大肚皮第3回 ~ 極速生產記

今日周家3小姐Kodi出o左世第4日喇!!! 襯6299帶o左Koey Kobe出街, 等我襯得閒快快打o左篇生產記, 好好記錄低我人生最後一次出入產房o既經歷啦!!!

38W5D 砌好床仔喇!! 

肚圍: 39寸, 媽媽增重: +15lbs

16/12 (WED) 39W1D 見紅

仲記得好巧合地, 生Koey 同Kobe 時見紅o個日咁o岩Grandpa都係開始放大假o既第1日, 所以今胎我都八卦o地問o左我爸爸邊日開始放假! 原來係16號, 當時仲心諗, 因為M期唔準, 真正預產期其實大機會係25-27號, 16號咁早, 今次應該唔會咁o岩吧?

點知, Grandpa真係有魔法吧? 16號一朝早起身, 我真係見紅呢, 仲要都幾明顯, 心入面唔多唔少都有d緊張, 因為真係無諗過咁早, 心入面都有少少亂!! 當時老公子剛出門口番工, 而我又成日擔心第3胎生得好快, 所以就即刻打電話叫老公番轉頭!! 呢個時候Kobe起身入房搵我, 我就攬住佢同佢講: 媽咪今晚可能要入醫院生BB喇~~~

通知埋我爸媽後, 佢o地都上晒屋企幫忙, 而我就最後檢查多次走佬袋同keep住留意見紅情況!! 點知中午打後, 紅沒有了, 一直得番少少啡, 肚亦無痛, 最後一直到5點鐘, 我決定都係唔去醫院喇, 因為行得走得真係無跡像咁!!

17/12 (THU) 39W2D 行得走得一切如常, 點知半夜...

夜晚個腦好緊張, 但都總算訓得到, 朝早起身都無再紅, 只有少啡...似乎真係未生得呢, 但呢少少啡又係點解呢?? 心情難免好緊張同囉囉luen, 精神緊張...不過一切依舊, 我仲拖地做家務, 一切生活如常...

無啦啦放o左2 日假o既老公子身痕, 是晚買o左材料打邊爐!!! 打算聽日番工銷假先, 唔好浪費假期!!!

打邊爐後, 我開始覺得假宮縮好似密o左, 不過個肚都唔係痛, 只係一宮縮時個人有d唔舒服咁...

11點我先訓, 點知1點鐘就俾宮縮整醒, 個人忽然勁緊張, 唔通真係生得?? 於是忍唔住拎手機check宮縮時間, 大約7-8分鐘一次, 雖然唔痛, 但好似都幾有規律!! 

我成個人開始好緊張, 即叫老公子入房, 同佢講我好驚, 而家係夜晚, 我應唔應該入院??? 係咪真係生得??? 會唔會去唔切醫院?? 半夜生咪要自己call 白車入院??? 老公子咪無得陪產??

老公子之後開電視陪我睇, 希望我唔好咁集中諗住, 搞到個人咁驚!!!

的確, 睇o下電視好似真係分散d注意, 就係咁, 我呢晚就去o下toilet, 睇o下雜誌, 老公子3點左右後尾都訓o左, 我雖然都有試過再訓, 但一靜落o黎我就feel到宮縮, 忍唔住check時間, 所以我最後都唔敢訓, 3點幾4點走o左去沖涼吹頭, 直到5-6點再試o下訓, 但都係唔成功, 就係咁, 呢一晚我成晚無訓過, 飽受精神折磨...

(清晨見到同我一齊佗第3胎o既中學同學報喜, 真係好開心呀, 唔通我o地真係咁有緣, 兩位小千金會同一日出世???)

18/12 (FRI) 39W3D 入院

隨住天開始光, Koey呢朝番早去學校開聖誕Party, 我呢朝要提早預備小朋友早餐同叫醒小朋友換衫番學, 忙o左一大輪宮縮都疏o左, 我心情亦好番d, 係無訓攰d...

我爸媽8點上到屋企, 預備帶Koey番學, 我先通知佢o地我似乎要入院, 佢o地都有d失預算咁!!! 

送Koey出門口時: 媽咪今日真係要入醫院生妹妹出o黎喇, 你今晚照顧細佬喇喎!!

當時我有少少想喊, 但Koey就好冷靜咁同我bye bye, 一切好似如常咁, HAHA!!

