難題: 邊個湊? (回顧第5wk)

9/24/2010 (~5wk)

尋晚去o左爸媽度食飯, 終於講左我有o左o既消息俾佢o地知!!!其實未講之前我勁緊張呀, 因為真係好怕陪唔到佢o地去旅行佢o地會失望!!!

好彩, 佢o地o既反應話我知我擔心係多餘, 因為好明顯佢o地覺得: '傻啦, 有左當然唔方便去!!' , 咁我都安心d!!!

一貫地, 爸媽同細佬反應如預計中冷靜, 不過爸爸忍唔住猛叫我唔好咁大動作, 聽我講番世博d旅程時又猛叫我小心呢樣o個樣, HAHA~~~大家都好關心我, 忽然覺得做大肚婆原來真係要風得風...haha!!!

落樓時撞到我妹, o岩晒, 講埋佢知, HEHE, 而家我屋企人知道晒喇, 唔知佢o地對自己快升le感覺如何呢???hehe!!!

=====================================================

中秋同老公提議, 不如早d同老爺奶奶講, 咁我今年就可以勉疫唔使再陪佢o地行公園行到點幾兩點先走得 (仲要俾人嫌早走!!), 點知老公話唔好, 話都係等照o左BB健健康康先講喎...

結果, 今年中秋我又要捱夜捱到3點先訓得, 陰公呀BB!!!

尋日中秋假期, 同媽咪爸爸食lunch, 媽咪問我BB邊個湊, 我答俾佢湊, 點知佢話'湊完你o地三隻o野我都殘晒喇!!!'....

嗚...

我如意算盤終究打唔響喇...本來我覺得我媽肯湊, 咁而家我番工好近, 我爸番工放工駕車接BB去媽咪度再接我番工放工極方便, 咁就唔使請工人又大條道理唔俾奶奶湊, 本來極perfect嘛...

唉, 其實都估到媽咪未必肯湊, 因為媽咪一向身體麻麻, 成日頭痛氣虛, 仲有類風濕關節炎...但要知道我一定唔會俾BB奶奶湊(因為我一向唔多喜歡奶奶同埋奶奶身教好有問題!!), 咁即係我只係得番俾工人湊或者我自己湊呢2個選擇!!!

但其實我同老公子都唔鍾意屋企有外人訓, 而且本來我打通書房睡房門, 就係諗住BB第二時訓覺可以sense到我同老公子係度, 訓得安心d, 到BB2-3歲先改番度門都未遲, 但如果真係請工人, 咁度門一定要我生左後即改, 失去我本來打通房門o既願意, 我又唔多想...唉...

雖然而家好似仲有好耐時間諗呢個問題, 但朋友又話要請工人應該早半年請定, 咁即係我三個月後就要決定喇, 好似好快咁...我仲未準備好...

唉...呢個真係世紀難題呀!!!! (按: 而家14wk, 我仲未同老公傾好呢個世紀大難題, 好多朋友都催我要快d做決定...)