第十九周 (23/9 - 29/9): 爛'反'乖豬

今個星期乖豬'反'身能力又進步o左, 日日都總有2-3次見到佢無啦啦趴o左係度...有時以為佢想訓放低佢係房, 但原來佢未有睡意仲周身郁時就最易出事...haha, 有時真係佢叫救命先發現到佢又趴轉o左, 真係要睇實d!!!

另外, 乖豬條頸仔越o黎越有力喇, 呢個星期初放佢係梳化坐時個頭仔有時仲會'中中下'同成日只識向下望, 到星期尾已經越坐越自在, 頭仔多o左抬高睇o野, haha, 睇見佢坐得咁自在, 真係越o黎越似一個人仔, 大個女咁呢!!

坐得幾自在!仲好粗魯添, haha!!

最後, 亦係最happy o既, 就係乖豬開始識'撩'人'反'喇!!佢呢排清醒時笑得多過以前, 以前可能要古靈精怪做好多古怪聲同樣乖豬先笑一兩下, 而家唔使咁喇, 有時我可能望下佢講句o野打個眼色咁佢就笑, 因為佢知有人理佢, 有人同佢玩呢!! 有時佢仲會無啦啦笑得好興奮, 真係我都唔明我做o左d乜令佢笑得咁happy 呢, haha!!!!

24/9: 今日老爺六十大壽, 老公子同佢妹夾份送o左部HDTV俾6299, 夜晚就去o左酒樓食晚飯!!99無叫半圍o既菜單自己點餸, d o野揀得好好, 大家都食得好開心!!! 不過, 最後都搞得夜o左少少, 我最後滾水淥腳咁趕住走, 因為近十點, 要番屋企餵夜奶俾個女訓!!

是日想tum 6299, 於是將99買o既衫同姑仔買o既鞋仔都著上身, 其實條裙仔幾靚, 不過太大, 到出年夏天又可能唔o岩著...所以唔合身都要快d著俾99睇...!!但去酒樓又怕凍, 於是就加件白色底衫同長褲, haha, 成個look好'類聚'...

...不過6299真係超級開心, 不斷讚乖豬著得好靚, 仲猛咁抱住個孫係咁影相呢!!!

27/9: 今日拎o左之前淘寶買落o既冬天衫出o黎洗, 一拼落乖豬度真係件件都好大件咁, 因為我買晒6-9個月size, 結果我睇label, 件件都係9months, 唔怪得咁大件啦...希望過多兩三個月天氣凍時乖豬真係著得落啦...

29/9: 今日無啦啦八號風球, 事前真係無諗過咁風咁遠都打得成, 我屋企又向西北一d風都無, 搞到老公子直頭落埋街先知打風, haha!!! 雖然今日老公子陪我湊女我好開心, 但老公子一番到屋企就同我講o野, 搞到乖豬八卦清醒晒, 食完7點奶唔訓番令我都無得訓番...真係超眼訓!!

另外, 早一晚個女好早訓o左, 老公子番o黎只係見到熟睡中o既乖豬, 我問佢有無好想同個女玩o既感覺, 佢答'有', 等我仲鬼咁開心, 以為老公子開始有'父愛', 識掛住個女...點知今日就原形畢露...

因為佢呢日雖然唔使番工, 但叫親佢同個女玩佢次次都只係玩得一陣囉...見個女唔喊就行番出廳睇電視唔理個女喎, 實在太過份喇, 唔'鵝'老公子都唔得!!!! 你唔係好想同個女玩o架咩?點可以咁無耐性o架!!

========================================================

本周其他精選相:

Papa kiss me!

Mama kiss me!

其實我超鍾意老公鍚乖豬呢張相, 因為係老公子真係同個女玩時我capture影低o架, 好自然好靚!!!

至於我呢張呢...其實係東施效颦, 自拍N張先有呢個效果...雖然都靚, 我都好鍾意, 但無老公子o個張咁自然呢!!

另外, 我發現到乖豬點樣又似我又似老公子...

...乖豬就係將我o既五官砌o左係老公子個外殼度...haha...!!!

今個星期講住咁多先, 下星期見!!

一點感慨

唔知係咪生o左小朋友後受情緒影響, 間中我會覺得悶悶不樂, 有時望到我爸媽如何鍚乖豬, 就更加覺得感慨...

