4磅, 咁我媽陀我細佬妹都算陀得幾好呀, 兩個size都中碼, 無話孖胎而偏細呢!!!

好彩有媽咪陪, 傾下計咁等o左大半個鐘先有車番屋企, 番到屋企同我平時放工都差唔多呢!!

嘔吐回歸 & 辭職 & 執走佬袋 (31W)

22/3/2011 (31W)

肚圍: 37寸, 體重: 132磅

=========================================================

尋日4,5點去完toilet又失眠, 左轉右轉又試見到天開始光先訓得番...到老公子鬧鐘響, 我又醒左, 於是一個大轉身, 左腳腳瓜忽然...

抽筋呀!!!

...好彩我反應快, 腳掌即向上拉, 再叫老公子幫一幫我, 所以唔太痛亦好快唔抽...不過呢, 真係好想知係我用力太大所以抽, 定係我已經開始進入大肚婆抽筋o既階段...希望係前者啦...

另外, 上次俾o左幾件舊衫我o個個同事又俾o左一大袋舊衫仔俾我, 仲有包被同隔尿墊, 其實都多謝佢o既, 但d衫一o黎好舊, 二o黎好土, 而且多數冬天款1至2歲以上先著到...我同老公子揀剩唔太核突(不過d款都係比較土) o既留o左成袋o既5分1都唔知有無, 其餘o既, 真係太殘喇, 都係好似上次咁捐o左好過...

呢個同事仲問我要唔要BB車添, 但太遲喇我已經買o左喇 (所以我都無問佢係咩款喇!), , 早d問我就好啦, 呢樣我反而唔怕要佢, 我諗BB車殘極個款老土極都有限嘛, 可惜可惜!!

==============================================================

23/3/2011 (31W1D)

好似話BB大o左, 媽咪o既肚同肺部就會被子宮壓住令到出現呼吸同胃部不適...

呼吸困難就無乜, 係好間中好間中無啦啦要透大氣, 但胃部不適嘛, 似乎已經重臨我身上喇!!

記得我講過我餐餐嘔o既情況到24周(6個月)後先開始改善嗎? 其實嘔吐一直無離開過我o架, 只係由餐餐嘔, 減少至一星期嘔1次半次, 中間其實都無試過2-3星期無嘔過咁幸福o架...呢個幾兩星期, 嘔肚次數又回升番喇, 好似尋日咁, lunch同dinner後都嘔番少少出o黎呢, 近幾餐食完都唔多舒服, 作反胃, 以我估計, 一星期嘔4-5次又試走唔甩喇...真係要小食多餐先得...(其實一直番親媽咪同奶奶度食都必嘔, 因為次次都食到好飽...又多湯水, 唔好意思唔飲...)!!

==============================================================

25/3/2011 (31W3D)

尋日, 我終於正式交了resign letter俾上司喇!!

其實上星期五, 我已經膽粗粗搵o左我阿姐講有關辭職o既事!! 當時, 我覺得我阿姐佢應該覺得好突然, 因為佢咩反應都無, 似乎係太過unexpected而o黎唔切有咩反應!!!所以佢乜都無問番我轉頭, 亦無交代我走前及走後o既安排!

由於阿姐admin上乜都唔知, 所以我呢個星期初就打去公司personnel再一次confirm我要enjoy產假o既同時又resign o既做法, 問清楚所有要寫o既日子, 一次過填好假期(產假及年假)申請表同寫好resign letter:

當初交俾公司o既預產期: 5月25日 (第一次照o既日子, 第二次打後先變成而家真正o既5月24日)
產假: 5月11日 - 7月19日 (前2後8)
年假: 4月28-29日, 5月3-6日, 5月9日 (一共7日, 由於產假剛好跨過contract year, 公司列明contract year完之前未放o既annual leave要forfeit,所以我一定要係產假前放埋剩餘annual leave, 否則我resign o左呢d假都唔會變到做錢!)
離職生效日期: 7月20日

加埋annual leave同埋5月初有2日公眾假期, 即係話, 我放完復活節長假番多2日就暫別工作生涯喇, 到時都係36周, 距離預產期仲有近一個月, 好似好正咁呢!!

填好晒所以文件, 尋日我正式再搵我姐交代我幾時last day, 佢同上次一樣, 反應唔多, 不過我feel到佢係有d唔開心, 可能係對我失望o卦...

