浴血驚魂

28/12/2015 (MON):

呢日係細細B出世第10日, 本來好地地抱妹妹去健康院覆診check 黃, 點知就上演o左一幕浴血驚魂, 第一次上白車, 入急症, 入緊急手術室, 全身麻醉, 第一次臨急買泵泵奶, 妹妹第一次用樽補奶粉...而家總算出院喇, 呢24小時真係發左場夢咁！住院等做手術期間,每次諗起小朋友都忍唔住喊, 好掛住佢地呢...

浴血健康院

呢朝一早, 我媽咪上o黎睇住大o個兩個, 我就一個人抱細細B去健康院, 由於我電話壞o左, 為方便聯絡, 我就拎o左我媽咪部手機出去!!! 出門口後仲撞到樓下管理員姨姨同埋鄰居, 開開心心俾BB佢o地睇, 傾o下計, 之後先上的士去健康院!!

9點準時到健康院喇!! 入lift上二樓, 點知架lift都未到, 我忽然feel到下面有o野湧出, 其實早兩日開始間中都多o左血湧出o黎, 但都只係湧一下就停, 去toilet換過墊同抹完就無, 變番正常少少惡露, 雖然我覺得奇怪, 但都無放太多o係心上...

點知呢一刻o係lift度, 唔係湧一下, 而係不停咁湧, 當時我已經心知不妙, 開始有d驚!! lift到, 我即刻衝出去同健康院職員講我流血, 但無人出o黎理我, 只係叫我入1號房搵姑娘!!! 入到去1號房, 我即刻話我流緊好多血, 流到成褲都係, 成間房其他人都聽到我驚惶失措咁講...

姑娘比我冷靜, 問: 係咪惡露未清呀?
我: 唔知呀, 但我已經成腳成褲都係...

之後姑娘就幫我抱住BB, 俾o左一塊產婦衛生巾俾我就叫我去toilet...

去到toilet, 我一除褲自己都驚, 因為已經彈到toilet門同地下都係血, 成條褲, 連鞋都有, 我當時只能坐o係toilet乜都唔敢做, 因為d血仲係不停咁湧緊出o黎, 換幾多墊都無用...我唯一可做o既, 就係大叫: 有無人呀???

可惜當時toilet乜人都無, toilet亦無救命鐘, 真係叫天不應叫地不聞...

我大聲叫o左大約5分鐘吧?? 終於有人入toilet, 當時o個個女士一入o黎見到我同一堆血可能都好驚, 我就即刻叫佢幫我搵姑娘, 好好彩, 終於有幾個姑娘入o黎搵我喇, 當時我已經驚到成個人震晒同想喊!!!

姑娘: 唔使驚, 冷靜d先, 行唔行到?? 有無暈?? 我o地搵輪椅推你訓床先!! 有無家人同你一齊o黎??
我: 無, 我自己一個抱B o黎check黃!

之後姑娘們都好快拎輪椅o黎推我, 搵o左張床俾我訓住先!!

訓上床, 健康院設備比較少, 但姑娘們都好好, 雖然好多血, 但都盡量幫我, 可惜攝o左好幾塊墊都無咩用, 我仲係feel到下面d血仲係不停咁湧出o黎...姑娘之後幫我度體溫同血壓, 可幸, 雖然流o左好多血, 但我血壓同體溫都正常, 自己亦唔覺得頭暈...

Settle好我後, 我拎起電話正想打俾媽咪通知佢幫我拎衫褲到健康院接我...我手上部電話, 咪就係我媽咪o架囉?? 咁我點通知佢?? 我即刻打俾老公, 話佢知我發生o左事, 但通知唔到我媽咪, 本來老公差d想打番去屋苑管理處, 但好好彩老公子搵到我之前whatsapp過俾佢, 陪月姨姨個電話!!