...原來爸媽以前就係咁樣湊大我o既...

奈何人就係咁, 細個時日日有爸媽抱, 有爸媽鍚, 但偏偏長大後對呢d情景全無印像, 只能靠而家睇住爸媽湊孫想像番...

望住乖豬, 無錯, 佢而家日日有我抱, 日日有我鍚好開心, 但我知道, 佢將會同我而家一樣, 長大後係唔會對呢d情景有絲毫印象...

一諗到咁, 就不自覺好感慨...

特別係...

o係我唔開心o既時候...

因為我真係好想變番BB, 好想躲於爸媽懷中感受俾爸媽保護, 俾爸媽抱, 俾爸媽鍚o既感覺...

可惜...

已經無可能喇...

我而家已經長大, 生活中所有辛酸我應該自己處理...

...點解上天造人要令我o地忘記最細個o個段記憶呢?

第十八周 (16/9 - 22/9): 乖豬四個月大

乖豬四個月大喇!!上星期我同乖豬都好忙, 成日都出街, 今個星期終於靜番落o黎休息o下!!

今個星期乖豬第一次自己趴轉, 識打側身都係個幾星期前o既事, 呢個星期佢成個pat轉晒, 連續兩日半趴咁玩後, 終於成功成個人趴轉埋呢!!不過佢仲未好慣用手撑起自己, 所以趴轉後一味只係伸長頸仔抬頭, 一陣就叫救命!!

由於佢趴轉o左又唔識番轉頭, 所以我呢個媽咪開始要多d留神, 看牛咁睇住個女!!

仲有唔知係咪又大個d呢, 少o左大喊, 不滿時會大聲講o野好似表達不滿先至喊, 心情好時亦多o左出聲, 把聲仲要幾大o架, 同早個幾月前好溫柔o既唱歌傾計聲唔同!

另外就係繼續認地方, 不過呢個星期無出夜街, 所以都OK, 但乖豬連床都認埋喇, 而家係廳張網床玩到咁上下就會喊, 抱番入房張床就會心情靚番可以再玩呢!!

16/9: 老公子出完trip番o黎, 雖然乖豬呢排識認下人, 但佢一向都好鍾意爸爸, 所以無見幾日完全無問題, 仲笑晒添!!

17/9: 今日無啦啦發現乖豬玩紗巾好開心!!又試笑到咭咭聲(Koey勁笑)!!其實剛三個月時已經第一次笑出聲, 但到而家四個月喇, 都仲係極少笑出聲呢!!

玩掉紗巾笑到傻o左

18/9: 今日帶乖豬參加好友女兒Freda o既一歲生日會!! Freda係早產BB, 26.5周就出世, 當時得1磅好虛弱, o係爸媽o既愛同悉心照顧下, 眨o下眼健健康康咁就1歲喇, 真係好叻女!!

一班大姐續個抱乖豬, 乖豬今日都算乖呢, 雖然極眼訓, 但被人抱時又無扭計!!

我呢個貪玩媽咪臨時興起仲放低個女俾老公子帶番屋企,自己就同班friend聚下, 去Starbucks吹o左陣水, 再一個人去沙田shopping, 放番幾個鐘頭假, so happy!!!! 

20/9: 乖豬四個月!!!

因為影左好耐, 乖豬唔耐煩勁喊!!

換件衫又影, 其實乖豬仲喊緊, 但呢張睇落似笑, like!!

Family Pic!!!

22/9: 今日去健康院打針!!打針前扭眼訓, 打針時只係eeoo少少扭, 係抽番支針時喊o左少少, 反而打完走時扭眼訓先大喊!!

體重: 6.14kg (稍稍低過50%條線, 好彩姑娘話都算跟住50%條線, 如果唔係實俾我爸媽話我餓親個女!!)

身長: 64-65cm (keep住90%, 唔知點解健康院2個月時有得度高, 4個月又唔度...咁我就唯有番屋企自己度, 係怕唔多準o者!!)

食奶: 1日5次, 掛住玩時食8-15min, 食住訓就45min, 有時真係好怕食得10min咁少夠唔夠...

睡眠: 日間小睡3-4次, 訓30min - 45min就醒...我就好想佢可以一覺最少訓到1 hr...訓多d點都長肉d嘛!!!

大小便: 小便5-6塊, 大便間中隔日一次

=========================================================

今周其他精選相片:

New Toy!!

Hi, 我係Koey仔仔!

伸o左隻腳出床, o係廳就望到係咪訓緊, 好方便!

唔好阻住Koey大爺我睇電視!

Koey勁笑

第十七周 (9/9 - 15/9): 乖豬做o左貼身膏藥

上星期仲估估o下乖豬係咪認地方, 今個星期終於可以肯定喇, 因為今個星期出o左幾日夜街, 乖豬次次都有扁嘴大喊, 搞到長老們都無乎, 要俾番我呢個媽媽先搞得掂!!!

雖然自此之後, 我似乎唔再可能放低乖豬俾我媽或老公子湊走去wet, 但睇見乖豬要媽媽先搞得掂, 都真係幾有成功感同開心o架, haha!!!

11/9:  99為o左俾乖豬可以同佢太婆做節, 遷就我o地提早一日做節, 我當然好開心啦!!!呢日乖豬入屋後都係坐住車車所以無大喊, 但一俾人抱就好快大喊, 我一抱就好快收聲...

Grandma買o既燈籠

右邊係麻麻買o既燈籠!!
Koey: 中秋節快樂呀!!!

12/9: 今日中秋節, 本來諗住6點早d餵o左d冰奶就出門口, 點知o個4安幾奶佢飲o左2安就唔肯飲, 咁唯有係我爸車度埋身啦(因為用o左唯一o既冰奶存貨又埋o左身, 所以夜晚無谷唔使pump...但冰箱就一d存貨都無喇!!)...好彩佢肯食, 仲食住訓足全程, 所以去到酒樓見到d親友時都幾精神, 可以俾人抱唔扭計, 係傳到最後位親友時先開始扭計!!之後我爸就抱佢訓o左成個鐘, 我同老公子就休息他他調調食晒成餐飯, 呵呵!!! 等乖豬醒後就抱下乖豬影o下相, 最緊要當然係大合照啦!!! 其實都好耐無同親友影相喇, 而家多o左乖豬唔在講, 我婆婆又開始無記性, 影多d相留個回憶都真係幾重要呢!!!

第一張影到乖豬笑o既一家三口合照!!!
又要多謝grandpa賣力引乖豬笑呢!!

今次好齊人呀, 連好少出現o既表妹都係度呢!!
乖豬係我家親友中第一個第四代, 所以相中人隨住乖豬出世全部升le!!

食完飯9點幾番歸, 點知一上車無耐就狂喊, 我媽又愛又tum都唔停, 最後要交番俾我佢先冷靜番, 不過似乎係車入面太黑佢有d不安, 佢全程車都唔訓, 牛咁眼咁不斷望住我, 望到實一實好似驚死我呢個媽媽走o左去咁...

最後終於番到屋企, 我一入門口就放番佢落網床, 無人理之下佢喊都唔喊, 表現得極自在, 因為番到熟悉環境好開心, 引佢仲笑添, 如果俾著平時10點幾呢個時候佢已經扭眼訓唔好脾氣呢!!

13/9: 今日追月, 中午好朋友中學同學帶埋囡囡o黎探我!!

有聯絡o既中學同學所生o既BB當中, 多數都係男仔, 得乖豬同翹翹係女仔咋!!

兩位爸爸去o左會所練golf!!!

兩位媽媽湊住B女睇o左一陣!!

老公子話第二時要教乖豬打golf喎!!!

同日夜晚又番99度食飯, 同前日一樣, 其實番去食飯6299仲難同乖豬玩, 因為乖豬又係佢o地一抱就喊, 要我出馬先收聲...

同樣地, 呢晚番到屋企乖豬又試好開心, 明明係6299度仲喊到拆天, 但番到屋企沖完涼爸爸同佢玩時又笑晒!!!證明乖豬大個喇, 識認地方認人, 知道屋企先係最自在最舒服呢!!

14/9: 今日老公子出trip, 而我呢, 就又同乖豬出街 (出o左咁多日街我呢個媽媽都幾攰....), 因為今日係我爸媽結婚30周年紀念日, 我爸特地放假同媽咪慶祝'珍珠婚'!!!

我o地去o左汀角路食泰國o野, 好好味呀!!食完o野本來想係室外同乖豬影o下相, 不過天氣太熱, 乖豬又扭訓, 最後無影!!