再之後, 我就正式交文件俾真正行政上o既上司, 同佢傾左陣計, 氣氛好好, 雖然工作上接觸唔多, 但佢好nice咁問下我點解會有呢個決定, 又講下佢自己生兒育女o既經驗, 話其實o係香港地請工人其實真係好平, 絕對抵得番free番父母出o黎o既時間云云...

雖然老細真係幾nice, 傾計氣氛都好好, 但傾完計, 老實講, 我有少少唔開心, 因為...

1. 老細o既說話,有少少動搖o左我, 令我質疑自己同老公決定唔請工人係咪o岩!!
2. 老細笑笑口話, 我入職無耐就大肚, 而家放埋產假就resign,好難唔令人覺得我係'極有planning'...

對於第1點, 我都係動搖o左一陣, 好快我就對自己呢個決定重拾信心, 因為做呢個決定之前, 我係有認真同老公子考慮過, 我亦搵過唔少做全職媽媽o既blog去了解同參考(http://hk.myblog.yahoo.com/jw!2cdQTV2VBUYsXiJ_uWMw/article?mid=5807)...總之, 做全職媽媽呢個決定並唔係我同老公子一個草率o既決定, 雖然2份糧點都好過1份糧, 呢個係事實, 但我用我o既學識投放o係小朋友身上, 相信同樣值得!!

至於第2點, 雖然老細笑笑口咁講, 唔係真係怪我, 但其實我都知好難唔令人咁諗!!雖然佢口中我o既'plan'有一半係事實, 因為當初搵呢份2年約o既工, 其中一個目的, 的確係方便自己有產假去生小朋友, 不過另一半唔係事實!!!

大家之前有留意開, 都會知我當初係付出唔少努力, 去自薦, 仲要大減人工先得到呢份'dream job', 有小朋友前, 我完全唔知道我媽原來係唔肯幫我湊小朋友, 所以開初做呢份工, 我真係無諗過我難得搵到份'長工', 但我最終竟然又要係做滿一年無耐就辭職!!!!...

試問, 如果我一心諗住騙產假, 我點解唔乾脆留係之前份1年約, 人工高好多o個份度生, 而要犠牲好幾皮收入o黎呢度生仔?? 再講, 話想生小朋友就生, 係我好彩, 試問我當初就算好有'planning', 我都plan唔到懷孕成功與否吧???

Anyway, 事實放o係眼前, 我都明白好難令人唔覺得我係'有planning', 呢半隻死貓我都係要食o架喇, 無辨法啦, 唯有自己睇開d, 放產假前唔好再同同事提及 (唔計上司, 有4位飯腳知!!), 就等我低調咁放產假後自動消失吧!!! 之後o既是非, 我聽唔到亦唔再需要理喇!!

至於你問我, 如果我同樣幸運地話生仔就生仔, 有無後悔放棄之前份人工高好多o既工作, 大減人工番呢份工, 答案係無o既!!因為過去呢大半年, 我放工準時, 番屋企又近, 私人時間大增, 而且中大空氣好, 我唔使日日係紅隊口吸廢氣危害自己同乖豬健康, 工作量適中, 唔太忙亦唔太得閒, 剛剛好, 同事之間又少是非, 總之, 真係dream job, 放棄係可惜, 但亦係我自己o既決定, 無得後悔!!!

呼~Resign完一身鬆, 尋晚訓得好好, 今晚又約o左一班好姊妹晚飯, 心情大好, 行過花開處處o既校園, 真係要影番幾張相, 留個紀念!!

 

番多一個月就離開呢度喇, 雖然可惜, 但無辨法, 隨住乖豬o既出現, 未來仲有好多新挑戰, 我要努力向前看!!

===========================================================

27/3/2011 (31W5D)

終於執o左走佬袋喇, 原來都好多o野要帶呢!!!

前要o個個係老公子接我出院時先要拎o既bb衣物, 左後面係bb用品如尿片, 濕紙巾等等, 右後方個大袋就係我o既入院用品!!

30W4D (肚皮相 + 影片)

19/3/2011 (30W4D)

雖然我個個星期度肚圍, 但真係好少影肚皮相!! 見呢排都開始多人話我個肚大 (雖然其實幾星期都係36寸多d o者), 等我影番張大肚相share o下啦!!

我媽話佢生我時都無我而家個肚咁大!!

下腹條線仲係好淺色!!

 
haha, 呢張自拍相好搞笑, 雖然雙下巴, 但肚皮影得又白又滑, 唔錯吧!!

 
留意頭幾秒, 之後乖豬都係輕微郁o下o者!!

