第十五周 (27/8 - 1/9): 乖豬100日

100日當晚開始, 乖豬又變番開籠雀喇, 既同人傾計又跟我唱歌, 第二日仲無啦啦識打側身添呀, 忽然覺得乖豬大得好快咁, 好得意呢!!

而家佢兩邊打側都好自如, 仲有時想用力吸轉塊面落床添, 真係睇少陣都唔得喇!!...雖然佢側身好叻, 但趴轉仲係好差, 雖然頸仔有力抬頭, 但雙手就唔願用力, 好快就跌同喊, 好'渣'呢!!!

27/8: 今日係乖豬100日大o既大日子呀!!!

下午1點,約o左一班yahoo blog媽媽見面,場面好熱鬧(亦好混亂!),計埋乖豬總共有9個bb,最細個係乖豬,佢亦係唯一頸仔未硬晒o既bb,睇見其他bb頸仔硬晒抱起上o黎真係方便好多呢!!

場面好熱鬧(亦好混亂!)

好開心見到各位呀!!!

乖豬今日好乖，適當時候訓覺等我食下野，訓醒就同其他bb影相，算係合作呢!!

不過，因為要趕住3點餵奶, 所以影得相o黎其實都唔多時間同各位傾多d計交流下湊B心得...唯有下次再約啦, 到時各位bb又大d,一定仲好玩!!!

3點, 我同'戰友'齊齊去一田BB部育嬰室, 呢度有兩間授乳室,但我o地等o左好耐,已經過o左餵奶時間半個鐘都未有房,正打算用餵奶巾算數(其實四周有男人,但BB餓嘛,都無辦法!),點知好好彩,剛剛有一間房free番出o黎,於是我o地就衝入去...

其實如果人少少,我諗係街外餵奶都ok,但一田BB部呢度實在人太多喇,雖然大部份係家長應該唔會見怪,但如果真係要餵都難免會尷尬呢...

4點老公子接我走, 本來諗住買埋餸,但老公子話99五點幾就到, 於是唯有趕番屋企!!由於乖豬出街無乜訓, 6299 o黎到又會無得訓, 於是我就抱住乖豬等佢訓好d等6299 o黎, 點知等等等, 乜都無做我同老公子等到好攰好眼訓都未到...結果7點先上到o黎, 唉...仲要話姑仔有野做要8點半先到,雖然佢地都係一心想同乖豬慶祝100日, 但我出完街真係超攰, 心入面真係忍唔住咒罵囉...

6299當正自己主角抱住乖豬企係中間狂影相, 我唔出聲都睇怕無得一家三口影...而且我真係攰到散o左,求其影o左幾張咋...最後, 唔係我話10點要餵奶佢地都唔願走...我就攰到連同乖豬打百日手印腳印都無力, 唯有第二日補番啦...

睇我樣都應該覺得我真係好攰...

是晚係就係好攰,但我竟然失眠囉...好彩老公子了解我咋, 佢即刻唔睇波陪我訓我先終於可以點幾鐘訓著...多謝老公子...不過乖豬o既100日咁就過o左, 無精神同乖豬影番d靚相同打手印有d可惜!!!!!

乖豬101日, 忽然拎起件 I Love Mama o黎著, 因為呢件實在太簿喇, 開冷氣會唔夠暖, 所以無乜著, 點知原來己經唔多合身喇...睇番乖豬出世幾日後著件I Love Papa就覺得BB真係大得好快!!

滿月時整o既手印腳印!!

今次整得成功好多靚好多!!!

對比隻腳仔, 大o左好多呢!!

另外, 99終於拎o左我老公子細個d BB相出o黎喇, 大家又覺得似唔似乖豬呀？

呢張幾似!!!

其他老公子細個又比較似乖豬o既相!!

31/8: 今日我爸又放假, 所以我又帶乖豬出街行ikea,乖豬又試掛住睇o野唔願訓!!我係ikea買o左個放玩具o既籃俾個女...haha,其實唔係必須o架, 但出街硬係想買d o野俾個女...唔知呢d係咪做媽咪o既通病呢!!

又去街街, yeah!!

同一晚, 兩位好姊妹o黎探乖豬!!乖豬呢晚都好合作, 又笑又多聲出又唱歌, 到佢o地走先扭計, haha!!!

1/9: 今日本來番我媽度食飯, 但媽咪一早打o黎話佢病, 所以無得去...唔知係咪一心想出街而家無得出, 我今日覺得特別苦悶...雖然話同個女玩見到佢笑都開心, 但湊女成日一個人o係屋企無人同你傾計都真係幾悶...

襯中午無乜太陽抱個女落公園仔行o下解悶...成日好想同乖豬影張兩個一齊笑o既相, 但自拍真係好難, 同埋乖豬次次行公園都熱到無厘表情囉...

今周其他精選相: