今個星期乖豬扭計多o左, 但同一時間我同老公子都覺得佢好似明o野多o左, 所以先多o左表達不滿, 似乎智能正在加速發展咁呢!!
發展方面, 佢聽得明多o左o野!!
肯定佢明o既有: '抱抱', '食奶奶', '食粥粥', '食星星餅', '最後一啖', '食晒', '飲水水', 'bye bye duck duck' (佢有隻鴨仔陪沖涼, 每次沖完收起佢隻鴨前我就會咁同佢講, 之前一拎起佢鴨仔佢先發脾氣勁喊, 而家我一講呢句, 咩動作都未做佢就已經變樣, 拎起duck duck後仲會勁Fing手腳彈到周圍都係水以示不滿, 但無再喊喇!!)
疑似識聽: '等一陣', '鍚鍚', '換片片', 'Ng Ng', '唔食得', 'Cookie Monster', '訓覺', '洗白白/沖涼', '過o黎媽咪度', 同佢自己個名
至於爸爸媽媽, 其實我懷疑佢知知o地, 無理由玩玩下玩具我叫'cookie monster'佢識望cookie monster而唔識'爸爸媽媽'囉, 不過試極都唔sure, 問佢'爸爸呢? / 媽咪呢?' 依然無反應, 但佢喊同扭計時多o左'Ma'一聲o既叫聲, 有時仲叫得好清楚, 連老公子都思疑佢係咪開始想叫'Ma'!!!!
另外, 今個星期抱佢時開始識伸手, 少o左食玩具入口 (其實都會食, 但會用雙手研究一陣!), 同佢玩時又多o左發出興奮怪聲, 又嗌又Rarara咁好似講o野, 好搞笑!!!跟住就係學bye bye, 之前bye bye佢見到大人隻手開合只會覺得好有趣係度笑, 完全唔知乜係bye bye , 但呢個星期feel到佢好似對bye bye 呢個動作'認真'o左, bye bye 時多o左專心觀察o既表情, 唔知係咪開始想了解乜係'bye bye'!!!!
扭計方面, 唔鍾意訓係度, 換片沖完涼著衫時喊到拆天, 後尾試坐係度著衫好似好D, 雖然慢, 但至少佢唔喊!!
便便方面, 如果唔出街多數日日有, 但出街有時可能唔痾, 隔兩日先去咁就會去得好辛苦!!! 其實早幾星期前開始逗便便已經幾成功, 只係間中逗唔切佢先會痾o左落片片度!! 呢個星期乖豬成日出街無去便便, 有日佢終於要去, 但又出現困難, 當我同老公子趕住出街想逗起佢時佢竟然喊同反抗, 原來佢未去完呢, 我個人覺得佢識咁反抗幾叻, 似乎佢開始明便便要係potty度去咁, 希望真係咁醒啦!!!最後, 由於乖豬都係飲得太少水便便困難, 又幾日便便一次過去, 我足足逗o左佢45min先去晒...
24/12: 今日平安夜, 我o地3點幾出門口去TST湊熱鬧, 主要諗住影下海港城d聖誕佈置同去citysuper用老公子公司xmas party抽到o既一千蚊去買美食番屋企煮大餐!!!
先去1881, 比想像中少人, 都唔難影相!! 到海港城就多好多人喇, 不過抱住BB都唔難遇到好心人主動幫手影合照!!之後我o地搵地方坐低餵乖豬食梨, 再之後去citysuper買o野, 點知一入到去見到俾錢大排長龍, 於是我就抱乖豬排隊, 無得去揀食物, 排隊其間乖豬唔知因為多人定點, 係度勁大聲叫, 其實又未至於嗌亦唔係喊, 但叫聲足以引起好多人望...最後排排下隊乖豬終於訓o左, 應該係眼訓所以嘈喧巴閉!!!
朝早先陪grandma grandpa食lunch!!
下午先出去TST迫人!!
1881比想像中少人!
騎膊馬!!
海港城迫人好多, 都費事迫入去一家三口同三眼仔影相, 乖豬影o左就算!!
抱住BB有時都有好處, 就係會有人主動幫我o地影一家人合照!!!
行到咁上下搵地方餵乖豬食生果, 差唔多日落, 個view幾好!!
番到屋企都成7點, 好混亂咁settle down之餘仲要蒸番d粥俾乖豬, 而我就忙煮聖誕大餐...老實講, 咁夜先番屋企仲要煮大餐我都有d後悔, 但咩都買晒又無法子!!
老公子於公司Xmas party抽中city super一千蚊, 所以老公子豪買近700蚊美食!!!
包括羊架, 超大蝦同魚生, 不過我同老公子都覺得魚生麻麻, 早知唔買慳番200蚊好過!!!