留意第十秒

第四次健康院檢查 (30W)

15/3/2011 (30W)

肚圍: 36.5寸, 體重: 131磅 (肚圍呢幾week都無乜大到, 但唔知點解望落連我自己都覺得個肚好似大o左!!)

===========================================================

進入10周倒數, 媽咪同老公都提我係時候要執走佬袋, 我就諗住32周先執, 應該OK o既!!

呢個星期繼續體能下降, 尋日係屋企用蒸氣燙斗燙一陣衫已經腰部酸軟無力, 要中場休息幾次先燙完d衫!!

至於乖豬, 當然又大隻o左...本來平訓係我覺得最舒服o既姿勢, 但而家平訓乖豬郁得好勁(可能係平訓個肚會扁o左空間細o左, 乖豬一郁就好明顯!!), 所以唯有打側訓, 但我成日覺得打側訓我手會好易痺,同埋可能彎住條腰, 又或者係呢排濕度高o左, 總之呢幾朝訓醒都好似好支力咁, 好似做完劇烈運動咁o既feel呢!!!

===========================================================

16/3/2011 (30W1D)

又淘!!!今次主力淘寶買乖豬d衫仔, 雖然話上次去花園街都買到d唔錯o既, 但淘寶見到又覺得多花款d, 咁又買o左3百幾蚊(都成10件BB衫仔o架, 抵!! 今次買o既衫仔都特登買colourful d o既, 唔使成日都係白色碎花紋衫仔!!), 另外亦買o左幾百蚊玩具...

老公子今次自拍唔知點解咁醒, 自動波擺晒pose鍚我...抵鍚!!

同上次一樣, 幾十幾十RMB咁買, 咁就用o左HKD8舊水喇, 就咁睇, 又好似唔算買o左好多o野...BB錢真係易花...

呢兩日天氣轉冷, 濕度得番4X%, 真係未試過見到濕度低會開心成咁, 於是拎晒所有未洗o既衫仔帽仔出o黎洗埋佢, 第二朝已經乾透, 正到爆炸!!!襯今晚(17/3)濕度仲係低, 我想洗埋d布玩具添呢!!

===========================================================

17/3/2011 (30W2D)

今日又去健康院喇,放工後就去沙田join埋rebec同bess lunch, 之後同rebec行o左陣一田就一齊走喇!! 

去到健康院3點9, 今日好多人, 上到去好驚有排等!!

至於checking, 一切正常, 係摸肚特別d, 因為我拎高件衫, 姑娘都未掂我個肚己經望實我個肚, 話bb咁活躍呀, 係度郁, haha!!!

另外, 今次亦係第一次見姑娘拎把軟尺去度肚size, size正常!! 之後摸肚, 姑娘按o左1,2下己經問我bb係咪成日係我肚臍右邊郁, 我話係呀, 犀利呢, 咁都知, 佢話係呀, bb成個pat係右邊, 仲叫我自己襟o下...

之後佢再按, 佢話: bb泊緊車!!! 我第一下聽唔明o架, 後尾先知, 佢意思係bb斜斜o地頭o係左下方pat pat o係右上方咁樣, 未正式泊o岩生產個位, 佢仲叫我可以自己襟下左下腹, 成個頭仔o係度, 我於是學佢咁襟, 又好似真係硬硬o地有舊o野係度呢, haha, 等我今晚試下叫老公細力摸o下, 睇o下佢摸唔摸到先!!! 

變形 (29w3d)

11/3/2011 (29W3D)

乖豬郁一d都唔奇, 不過呢晚睇睇o下電視留意到佢頂住我左邊肚, 仲要頂o左出o黎唔走, 望下個肚, haha, 原來俾佢整到變o左形, 我都係第一次見個肚咁咋!!

究竟突出o黎o既係乖豬邊part呢?

===========================================================

12/3/2011 (29W4D)

頭先剛剛拍o既, 唔算郁得勁, 十幾二十秒時肚中間頂o左幾o下細o既, 之後約三十秒乖豬由中間移o左去右邊, haha!!!

訓得唔好 (29W)

8/3/2011 (29W)

肚圍: 36.5寸, 體重: 131磅

===========================================================

尋日終於打o左去人事處查詢公司對大肚辭職職員o既產假安排, 結果係我只要係放產假前1個通知公司resign, last date填產假最後一日, 咁我就可以唔使賠錢, 仲可以享有有pay產假!!!