由於呢朝call唔到的士, 最後等到爸媽車完Koey番學先再車我同老公去醫院, 臨落車, 想同Kobe講幾句攬幾o下, 點知佢好cool唔肯攬我, 有d鬧情緒...

最後, 老公子呢日都無銷假, 9點幾就陪o左我去威爾斯登記入院喇!!!

上到產前房, 唔知係咪成朝做o左好多其他o野影響, 宮縮好似疏o左好多, 15分鐘先一次, 有時30分鐘都有, 變得好irregular同要好集中精神先留意到!! 姑娘見我咁疏, 都無幫我check度數, 但就因為我係第3胎, 怕我一生會好快, 所以就安排o左個走廊邊o既床位俾我, 方便我落產房!! (開頭我都有d嫌我個床位好開揚, 都係同隔離床位媽媽吹水先知原來俾呢個位我係有原因o既, HAHA!!)

未到探病時間, 我就同同一邊WING 床位o既媽媽們吹水, 當中得我係生得, 其他都係因為不同產前問題而留院觀察, 原來大肚有o既問題真係好多元化, 聽完大家面對o既佗B問題, 我都覺得我佗3胎都Touch wood大小順利平安好好彩 (雖然話今胎因為成日被人話胎細而出入多o左醫院檢查, 但turn out都無大問題, 真係算好好彩!!!)!!! 

大家傾o下大肚經, 好快就到lunch探病時間!!! 老公子買o左飯俾我, 但我一直就只顧留意宮縮好疏, 同埋研究點用我老公部spare手機等我可以上到網...HAHA, 總之其實都無乜心機同老公子傾計, 一直只係識得問: 點解仲係咁疏o架?? 究竟幾時先痛密d呢??

探病時間完o左, 我決定唔同媽媽們吹水, 試o下當係半夜, 訓o係床度專心留意宮縮, 睇o下會唔會密d, 可惜...一直都無乜進展...

5點半: 又到探病時間, 老公子o黎o左, 行o下企o下, 間中宮縮好似去番7-8分鐘一次, 雖然仲係行得走得, 但好似有d希望...

7點半: 探病時間完結, 本來我超想宮縮一密生得老公子 就唔使番屋企, 直接等埋我落產房陪產....可惜, 老公子探完後宮縮又去番15分鐘至30分鐘先一次, 似乎我18號生B同老公子可以陪產 o既願望, 達成機會都係微乎其微喇...

9點: 老公子o係醫院食埋晚飯回家喇!!! 我亦試o下早d訓, 但又點訓得著呀?? 對住個鐘check宮縮, 時間一分一秒過去...

11點幾: 宮縮痛o既程度好似大o左少少, 不過去toilet見紅依然好少, 痛緊時都仲係行到走到...

19/12 (SAT) 39W4D 極速生B

12點: 終於過o左18號, 同中學同學位小公主最後都唔係同一日生日, 唔緊要啦, 其實同呢位同學仔都3胎一胎比一胎預產期近, 其實已經係好有緣o架喇! :p

12點幾:宮縮繼續15分鐘先一次, 強度有所增加, 開始要少少呼吸幫助忍痛, 但未夠密, 究竟幾時先o黎料?

1點15分:宮縮又痛o左, 但痛o既時間只有20秒左右, 其實都唔耐, 試圖叫姑娘check度數, 可惜姑娘一問知我仲係15min先一次, 唔肯幫我check, 只係俾o左個暖水袋我暖o下肚底無咁痛!!!

1點30分: 宮縮忽然變為3-4分鐘一次, 每次都要呼吸幫助忍痛, 但未feel到有力向下推, 我忍唔住再叫多次姑娘幫我check, 話佢知宮縮明顯密o左好多!!! 姑娘反應都好快, 即刻拉簾幫我check, check完大叫過床, 我心諗: 正, 終於落得產房!!!

1點45分: 落到產房我勁心急...

一宮縮就問:用得力未?

姑娘: 未得, 頭先4度咋!! 

聽到有d失望, 明明記得生細佬時落到佢產房一check7度用得力生o架...

姑娘問: 幾點開始好痛o架?

我: 1點半

之後又痛喇, 我話feel到有力向下喇喎...

姑娘望一望, check都無再幫我check: 見到頭仔喇, 你試o下一痛就出力生啦~~~

我: 好! (正, 用得力就即係唔使再捱痛喇!!!)

