身體變化 & 太過操勞 (回顧第5wk).

9/19/2010 (~5wk)

o係上海最後一日我同老公子去o左書城, 我揀o左兩本書, 希望佢o地幫到我呢個新手啦!!!

右: 主要係講點樣去照顧bb, 由bb 0至1歲每一日咁寫, 內容都幾細心, 好似day 1講生o左後媽媽有失落感係因為荷爾蒙影響, 所以唔使擔心, 俾番d安全感媽媽, 到day 2講媽媽奶水, 點樣餵母乳等等, 對媽媽新手應該好有用!!!

左: 呢本就係講bb 由0至3歲o既腦部發展, 佢係每個月一個chapter, 每個chapter會分左腦右腦, 講番bb每個月腦部發展去到邊, 爸媽又可以用咩方法或遊戲去測試bb o既發展同能力, 都好實用!!!

尋晚開始, 老公子話會陪我每日睇2篇上海買番o黎o既BB書, 我覺得好心甜呀, 希望真係做到!!! (按: 今日係14wk, so far我o地兩公婆越o黎越懶, 差唔多每2星期先睇幾篇...)

==========================================================

9/20/2010 (~5wk)

今日book o左私家婦科診所o既產檢, 本來問o左一兩個朋友, 但佢地睇開o既都係油尖旺區, 我覺得太遠太唔方便, 於是最後都係上網搵番自己住呢區o既, 咁o岩見到有人推介某女醫生唔錯, 咁就book o左下星期六 (自己估計大約7wk), 希望到時唔使等好耐就有得照, 希望見到心跳同唔好撞到熟人!!!

============================================================

 9/22/2010 (~5wk)

太過操勞?

由有o左到而家只係短短幾星期, 我己經去o左兩次旅行(9月初台南, 9月中上海), 咩魚生蝦蟹(我知蟹真係唔掂得, 但去到上海咩都係蟹粉乜乜, 蟹粉物物, 我只能盡量避, 但我懷疑唔多唔少都係食o左d...)濃味o野都食晒, 淋雨暴曬跑跳碰都做齊...

9月4@ 墾丁, 諗番轉頭, 當時乖豬已經係我肚度喇!!!

有時我都會擔心, 我咁操勞法,bb會唔會有影響o架???

不過, 其實我去台南時都未check到係咪有o左, 咁o既情況下就係朋友面前將以前不嬲都食o既o野全部唔食又真係好怪, 奶奶煲涼茶我唔飲但又唔講得點解真係好為難...

而家, 我暫時都未會同奶奶講住, 諗住等多幾星期去照bb睇到心跳先正式同奶奶一家報喜!!!

至於我自己屋企, 本來我都係諗住照到心跳先講, 但而家應該要提早(可能聽日講!!!), 因為一年前細佬女友幫我o地買o左air asia d平機票10月中飛泰國, 但我同老公子相量過, 決定唔去喇, 所以應該盡快通知佢o地, 等佢o地可以改到行程同轉酒店(因為佢o地己經book o左3房apartment酒店喇)!!!

至於決定唔去泰國, 其實我都好為難, 但考慮過

1.而家我剛有o左去旅行都咁辛苦, 過多一個月再去應該仲辛苦...
2. 個肚始終都未穩定, 2個月內飛3次飛咁密始終唔好...
3. 平價機票係要夜晚11點去到深圳機場, 到泰國時係凌晨, 對我o黎講可能真係太頻撲...
4. 去到泰國咩魚鮮蝦蟹同我最愛o既冬陰公都唔食得...

唉...所以我最終都係決定唔去喇, 希望爸媽細佬同佢女友會諒解我, 唔會覺得我太掃興啦!!! 

=========================================================

另外,呢個星期仲留意到以下身體變化:

肚脹: 今個星期踏入第五周, 個肚反而無去上海時咁脹, 之前我仲以為自己點解咁快個肚咁大, 原來只係個胃脹住, 今個星期個肚唔脹, 特別係一朝起床時, 感覺好似唔多實在, 連自己都諗, BB係咪真係o係入面o架??真係好想快d去照BB!!!

肚餓: 我而家肚餓會好辛苦, 以前餓咪餓囉,打一陣鼓可能就會過左最餓段時間, 而家肚餓, 我個肚好似餓到快凹咁, 辛苦到想發脾氣, 我覺得我以前唔會咁o架, 原來大肚婆真係唔餓得!!!

腰骨痛: 而家行太耐會腰骨痛, 要知我去上海幾日真係由朝行到晚, 我條腰每到下午就開始痛, 比著以前唔會咁o架, 以前行極咪最多腳支力, 邊會腰痛喎!!!!