呢個結果當然係最好啦, 不過...一諗起同事們打算買禮物送俾我, 但我轉個頭就resign就真係覺得好唔好意思...而且, 計埋我放完產假, 我呢份工其實都係剛做夠一年, 感覺上真係好似入o黎特登生仔咁(雖然呢個都係事實, 但我之前無諗過我媽唔幫我湊o既...), 就更加覺得樣衰...

數數產假+剩餘o既Annual Leave, 我應該4月28號就放假喇, 亦即係話, 我最遲要今個月月尾就同上司講resign...諗起都有D面矇, 唉...要點樣良心先好過d呢??

===========================================================

9/3/2011 (29W1D)

已經係連續第三日訓到4點幾5點急, 去完toilet後眼光光喇...第一日最慘, 天光都訓唔番, 尋日同前日就好D, 我諗大約6點訓番啦...點解會咁o既呢...之前有左頭幾個月都會咁, 但好少連續咁多日, 希望今晚唔好又係咁啦...

另外, 唔知係咪心理作用, 呢幾日又開始有D胃頂頂同透氣難o左咁...係咪乖豬大隻o左壓住我??

===========================================================

10/3/2011 (29W2D)

尋晚發o左個怪夢, 我夢見我番我媽度食飯, 媽咪好主動咁話要睇我個肚(現實我媽唔會咁主動!掉轉我叫佢都未必會摸我個肚!!), 話要睇BB D手腳有無伸出o黎, 之後我就見到佢係我肚皮mit o下mit o下咁, 真係見到佢隔住我肚皮拎住BB隻手, 而我就呢個時候猛搵相機, 話要影低佢...

之後更古怪, 就係我坐坐o下, 見到自己個肚皮有個5蚊咁大o既位變o左透明, 俾我見到乖豬對眼好似d公仔咁又大又多睫毛, 仲要對住我笑緊, 好可愛, 之後我就叫媽咪老公子望入呢個'lone'望o下BB個樣...

之後, 無啦啦唔知邊個係個'lone'度拎o左乖豬出o黎, 乖豬得番好瘦, 面尖尖, 面無四兩肉咁, 但已經著晒BB衫, 佢個樣同頭先係肚入面唔同, 對眼好肉酸, 兩邊眼尾向下垂, 好細...仲要眼白生o左d好似息肉咁o既o野, 我係夢入面諗, 做乜咁醜樣, 實係似爸爸啦..(但其實個樣都唔似老公子!!), 但又唔算好嫌棄, 反而好concern佢眼白個息肉有無得醫...

之後個夢場境又唔同o左, 又係一個怪夢, 但同BB無乜關係喇!!(好無聊, 但有興趣大家可以睇埋...haha!!)

個夢一開始好似去o左夏威夷咁, 係海邊好多美女好似魚咁被魚杆吊係岸邊, 然係三, 二, 一, 比賽開始, d女o既吊晒落水, 由一班猛男游水埋去爭...爭好一pair pair就上旅遊車, 我無份被吊係岸邊, 但唔知點解都同一個陌生男人一pair係旅遊車...

導遊要我o地一pair pair互相認識, 我呢個partner好高好黑好瘦, 亦有d muscle, 頭髮長長電曲o左好似d好終意去野外打仗露營o個種人, 導遊車o左我o地入個停車場咁o既物體, 話會放我o地一pair pair落去單獨相處兼食自助餐, 點知導遊掛住同我o地呢pair 傾, 傾到唔記得放我o地落車食自助餐, 我於是好肚餓, 然後無啦啦摸摸自己個肚, 先記得自己原來有o左, 唔怪得咁餓啦, 然後就記得自己有老公子, 點解會係呢度識第二個男人...

之後就問導遊, 我老公子同o左邊個美女一pair, 導遊話我老公同緊一個做唔知記者定主播o既美女一pair, 之後我醋意大發, 對住導遊鬧我老公子, 睇死佢實係唔記得佢自己有老婆...

個夢就係我帶住醋意下嬲醒o左...

===========================================================

11/3/2011 (29W3D)

尋晚番o左奶奶度食飯, 同往常一樣, 拎o左好多o野, 但今次特別d, 因為其中兩樣分別係薑醋(有個師奶朋友抱孫)同埋鮮羅漢果!!

由於呢d item都幾特別, 所以上網search o下我食唔食得, 特別係薑醋, 眾所周知大肚婆生o左先食薑醋嘛, 邊有人話大住肚食, 所以我直覺已經覺得我係唔食得!!結果一search, 原來薑醋係會令子宮收縮, o下, 好驚喎, 本來我都諗住食少少, 但而家都係咪喇...

至於羅漢果水, 原來性味寒涼, 我而家成7個幾月肚, 我諗飲少少OK, 但多都係咪喇, 最尾個月先飲都未遲吧...

以前...我成日覺得戒口呢樣o野上一輩俾我呢輩更嚴緊, 但我發覺我媽同我奶奶剛剛相反, 特別係我奶奶, 我試過成餐飯我只可以食菜(佢煮o左幾樣貝類海鮮, 燒鵝/鴨, 蟮(無鱗魚), 西洋菜, 菜心) 話戒口o個個通常係我, 掉轉奶奶老爺會猛同我講, 食少少唔怕, 試d啦, 甚至話呢D食物對我有益(好似今次O既薑醋同羅漢果就係喇!!)...

有時我都諗, 原來上一代都唔知邊D食得邊D唔食得, 但turn out咪又係無問題,  係咪而家資訊太豐富, 反而令我呢輩矯枉過正呢??

第3次健康院產檢 + 花園街shopping (28W)

1/3/2011 (28W)

肚圍: 36寸, 體重: 131磅

進入懷孕期最後階段喇!!!

==============================================================

尋日有個唔多熟o既同事(我諗尋日先叫做第一次同佢講o野)忽然走埋o黎問我要唔要D BB女衫, 當然好啦, 於是佢就拎o左大約7-8件衫仔俾我, 之後就走o左喇!!

我第一時間拎d 衫仔睇...雖然人o地係出於好意, 但無奈我見到d衫仔時係覺得好失望, 因為d衫又殘又舊又污漕!!!!7-8件衫入面得2件係一歲以下, 其餘都好大件, 而且無一件衫係無污漬o既, 其中2-3件仲要已經起晒毛粒, 勁殘...拎到番屋企, 老公子望過都話唔要好過要, 拎去捐o左好過...

最後, 我keep起o左一件叫做好少少o既...不過我估我都未必會俾乖豬著, 到時先算!!

==============================================================

3/3/2011 (28W2D)

今個星期開始每2星期就要番健康院喇!!

本來大約3點9去覆診, 於是lunch約o左係沙田番工o既Bess食, 諗住食完順便行o下沙田一田先番健康院, 點知佢同事幫佢約o左個客食, 同唔到我食...本來有d失預算, 仲諗好唔好一個人出沙田, 好彩後尾搵到o係我屋企附近番工o既Cindy, 呵呵, 咁就番屋企附近食啦!!!

Cindy一見我就話我仲算輕盈呢, 呵呵, 咁暫時狀態都真係唔錯呀!!!大家傾傾傾, 到2點半佢就要番工喇, 而我就一個人去行o左陣街, 特地去藥房同做緊promotion o既一田格價...um...原來尿片同濕紙巾真係藥房抵d...可惜今次係藥房搵唔到思詩樂乾綿啦...上次明明見到呢...

3點半去到健康院, 我第一次呢個時間去, 原來都幾少人呀, 成個檢查半個鐘完成, 唔使成日坐係度等等等, 爽呀!!!

Overall, 今次都係check o個幾樣啦:

1. 驗小便: 2張試紙共三個格仔, 同6星期前一樣都係有一格變o左深綠, 但姑娘話小便ok無問題...我今次醒喇, 即問姑娘咁點解會變色, 估唔到個答案竟然係: 呢格唔關事o架!!!

2. 血壓: 下壓好似係66, 上壓117, 靚!!

3. 體重: 59.3kg, 比6星期前去健康院重o左2kg多少少, 姑娘話重得好好!!

4. 摸肚: 姑娘叫我放鬆個肚...咁我即問佢, 我個肚成日都好似好實, 但又唔係假宮縮咁實, 姑娘回應: 哦~係呀...(我唔係想要呢個reply喎...但佢呢個reply即係我肚實無問題啦!!!), 另外, 姑娘話摸到bb頭仔向下喎, 但亦有講而家仲早, 所以轉番上去都唔奇!!另外, BB心跳係15X下, 今日都係第一次睇到聽心跳部機原來有顯示心跳數字呢!!

最後, 今次checkup發生o左d插曲, 事緣我一個人拎住好多o野, 所以驗小便時有d手忙腳亂, 姑娘見我手都震晒, 猛咁叫我唔使咁緊張, relax, 又問我係咪有'甲狀線'病...??