當時陪月姨姨差唔多上到我屋企, 老公聯絡到陪月姨姨後講o左我情況, 等o左一陣我媽咪就用陪月姨姨電話聯絡到我, 我先可以話到俾媽咪知我發生咩事, 需要佢幫我執d乾淨衫褲o黎健康院!!

姑娘們放番BB係我身邊, 發生o左咁多事細細B都仲訓得好甜, 完全無醒, 咁都好, 如果佢喊我反而仲要照顧佢就仲麻煩...

媽咪趕到

大約大半個鐘吧?? 當時我都已經無晒時間概念喇, 總之媽咪終於趕到o黎健康院, 佢先幫我抱B check黃磅重, 姑娘們間中入o黎問候我情況, 話會搵醫生盡快幫阿B check黃同睇o下我!! 之後又唔知等o左幾耐, 因為已經有入急症室o既心理準備, 我先叫醒BB餵佢食奶, 等佢唔好餓親!

醫生到喇, 細細B d黃比上次退o左, 增重亦理想, 之後醫生只係口頭問我情況, 望都無望我流血情況如何...或者健康院設備唔夠吧? 之後佢就話會幫我call白車入急症喇!!

白車送入院

又唔知等o左幾耐??白車到喇, 兩名救護員問我情況, 幫我量體溫血壓, 原來我當時微燒, 但我自己完全唔覺!! 之後救護員就幫我過床, 抬我上白車, 媽咪就抱埋BB跟車到急症室!!

急症室乜病人都有, 其實我o地都知抱埋BB去唔係太好, 但當時根本無得選擇...

上到白車, 可能我血壓正常又無暈, 白車應該無響號, 反而係又慢又安全咁駛去急症室, 其間救護員仲同我o地傾湊B經...其實佢o地陪o下我傾計都好, 等我心情都relax少少無咁擔心同緊張!!!

到急症室, 分流到'緊急'類

去到急症室, 原來威院新翼呢個急症室咁大咁靚咁新淨...救護員幫我登記好後就交o左我俾急症室姑娘!! 姑娘問完情況後俾o左張黃卡我同推o左我去一間房, 我就o係房內等, 原來黃卡寫住我係'緊急'類,  次於最高級別'危急', 相停醫生好快會到!!!

等醫生期間, 打電話通知老公我情況, 佢幫時已經離開o左公司趕緊o黎!! 之後再通知陪月姨姨我情況, 可能要辛苦佢一個人湊住大o個兩個小朋友一段時間先!!

老公子到急症室喇, 之後醫生都到, 大約等o左15min 吧!! 佢幫我襟肚同檢查出血情況, 當時出血情況似乎已經減少o左, 之後佢就通知婦科收症!! 之後我就被推出房, 轉頭已經有第二位病人被推入房, 急症室真係好繁忙呢!!!

婦科收症

o係急症室大堂等o左10min, 終於有人推我上房喇, 原來我係去5樓婦科病房!! 入到去病房大約12點幾1點, 我繼續訓床, 姑娘問症後隔o左一陣就有醫生睇我, 然後就幫我打點滴同叫我禁食, 水都唔可以飲!!!

之後又唔知等o左幾耐, 可能大半個鐘至一個鐘吧, 我叫老公子同媽咪去食飯先, 因為坐o係度等都無咩用...

老公子同媽咪去o左食飯, 醫生終於都o黎睇我喇, 我自己好怕企起身又baba聲流血, 但姑娘叫我唔暈就試o下照行, 由於我怱怱入院, 鞋又係血, 我當時只係著住襪咁跟住姑娘行去房搵醫生...

懷疑有組織留o係子宮, 要做緊急手術

入到房, 醫生問症後就叫我訓床檢查同照超聲波, 一除褲又係成墊成褲血...比起生B, 呢d檢查係唔舒服, 但總算忍受到...檢查o左5-10min, 醫生話照到我子宮內有陰影, 可能係血塊, 但用拑檢查好似'了'到d疑似胎盤組織o既物體, 雖然檢查時出血情況已經減少o左, 但都建議我做刮宮手術!!!

