第四十四周 (16/3 - 22/3): 乖豬10個月大, 唔肯食人奶喇...不過就好似肥番d!!

今個星期對我呢個'奶媽' o黎講, 其實心情真係好複雜, 因為乖豬忽然間夜晚唔肯再埋身食奶喇...

第一晚唔埋身時, 我點夾硬攬佢埋身佢都唔肯食, 就算開口都係咬我時, 我真係好hurt, 眼淚忍唔住流...但個心一方面安慰自己, 可能係因為佢一埋身就咬我俾我話, 之後嬲我所以唔肯食o者...結果, 開o左4安奶粉佢食到訓著, 拎走奶樽喊時我夾佢埋身, 佢食番呢, 咁我都無咁驚...

第二晚, 乖豬又再次唔肯埋身, 又係一埋位就係咬我...唉, 有o左尋晚o既心傷感覺, 諗住今次我唔會再咁大反應忍唔住流淚啦, 點知都係好hurt, 餵完奶粉後乖豬又喊, 但今次佢未訓到迷糊, 所以無好似之前一晚咁肯埋身喇...

第三晚, 我睇化喇, 乖豬又係一埋身就咬我, 我都費事再同佢搏鬥喇, 索性早D餵奶粉算數...我認輸喇, 轉埋晚餐做奶粉啦!!!

至於幾日o既朝早, 乖豬可能實在肚餓, 所以埋身又無問題!! 但係, 我自己知自己事, 每日餵得一餐, 但我都係無谷奶感覺, 似乎真係所餘無幾, 乖豬朝早肯啜, 都啜得耐過以前, 可能我真係收奶中, 佢要變番好似初生時咁啜極耐先夠佢唔餓呢...

"雖然自知'退休'o既日子不遠, 但連續兩晚Koey忽然唔肯再埋身, 我還是不能自已地感到很傷心...10個月了, 實在不捨...唉, 我要失戀了!!!"...

雖然真係一早有心理準備快要結束人奶生涯, 但估唔到係我主動轉奶粉前乖豬先拒絕埋身, 真係有d突然...不過無法子啦, 始終都會結束, 況且食番奶粉乖豬真係肥番, 中碼片本來貼得近過1 o個個位, 而家要貼2號位, 相信遲D可以轉大碼呢, 所以轉奶粉其實都係好事!!!

講完食奶, 今個星期乖豬10個月大喇, 繼續周圍爬, 亦越o黎越懂事, 我行開行埋越o黎越少喊, 好好!! 不過亦開始對周圍好奇, 成日指住呢樣o個樣叫, 好似想我o地話佢知係乜, 又或者想我o地拎俾佢玩, 仲開始識走去木床床尾係D木欄中間伸隻手去開我個梳妝台櫃筒添, 開始要教佢邊D搞得邊D唔搞得喇!!! 另外, 由於佢開始識手指指同出聲表達自己, 而家tum佢訓覺前佢必定叫我扮公仔TUM佢, 唔俾我停, 我一扮佢就會好興奮FING晒手手腳腳, 真係無佢咁好氣但又覺得好搞笑呢!!!

而家仲係3奶2粥, 訓覺時間好似短番, 可能力旺盛啦, 如果朝早8點起身, 多數唔訓朝早o個覺, 要1點先訓, 傍晚o個覺就多數訓9個字, 唔似之前咁會訓個半鐘!!

17/3: 今晚帶乖豬出席姊妹o既生日飯局, 對上一次佢仲係5個幾月人仔, 出街又要就餵人奶好麻煩, 今次佢食粥仔, 真係方便D, 而家佢又大個左, 無咁扭計, 食完粥仔仲好開心坐係high chair度周圍望人笑, 表現唔錯!!!

得戚到暈!!

18/3: 星期日難得唔使'應籌', 今日放低乖豬俾我爸媽, 我同老公子去o左拍拖踩單車!!! 

原來而家租車要$90, 超貴呀, 加上今日太陽勁猛, 我差D想打退堂鼓, 好彩最後都係決定踩咋, 因為一路都背住太陽, 所以唔係太曬, 加上今日天氣真係一流, 拍拖踩單車令我同老公子好似番番去以前拍拖o個陣咁, 所以今日真係好開心!!! (一路上我同老公子都係度諗, 有無可能帶到乖豬一齊踩呢?? 明明記得以前D單車會有人加個竹o既BB椅掛係車頭載BB, 而家好似唔見喇, 應該係安全問題呢...)

大霧o左幾個星期, 今日難得風和日麗, 更難得係可以同老公子二人世界, 真係好開心!!

我打電話叫我妹係屋企zoom去水警機地, 白色塔仔下面個紅點就係我同老公子喇!!
(呢度好似睇唔到, 我係電腦睇相放大就見!)

科學園, 見到好多爸媽帶住1-2歲BB踩BB單車, 我同老公子都wonder佢o地係點樣入到o黎咁遠?

o係大圍還車後老公子帶我去食o係openrice見到0劣評o既食肆食雞脾飯, OK啦!

由於已經2年無踩過單車, 是晚我雙腳超痛呢, HAHA!!

踩完單車番去我媽度接番乖豬, 一入屋就見 到...

怪獸公司阿Boo??

原來grandma幫乖豬紮孖辮呀, 我第一次見佢呢個look咋, 忍唔住猛話'好得意'...HAHAHA!!!

Grandpa幫乖豬影, 呢個pose好搞鬼!!

20/3: 今日乖豬10個月大, 但同時亦第一次小病, 因為佢今日猛打乞嗤仲流鼻水呀, 好彩除此之外就無乜特別, 希望佢快D自己好番唔使睇醫生!!
今周其他精選相:

呢張個樣好大個!!

因為佢最鍾意o既grandpa唔抱佢, 所以扭計!

我老公子好鍾意呢張~~~

傻妹!