...甲狀線????

我就答姑娘我一向有手震, 由細到大都係咁, 但個姑娘都係好擔心我咁, 又問我有無驗過'甲狀線'...嚇親我呢, 唔通我真係有'甲狀線'病???乜手震即係有甲狀線問題咩???但我由細到大都手震o架, 從來未聽過咁即係有'甲狀線'病喎...

於是最後見姑娘時就問, 乜手震即係有甲狀線問題咩? 姑娘好好即刻幫我摸脈搏(當時我隻手吊起o左, 一貫地不斷手震!!!), 之後姑娘就話我血壓ok, 心跳又ok, 又問我有無成日無啦啦心跳得好勁...我話無呀, 咁姑娘就話其實佢老公都有手震, 但唔係有咩甲狀線問題, 所以以佢睇我應該都唔係, 只係純綷手震o者...最後佢話如果我唔放心, 生完之後先慢慢搵機會去抽血驗都唔遲!!!

咁就好喇, 咁即係第一, 我唔似有甲狀線病, 第二, 就算有, 我而家陀得都ok, 就算有病都未至於影響bb而要急於去驗!!!

haha, 其實我由細到大都手震震, 朋友間都知, 我亦無咩其他身體問題, 應該都係今日位姑娘太緊張o者, 無事發生過, hahaha!

==============================================================

5/3/2011 (28W4D)

襯部相機個保養期就快過, 我同老公子終於的起心肝, 拎我上年9月跌爆o左部相機去tst整!!!原來未過保養期, 就算整唔番都可以5個工作天內速遞番屋企, 好方便, 唔使再出過去!!!

去完tst, 我同老公子就去護協, 諗住順便買d平o野嘛, 途經卓悅買o左包akachan濕紙巾($34/3pack, 每pack90張)...上網見過人講好用, 但我記得係袋裝濕紙巾, 問sales就話呢隻牌子得呢款, 雖然唔知係咪就係呢款, 但算啦, 買o左試o下, 唔o岩就算...

之後又經過the one, 原來jusco都有係呢度擺展銷, 終於見到上星期荃灣賣清光o既乾綿, 於是就買o左2包($27.5/包)...

3點9, 終於係護協close前上到去, 極多人, 地方極細, 我地見到思詩樂乾綿賣$25/包咋, 諗住再買d啦, 可惜我target o既脫脂綿賣晒...最後...俾錢, 點知原來要教協, 惠氏或雀巢會員先可以買...唉...其實我係惠氏同雀巢會員呀, 只係我由頭到尾都無收過會員卡...結果運吉收場, 唔俾買, bye bye!!!

之後去花園街, 特地去睇bb衫, 原來花園街真係有好多檔賣bb衫呀, 質地都唔錯, 我o地分別o係3間買o左total 10件衫, total用o左$325, 平均$32.5一件, 好抵呢!! 不過呢, 其實諗番轉頭我同老公子懷疑有一檔收少o左我o地$3x, 所以先抵到咁...anyway, 老公子雖然行到好悶, 但我就真係好enjoy幫個女揀衫, 行o下行o下都唔知時間呢, hahaha!!

最後一站, 去新世紀一間床品店買bb床單, 都係多得朋友話我知先知$89/2張淨色床單, 摸上手質地幾好, 好抵!!

最後今晚7點先番到屋企, 唔知係咪買bb衫買得好開心, 又唔係好支力呢, hahaha!!

收獲好豐富呀!!!

==============================================================

7/3/2011 (28W6D)

尋晚好奇怪, 5點幾我同老公子先後急尿去完toilet後就訓唔番, 真係第一次同老公子一齊失眠呢...

結果唔使講, 今日勁眼訓勁無精神, 一朝狂打喊路biu眼水, 眼都睜唔大咁...完全無mood做o野..

講番乖豬, 早排咪話乖豬打C Egg我覺得pat pat 位chok o下chok o下o既, 呢幾日變o左唔係pat pat 咁入, 而係我前腹位置, 加上呢兩日胎動都幾多, 有時仲覺得郁o既部份體積較細, liu o下liu o下咁, 唔通乖豬而家塊面向上(即面向我肚皮), liu liu o下o既係佢d手手腳腳??

另外, 而家乖豬可能真係大隻O左好多又實淨o左, 而家o既胎動無之前咁舒服, 因為佢有時郁o既位置令我覺得un住un住, 特別係我企係度時, 有時都UN到我幾唔舒服!!