當我聽到要全身麻醉做手術o個下真係好驚, 聽埋醫生輕描淡寫咁講埋手術風險時我仲驚, 眼淚忍唔住係咁流: 大約1-2%會出現o既手術風險包括失血過多要輸血, 要割除子宮, 嚴重可能會流血不止...

如果唔做手術, 而子宮內真係有組識, 即使而家呢一刻無再流血, 但大量出血o既情況仲會有可能再發生...

雖然我都明呢d風險醫生係必需話我知, 但我今日只係抱BB去健康院咋, 無啦啦話我知要全身麻醉做手術, 仲要簽名承擔手術一切風險實在太過突然, 我即刻勁掛住屋企, 勁掛住屋企3個小朋友, 忽然好怕再見唔到佢o地, 眼淚真係忍唔住係咁流, 但o黎到呢個地步都無得揀, 我只能一邊喊一邊簽字同意做手術!!!

由於係緊急手術, 有咩大事都係用呢個手術室, 所以要排隊, 但醫生都唔知要排幾耐, 只能等手術室有位後再通知!

之後, 我就坐上輪椅由姑娘推出醫生房!! 剛好老公同媽咪連BB都番番o黎, 我就話佢o地知醫生斷症結果!!

由於完全唔知我要等幾耐先有得做手術, 於是就叫姑娘安排間房俾我餵埋最後一次人奶, 之後媽咪都應該要抱BB番屋企先, 醫院呢d環境始終唔適合BB留係度...

麻醉師到

埋身餵奶期間, 麻醉師o黎同我講手術風險, 由於我表明我要餵人奶, 所以麻醉師都好好, 話會安排一隻對餵人奶影響最少o既麻醉藥俾我!! 其實佢都有俾我揀半身麻醉, 但半身麻醉醒後有機會出現頭暈頭痛, 對照顧BB無咁好, 所以我最後都選擇全身麻醉!!

由於麻醉師咁快出現, 我一度以為我好快可以做手術...

但原來麻醉師只係要提早預備麻醉藥份量, 所以先咁早問我高度重量等資料!! 生完BB我都未磅過, 呢日上磅, 53.4kg, 原來我差1-2磅就同我未有B前一樣咁重喇, 呢胎果然重得少, keep得好fit呢... (^^!)

餵完人奶, 媽咪先抱BB離開, 再叫剛好o係威院附近o既弟婦幫忙買奶粉, 奶樽同奶泵! 唉, 有時真係唔到我唔認命, 我生第3胎再有信心全埋身餵奶又點? 意外就係意外, 再緊急o既情況就算再唔願意都無得揀, 呢晚我唔係度, 妹妹始終要食奶, 我亦始終要泵奶去掉...

媽咪走後, 老公就繼續留o係度陪我!! 可能同產科病房唔同, 呢度病人比較少, 非探病時間老公子留o係病房內陪我, 只要唔太阻人姑娘都唔會即時趕走!! 5點半至7點半探病時間, 由於怕流血, 左手打左點滴, 我連床都唔太敢落, 突然入院我又無物資係度, 我同老公子真係只有你眼望我眼, 悶悶咁係度等, 等通知做手術!!! 而我心情比較激動, 特別一諗起屋企o既小朋友就忍唔住喊, 好掛住佢o地...!!!

無了期地等

可惜, 7點半探病時間完喇, 始終未有消息, 老公子再留係度等都無咩用, 之後叫佢去食飯先, 我就問姑娘借奶泵泵奶...

老公子食完飯, 見再等都無咩用, 於是叫佢先番屋企等我電話...

9點, request要借o既奶泵仲未借到o黎, 但我已經好谷, 所以只好叫老公子再行一轉o係屋企帶剛買o既奶泵拎番o黎病房俾我用!!!

