第四十二周 (2/3 - 8/3): 乖豬飲番奶粉喇~

今個星期活動能力又高左, 動作快o左, 學識企係度後扶住慢慢跪低再坐番落地, 可以形容為'跳跳紮'o左, 連跌親都無以前咁易喊呢!!!

而家乖豬好清楚咩時候Hello 同Bye Bye, 好多時唔使叫, 只要場景o岩(e.g. 見到爸爸出門口番工), 佢就會自動做Bye Bye, 不過好多時都係等關o左門, 對方消失後先做, 所以人o地多數睇唔到, haha!!! 另外, 今個星期仲開始識手指指, 見到有o野想要或想叫人就會伸手指 (不過係五隻手指一齊指, 所以有時都係估估下佢指咩!) 同出聲叫, 示意想要某d o野, 有時佢拎住D玩具又會望實你伸直晒手好似想俾個玩具人咁, 但多數都唔係真係俾, 似乎只係想話俾人知佢有玩具玩!!

由於理解能力明顯進步緊, 而家佢明白我行開行埋只係'一陣', 所以我一離開playmat唔陪佢佢都少o左喊, 多數只會爬去playmat網邊坐係度, 好似等緊我番去陪佢咁, 有時我真係行開太耐佢先會喊, 所以而家我煮粥仔整o野都唔一定要等佢訓o左先做到, 都幾好!!! 不過呢, 如果我陪乖豬係playmat, 佢依然係好癡身, 成日扶住我企, 或者撲向我跳跳跳, 硬係要係我身邊tum tum轉...

訓覺方面, 上星期有幾日朝早玩到攰自己hup著後, 今個星期又試唔肯訓, 好多時由7點幾捱到1點幾先訓, 真係越大越好精力...好彩而家佢無咁癡身, 所以佢唔訓我都可以煮到粥仔(以前要等佢訓左先整!)!!

講o野方面, 成日MAMAMAMA, BABABABA就少D, 搞到老公子成日都叫佢叫BABA, 不過, 其實我覺得乖豬識叫爸爸/媽媽喇, 因為我留意到佢多數見到我會'Ma', 見到我老公就會'Ba'...唔知係咪真係識呢!!!另外有時仲會lalala同rarara, 一連串咁講o野時好似講緊法文咁, 好得意!!!

最後, 今個星期仲有樣好重要o既事, 就係我呢個奶媽終於要退落o黎喇...事緣去影完studio相後, 我屋企個個都話乖豬好瘦, 唔著衫瘦到睇到心口D骨,而我自己亦心知呢個幾兩個月奶量真係不斷下降緊(我個人覺得係我M到番之後就奶量不斷下降...), 所以我終於都的起心肝買番罐奶粉, 代替2點幾餐人奶...雖然餵少o左餐, 但唔知係咪遇著M到, 我奶量少到相隔12小時先餵一次都好似無乜咁, 睇o黎我距離真正'退休'o既日子不遠喇...唉, 方便o左咁耐, 而家又要開始洗奶樽沖奶粉, 真係好唔捨得餵人奶o既方便, 不過乖豬呢排出牙有時會咬我, 我又好似無想像中咁唔捨得餵人奶o既日子, 心情好矛盾呀!!!

2/3: 上次影唔成studio相, 一直心思思想快D book另一間影, 因為好怕Koey個樣再大D會好老積(貪佢而家未有牙!!), 又怕佢到時識企識行難控制,見facebook有blog友影o左My babyface studio好似幾靚, 咁佢又未full booking, 於是就即刻book o左!!! 當日去到乖豬剛訓醒, 所以精神OK, 之不過始終係陌生地方, 乖豬除o左Family Pic心情係OK外, 4個單人造型影全部都扭計喊, 成日要爬番o黎媽媽度, 我同老公子整古造怪好難先笑少少, studio又熱, 搞到我同老公子出晒汗!!!

D相都幾靚, family pic係最好, 其實如果再影下次, 就咁影family pic都夠, 造型相無乜特別呢!!!

Family Pic造型無得影獨照, 番到屋企補影番~~最鍾意頂cap帽!!
條牛仔裙係3-6個月size, 短少少, 但仲o岩, 可見乖豬真係幾瘦!!!

3/3: 經過9個月全人奶, 終於俾番奶粉乖豬食!!!真係大日子~~~~

俾爸爸操刀~~

4/3: 今日grandma幫乖豬剪頭髮, 剪完好傻更更, 仲好似更加似我 (本來已經好似...)...HAHA~~~

自阿女剪o左劉海後, 我就成日覺得望住細個o既自己咁...
乖豬個樣真係好大個, 而家呢個樣似我1歲時呢!!

自己飲奶~

其他精選相:

春天成日大霧雨紛紛, 難得今日有少少太陽, 即帶乖豬落公園仔!!

新髮型好精神爽利呀!!!