出完街仲要煮大餐, 又要幫個女沖涼餵佢食粥, 超忙, 雖然有D後悔, 但咁先似過節o既~~~
最後, 可能我同老公子太忙無乜理乖豬, 到我煮好食得時乖豬開始勁扭計, 結果我辛辛苦苦煮好o既大餐要趕頭趕命咁食...我仲同老公子講, 乖豬出現後o既平安夜一d都唔平安, 想浪漫下慢慢同老公子食大餐都無可能!!!
25/12: 今日本來預留o左陪6299飲茶, 點知99唔得閒飲唔成, 結果我同老公子就去o左又一城!!! 其實本來老公子唔想出咁遠, 但調轉要湊女o既我平時實在太少出城, 所以堅持辛苦D都想去遠d, 最後就去o左應該唔太迫人去又方便o既又一城!! 其實又一城真係唔算太迫人, 但唔知點解乖豬好快就發惡, 唔肯坐車要人抱, 到後來連抱住都扭計, 回程時o係火車度由坐車仔到我抱住都係咁扭計喊, 全車人都望住我o地搞到我都好尷尬 (老公子話D人得個望字見我抱住乖豬企係車廂度都無人讓座!!), 結果一o黎開車廂先無事, 番到屋企更加笑番, 似乎真係唔係太適合帶BB去咁嘈咁多人o既地方呢!!!!
2X年以o黎最凍聖誕, 乖豬都要扮蒙面超人!!
26/12: 今日我同老公子各有各活動, 我就帶乖豬同我班好姊妹gathering!! 不過乖豬今日好唔合作, 差唔多去咁耐就扭咁耐計, 係都要痴住我, 到4點幾5點熱身o左成3個鐘先適應到唔喊, 肯係地下周圍爬...可惜當時我都差唔多要走, HAHA!!!
呢位小朋友去到就勁扭計, 可能我o地成班女士太嘈,佢唔鍾意!!!
襯乖豬心情靚少少(唔喊)就快快手影合照, HAHA!!
夜晚番到屋企乖豬又回復本性, 生猛晒又笑番!!!
今日乖豬又多兩份禮物, 係cindy EE送o既, 加埋我細佬女友同乖豬舅公, 總共4份禮物, 多謝大家對乖豬厚愛!!!
27/12: 今日我第一次帶乖豬陪老公子打golf, 是日天朗氣清好好陽光, 乖豬去到心情都超好, 都係呢d大自然地方適合BB多D!!!
可能早幾日聖誕日日出街太忙, 乖豬又無乜便便, 於是呢朝一早就去, 但便便又困難喇, 坐足45min去o左勁多, 難得佢又有耐性坐咁耐potty, 只不過呢, 因為佢去得太耐, 搞到要推遲出門口時間, HAHA!!!!
(懶豬坐potty時long個頭係T字位度休息!!)
呢張相影得唔錯, 老公子好有動感, HAHA!!!
乖豬諗: 呢個波有乜好玩, 唔通好好味??
陽光真係能令BB開心D!!!!呢日乖豬真係笑得好開心!!!
29/12: 今日番媽咪度食飯, 超開心, 因為乖豬今日無啦啦送上驚喜, 就係'鍚鍚'喇!!! 我爸本來放乖豬坐係飯台度, 我爸就坐係側邊傍實, 我媽咁o岩行過見乖豬好近我爸塊面, 咪叫佢'鍚鍚'囉, 點知乖豬真係'哄'個頭埋我爸度停一陣先移開個頭, 我媽勁驚喜, 我聽到都即出去睇, 我媽再叫鍚鍚, 佢真係又再'哄'個頭埋我爸塊面度, 似乎唔係撞彩, 到我拎機影video時就哄得無咁明顯, 再叫佢亦都無再做!!!
隔左大半個鐘, 乖豬坐係車仔, 我就餵佢飲水, 飲完水我就'mou'係佢車側邊放個頭埋去, 我媽又叫'鍚鍚', 乖豬再一次哄個頭埋我面, wow, so sweet, 之後即拎相機影video, 終於影到, 乖豬又好合作, 真係冧死我!!!!
再夜D, 爸爸番o黎乖豬又表演鍚鍚, 影到相!!!!
乖豬越大越貪玩, 開始係'百厭星'喇!!!!
本周其他精選相:
pink lady!!
呢張好似D o靚模pose!!!
好耐無抱過佢訓, 忍唔住影低佢呢個肥豬仔樣!!!
好友話乖豬個樣好似後面隻cookie monster, haha!!!
終於放低左張床喇!!!
心情勁靚, d 表情好鬼馬!!
快過年喇!!!
會所放o左棵大桃花!!
去會所玩騎馬仔個樣好神氣咁!!!