N年無用過奶泵, 左右各pump 15min重共有5安, 唔知算多定少呢??? 可惜多又點少又點, 個pump都未消毒, 妹妹又食緊奶粉喇, 我pump完只有倒去toilet, 真係好無奈...

襯老公子係度我去toilet, 雖然已經超過12小時無飲水, 但唔知點解好多尿去...可幸塊墊唔算多血, 始乎出血情況已經好輕微了!!

10點, 老公子番屋企喇, 再等都無意思, 而我就靜靜嘗試訓覺!!! 了解我都知我好難入睡, 特別係o係陌生地方, 但唔知係咪呢一日實在太驚嚇太突然, 我已經有d筋疲力盡, 我竟然好快訓得著...

呢種無了期咁等o既感覺, 其實10日前生B前都出現過, 不過上次o既等待係既驚且喜, 今次o既等待係充滿無奈...

做手術了

11點半, 姑娘拍醒我: 做得手術喇!!! 快d除衫除褲著袍~~

我心諗: 真o架? 太好喇!!!

之後邊打電話通知老公, 再去個toilet就除衫著袍, 再由輪椅推到手術室!!! 一路推我就一路問姑娘手術係點, 原來手術過程好快, 順利o既話大半個鐘就可以完成, 聽姑娘同埋推住我位姐姐語氣, 呢個手術其實好少事, 完全唔使擔心!!! 聽完佢o地語氣, 我先開始無咁擔心, 手術風險似乎都唔大吧!!

去到手術室我訓上床, 手術室醫生先俾暖被我蓋住以防凍親, 之後就有醫生 (應該係麻醉師吧!) 主動叫我唔使擔心,  話麻醉藥份量唔多, 基本上做完手術到我第二朝出院時已經可以埋身餵番人奶!! 之後再等o左一陣, 推我入手術室倍姨姨見我眼濕濕就安慰我, 話手術室其實唔可怕, 叫我唔使被電視劇集嚇親, 呢位姨姨真係好nice, 好多謝佢安慰!!

再等o左陣, 一位望落比較senior o既醫生o黎對我名同問我知唔知自己要做咩手術, 之後就同另一兩位醫生推我入手術室!!!

訓o係度被推入手術室o既感覺真係好奇怪...覺得自己真係好似怕緊電視劇咁, 不過呢D經驗真係唔試好過試!!!入到手術室, 同係電視睇到o既一樣, 上面有幾支有燈, 遠處有個鐘, 時間係12點半...之後醫生們就俾氧氣我聞, 叫我大力吸, 吸o左一陣, 醫生話我知醒後我會覺得喉嚨有啖痰同少少喉嘴痛, 再之後就話我知要打麻醉藥, 我好快就會訓...

麻醉藥一打, 手背涼涼o既, 之後我就訓著o左...

訓醒喇!!! 醫生叫我名, 叫我起身, 我就好似訓醒一樣, mark大眼望, 我已經唔o係手術室, 我試圖轉下個頭, 郁到少少, 但又未完全轉到咁!!  之後慢慢越o黎越清醒, 醫生同我講手術順利, 我望一 望鐘1點半, 我只係訓o左一個鐘, 真係好快呢, 我亦無覺得身體有任何唔妥唔舒服, 係喉嚨真係有啖痰咁, 講o野唔係太清楚, 我試圖咳下清下舊痰, 但被醫生叫我唔好, 咁樣反而會咳傷喉嚨!!

之後醫生幫我檢查一下出血情況, 雖然我feel到pat pat位有血, 但醫生話OK, 無乜血, 仲話我知我已經可以正常飲食, 第二朝好快可以出院, 之後我就好快被姨姨推番我上婦科病房喇!!!

手術成功, 可以出院

上番病房, 我自己唔太敢落床, 唔知係咪藥力未過, 我2點訓到4點幾, 之後先起身泵奶!!! 泵完奶叫姑娘幫我倒o左去之後就繼續訓, 訓到朝早7點老公打o黎先醒, 我先話俾老公知我好快做完手術, 仲應該好快出得院!!!