之後出盡9牛2虎之力push, 可能剛開始push, 姑娘都未o係我附近, 由得我自己出力~~~

姑娘: 穿o左水話我知~~

o係下一轉出力時, 'pop'一聲, d水噴出o黎...唔怪得無姑娘理我啦, 應該係怕穿水~~~~

其實我都係第一次feel穿水咋, 前兩胎都係生得前醫生人手穿水o架~~

之後, 姑娘先埋o黎幫我, o係姑娘們指導下, 我push o左15-20min吧??? 大約換o左5-6轉氣, 肚皮一鬆, 滑滑o既一團出來了...

2點16分: 細細B終於出世喇!!!! 3.18kg, 咦, 都有7磅呀, 成日話細細B細粒, 出世同家姐一樣有7磅, 真係算係咁囉!!!

我自己望一望鐘, 連自己都覺得有d amazing, 落產房45min就生o左!!!! 

快成咁, 老公除非留o係產房外等, 如果唔係, 就算只係o係醫院附近睇怕都未必趕到o黎陪產...

有時真係整定, 妹妹既然選擇半夜出世, 咁無得同爸爸媽咪影產房出世相都無辨法囉!!

雖然, 都預o左第3胎會快, 加上妹妹個頭細個Kobe, 都估到唔使push太耐, 但產程真係快到傻!!! 上次生細佬由大痛到生3個鐘已經覺得好快, 估唔到今胎仲誇張, 但另一角度睇, 生得快真係捱少好多痛, 感覺始終都無生第一胎咁恐怖呢!!

不過, 雖然話生得快, 但呢胎由見紅到生得竟然足足3日, 假宮縮太短太疏同維持o左好長時間, 唔似早兩胎見紅第二日就生得, 呢幾日所受o既精神緊張壓力比較大, 所以都玩謝我咁滯呢!!! 

3點: 細細B出世後一直伏o係我心口, 直到聯完針, 我就試俾BB啜!! 妹妹好叻, 啜o左半個鐘左右, 力度比想像中大, 希望佢食人奶好似Kobe咁叻啦!!! 餵人奶期間得番一個姑娘係度同我傾o下計, 唔知係咪半夜關係, 產房一路都係最多3個助產士, 比我上兩胎都少人呢!!

3點半: 上番產後房, BB被抱去沖涼!

4點幾: 細細B番番o黎我身邊, 姑娘雖然叫我餵, 但BB整極唔醒, 我亦未好訓得著, 所以用電話同BB自拍放上網!!

Kodi 妹妹出世喇!!!

醫院幫BB沖完涼, 眼仔mark大大, 照結構時話似細佬, 但咁快mark大眼喎, 係咪似家姐大眼睛呀???

呢日細細B日間大部份時間訓, 我10點先可以落床, 其實住院期間只需要餵奶, 都幾舒服o架!!! 

Lunch探病時間: 我爸媽帶埋Koey Kobe探我, Kobe無見我一晚好似怪怪咁唔多願意彩我, 唔知係咪鬧情緒有少少嬲我呢??

老公子終於同到細細B同埋我影相喇!!!

下午5點幾: 6299 o黎探BB!!

21/12 (SUN) 出院了!

呢晚細細B仲係訓得比較耐, 比姑娘叫我餵人奶餵密d, 不過我就好少理, 訓番多d, 斷斷續續都訓到3-4個鐘, 補番o下眠都無咁辛苦!!!

呢朝起身第一時間問幾點出院!! 

開頭都以為下午先出到, 好彩兒科醫生檢查BB, 打針, 同埋醫生檢查產婦都比想像中早完成, 仲好好彩咁, 原來可以即刻做埋先前登記o左o既新生兒代謝病檢查 (抽血), 最後順利12點出院喇!!!

初生BB表情多多, 好可愛!!

出院喇! 大肚皮不見了, 人生以後多了位小千金！ 呢個地方黎過3次，幾痛幾辛苦都經歷夠了，以後都唔會再番黎住架喇，never ！bye bye 威院8樓產後房,多謝所有醫護人員照顧!

出院喇!! 真正展開一家五口o既生活喇!!! 坐月有陪月姨姨都唔太擔心, 坐完月就要展開一湊三生活, 希望一切順利啦!!!