Koey: Grandpa & Grandma 珍珠婚快樂!!

是晚番娘家食飯慶祝, 下午一入屋無耐乖豬就大喊, 仲要係見到我媽先大喊, 我tum番收聲, 但只要望到我媽就算我抱住都扁嘴想喊, 我媽相信都幾唔開心...可惜BB就係BB, 真係估佢唔到!!! 掉轉平時一星期見得一次o既grandpa, 乖豬竟然肯跟, 唔知係咪我爸一向成個大公仔咁, 一引乖豬就笑, 深得乖豬喜愛啦, 所以我爸暫時係除我同老公子外, 乖豬唯一肯俾佢抱o既人呢!!!

我媽唔心息, 好努力試...不過乖豬一d面都唔俾, 總之就係喊...其實呢朝早明明我媽抱住全程係街外都OK o架, 唔知點解一入屋就好似失憶咁唔記得我媽, 我媽都忍唔住帶點酸咁話: 辛苦o左4個月日日幫你沖涼你竟然認grandpa唔認得我!!

...噢, 忽然間覺得我媽好可憐呢...因為我知道我媽日日上o黎幫乖豬沖涼其實好攰好辛苦o架, BB真係唔俾面呢!!

15/9: 由於老公子出trip我無飯食, 呢日又番娘家!!!今日一入屋乖豬都有d不安, 我媽好努力同乖豬傾計, 我就係一旁一見乖豬想扁嘴就出聲等佢知道媽咪係度, 結果乖豬望下望下間屋同我媽, 好似無尋日咁驚, 我媽抱都唔係即時大喊, 但我就要跟住係身邊直到佢好似真係適應o左先行得開!!! 

haha, 算你啦乖豬, 今日都俾番面grandma肯俾grandma暗訓覺, tum番grandma!!! (不過入夜後又係另一回事喇...)

另外, 今日發現到一個新玩意俾乖豬: 睇金魚缸!!! 

有時真係不得不承認電視又光又識郁好吸引, 乖豬滿月識望o野已經識睇電視, 而家佢越o黎越大就更加唔在講, 所以我都盡量唔俾乖豬睇, 真係怕佢大個變電視精!!! 今日我媽就叫我推架車對住屋企個魚缸, 第一次無著燈乖豬睇o左10分鐘開始扭計, 之後傍晚再試多次, 仲要開埋燈, 乖豬就靜靜聲都唔聲咁望到d魚實一實, 望o左近半個鐘都未扭計, 真係勁呀, 咁以後唔得閒理乖豬又唔想佢扭計喊, 俾佢望下魚魚就得, yeah!!!

 

=========================================================

今周其他精選相片:

成隻老虎仔咁!!

繼續幫乖豬美容, 呢個頭箍係就係娘d, 但for按低個'怒火街'頭都幾有用, 配埋呢個笑容都幾搞鬼!!

Fashion Show!!!

爸爸抱高高!!

好煩呀!!

呢期識拎o野放入口喇!!

癲雞頭!!

拎起床圍偷窺外面世界!!

伸個懶腰先!!

熟睡了!!個樣好大個女, 話係1-2歲人仔都應該有人信!!

Koey食手食牙膠

第十六周 (2/9 - 8/9): 乖豬認地方??

過o左100日後乖豬真係大得好快咁, 就算我日日對住, 都有少少覺得佢大隻o左, 長o左, 連我媽差唔多隔日見都話乖豬個樣好似又成熟o左...(Actually, 乖豬個樣的確唔多BB, 出街都試過俾路人話佢個樣好mature)!!

今個星期乖豬繼續玩食手指玩側身玩唱歌同傾計(有時仲幾大聲添), 佢而家勁到可以頭尾調轉訓喇, 真係唔可以再就咁放佢係大床行開喇!!

乖豬玩體操!!係咪長過虫虫好多呢??

識打側身後有時唔理佢自己訓時會發現...

睇怕快趴轉喇, 係差隻手頂住咋...

至於趴係度, 頸仔明顯有力多o左, 但雙手就唔肯用力, 所以搖搖下好易跌, 同埋都係好快就喊...乖豬似乎o係趴呢方面都幾懶呢...但佢打側時明明頭仔會用力擰向床似想反轉呢, 真係唔知佢想點!!