7點半, 醫生巡房, 醫生幫我襟肚檢查同望一望無再出血, 之後就話我知刮宮刮到20g疑似組織, 聽語氣算幾多, 但佢o地都要拎去化驗先確實到係咩!!

我: 係咪因為子宮feel到有物體係度, 所以身體就不斷供血落子宮做成大量出血?
醫生: 無錯!!
我: 咁而家刮乾淨係咪就唔會o架喇?
醫生: 係呀!
我: 咁我而家係咪都落得床食得o野o架喇?
醫生: 係呀, 落得!! 你陣間 就可以出院o架喇!!

之後無耐, 有個senior o既醫生再聽番頭先位醫生覆述番各病人病況!! 我聽到醫生講我個case時聽到'Heavy Bleeding','urgent', 'anesthesia', '20g'... 似乎我情況真係幾緊急咁呢...諗番轉頭我流咁多血都無血壓唔正常或頭暈, 都算好彩!!!

醫生之後再特登行o黎叫我坐月暫時唔好補身住, 唔好食d太行氣活血o既o野, 同再一次confirm我可以即時埋身餵番人奶後, 我真正安心喇, 我似乎無事喇!!!

之後早餐到, 我一口氣食晒落肚, 因為我24小時無食過o野喇!!! 之後我見到位姑娘好熟口面? 咦, 原來件以前同樓o既樓友!!!!

樓友: 咦, 你做乜事係度?

之後我就講我發生咩事!!!

原來樓友o係呢間醫院做o左好耐, 產後房都做過, 但我生3胎一直都無遇到佢, 偏偏今次唔係生B入院先o黎撞到, 真係唔知應該開心定唔開心!!

忽然見到識人, 心情都靚番, 佢幫我拆埋點滴後我終於行動自如, 去toilet見到無乜血我成個人開心番, 行得走得身體好似無乜唔妥, 我亦換番乾淨o既衫褲等文件出院!!!

出院了

終於, 文件齊喇, 老公子都到!! 姑娘都笑我歸心似箭, 咁緊係啦, 趕住番去埋身餵奶呢!!

臨走再同樓友打聲招呼, 我講笑話咁都撞番都唔知應唔應該合照, 佢就話: 都係等係街撞到先再影相啦!! 無錯呢, HAHA!!

之後交錢拎藥, 浴血驚魂24小時盛胃$200, 之後要食足一星期抗生素!

打的番到屋企10點, 回想番過去24小時, 真係好似發o左場惡夢咁!!!

估唔到生完B都會有手尾跟, 忽然之間諗起生BB要搵命搏呢種講法, 我仲成日覺得自己好彩, 生3胎都好順利, 但估唔到生完都仲會出事, 對呢個講法體會忽然深o左...

至於點解會發生咁o既事?? 我都真係唔知點解，可能助產士當時無檢查清楚? anyway, 唔發生都發生o左, 原因唔再重要, 最重要我已經平安好番, 可以番番屋企見番三個小朋友!!!

番到屋企好開心, 即叫陪月幫我煲薑水沖涼, 因為我成腳仲有血跡, 所有衫同外套即刻洗, 褲同鞋襪無法子洗唯有掉o左去!!!

可能屋企最舒服， 我個人終於放鬆, 感覺真係有點虛脫!! 講o野有氣無力, 好眼訓, 比生完B出院o既狀態更差!!! 而家感覺又要由頭再坐過月咁, 又唔可以咁快補, 似乎有需要請多半個月陪月呢...最後一次坐月, 點都要休養番好個身體呀!!!

經歷o左今次, 我覺得我都唔可以成日當自己鐵人, 係屋企成日行o黎行去執頭執尾, 我真係要愛鍚自己多少少, 坐多D訓多D, 做少一陣鐵人,學朋友話齋, 坐好埋個月等自已可以'重生'先得喇!!!!