最後係食手問題...由於我無買奶嘴, 乖豬而家訓覺就成日食住手訓, 半夜起身以前要我拍先訓得番, 而家就食手就訓到, 無錯, 咁我就唔使半夜起身咁慘, 但真係開始有d擔心乖豬會食手食上癮戒唔甩...

D人話食手指公即係愛爸爸多d, 食指就愛媽媽...乖豬呢期興食晒兩隻喎,叻!!

2/9: 乖豬出世後一直都係由我幫佢剪指甲, 就算係剛出世手指細細都剪到無問題, 點知今日我竟然唔小心剪親個女, 個女俾我整痛當然喊啦, 一望, 原來手指公仲流血添呀, 嚇死我!!不過好彩, 傷口其實好細, 好快止血乖豬亦好快唔喊, 唔係真係肉痛死!!!

3/9: 早兩日我'忽然'覺得好苦悶, 老公子就猛問我今日有乜節目, 又話不如交個女俾grandma去拍拖...知道老公子有呢個心思想我無咁悶都算係咁...不過真係放唔低個女, 因為我媽呢排頭痛得厲害, 臨時臨急唔係話放低俾佢就得!!!

正唔知今日有咩做好時, 我爸媽就suggest去科學園飲茶, good idea呀!!其實我屋企唔多興飲茶o架, 所以都算係一個特別節目呢, haha!!!

戴帽lup住個'怒髮充冠'髮型, 係咪女仔番呢?

同日下午第一次一家三口行公園!

咁靚o既， 摸下先!

第一次帶乖豬去會所, 大爺咁嘆下先!!!

4/9: 今日下午又飲茶, 今次係同6299, 佢同我屋企好唔同, 好鍾意飲茶o架, 仲要專飲下午茶, 有時成3點幾先有得食...!!今日乖豬仲乖過尋日, 因為佢眼訓到食食o下手係車仔度自己訓o左呀, 訓o左半個鐘我o地就飲完茶行o下一田, 乖豬就起身睇o野, 全程無乜喊, great!!!

7/9: 今日乖豬好忙, 先約o左我好友食lunch再上佢屋企同佢7個月大o既BB一一玩, 之後傍晚就番我媽屋企食dinner!!!唔知係咪大個認地方呢, 乖豬o係我朋友同我媽屋企都大喊, 兩次都係餵完奶後先冷靜番呢!!!

Hello一哥哥!!

阿婆嘴!!!

全部都望鏡頭, good!!!
(P.S.我今日發現自己著得番以前d牛仔褲呀, 超開心...雖然上磅我反而重o左...)

上次一一o黎探乖豬時5個月大, 都仲未識坐, 眨o下眼而家玩扶住o野行喇, 又係床上打滾咁好活躍, BB真係大得好快, 過多兩個月乖豬應該都學坐喇, 真係唔敢想像時間過得咁快!!!

8/9: 今日99 o黎探乖豬, 帶佢落公園仔行, 但乖豬又試大喊, 99試圖tum番但不得要領, 抱到好遠我都聽到乖豬d喊聲...最後99搞唔掂俾番我!!!我抱好少少, 但仲係心情極差...開頭我估佢又係認地方, 但無理由呀, 平時出街佢不知幾鍾意望o野, 最後我估應該唔係認地方, 而係太熱所以發脾氣, 發脾氣所以更熱, 於是越喊越熱...!!!

落公園前乖豬仲好好心情, 我仲特登幫乖豬著上姑仔送o既裙仔諗住同99影下相...點知乖豬大喊影唔成!

====================================================

今周其他精選相:

Bathing!!!!條浴巾朋友送, 淡粉紅好靚, 包住乖豬好女仔!!!

呢張好似我細個d出浴照!!

古古惑惑!!

今個星期幫乖豬沖完涼會幫佢帶頭箍/帽, 試圖㩒番低佢個'怒火街'頭, haha!!!

個'怒火街'頭係咪無咁勁呢??好似男仔呀!!!戴住帽就好似店小二, haha!!

P.S.我似乎得o左'媽媽手'喇...其實成個月前已經隱約有D痛, 但呢排越o黎越痛喇...除移動個B外，係屋企無乜抱喇...但出街就在所難免!!!而家痛到唔抱B時都痛喇...慘!!!希望乖豬頸仔快d硬晒, 咁我左手唔使成日托頸會令我無咁痛啦!!!