孖胎迷思 (回顧第6W)

28/9/2010 (~6wk)

以自己估計的排卵日計算, 今日只係6W1D, 但係, 我覺得我已經'見肚'喇...

咁快?錯覺吧???

我都唔知係咪錯覺, 但小腹的確明顯地凸o左出o黎喇, 著闊身衫仲免強唔覺, 但其實細心睇, 都會覺得肚仔係貼住件衫呢!!!

當然, 肚凸可能用胃氣脹有關, 不過咁快凸真係難免會令我多o左d聯想...

唔通我肚內多過一個BB???

其實我有呢個迷思一d都唔奇, 因為我媽咪都生o左我細佬妹呢對龍鳳胎, 咁我遺傳佢排卵多過一粒都唔出奇嘛...

會唔會唔止孖, 會係三胞胎???

係o既話我老公就大件事, 因為如果真係生三胞胎, 我同老公子都覺得我只能夠resign做全職媽咪, 因為無可能請到工人湊三個...咁老公就要一份糧養起5個人(未計供養兩邊父母!!), 咁我老公就真係大鑊...(不過我就夢想成真, 終於做到全職媽咪!!!HAHA!)

...

haha, 發夠夢喇, 星期六就可以開估我肚凸究竟同肚內有幾多個小朋友有無關, 好心急, 好期待呢!!

(P.S. 可能我實在太恨生孖胎, 日思夜想, 我發夢第一次照超聲波見到自己陀3胞胎, 仲要已經睇到有1男1女另一個遮住睇唔到!!!!醒後我好開心, 因為一次過3個生一次搞掂, 仲要有男有女...講俾老公子聽呢個夢, 佢話我: 你都傻傻o地...)

2/10/2010 (~6wk)

終於等到第一次同bb見面o既大日子喇!!

我o地book o左10點9睇, 10點7, 8個字去到, 等o左15分鐘左右就入去見醫生, 比想像中快呢, 因為上網見好多人係巿區睇都要等成個鐘先有得睇o架!!!!

入到去, 醫生好詳細咁問對上一次m到日期同第一次驗到o既日期, 之後就去照bb喇!!!

好緊張呀, 會唔會真係咁好彩, 多過一個bb呢???

照到喇照到喇!!閃下閃下, 係心跳呢!!

初步估計bb大約6w3d, 上面兩個十字之間就係佢喇!!
估唔到, bb只得0.618cm, 但咁快就令媽咪咁辛苦, 食唔安訓唔落呢!!!

醫生: um...暫時只見到一個bb...

我: o下...

醫生: 做咩o野, 你好想兩個咩?

老公子: 係呀, 佢好想多過一個呀!!

醫生: 點解咁想呀?咪制呀

我: 因為我媽咪生o左對龍鳳胎...即係我細佬妹係龍鳳胎o黎o架!!!同埋呢排我見個肚好似好快凸, 於是咪成日諗係咪多過一個囉...

醫生: 哦, 你咪制呢, 你媽咪係冒o住生命危險生你細佬妹出o黎o架!!

我: 噢...

 

老實講, 知道真係得一個, 唔多唔少有dd失望o架, 因為我成日覺得我比好多人應該大d機會生孖嘛...

不過,今日終於見到bb, 點都係開心多過失望o既, 而且仲咁順利見到bb心跳, 即係bb好健康啦, yeah!!!

醫生之後寫o左3封信, 一封for我去威院, 一封for 健康院, 另一封就係for 公司o既, 之後就約定2星期再同bb見面, yeah!!!

離開診所, 問老公子見到bb心跳有咩感覺, 佢話 '無咩特別咋喎!!!'....噢...不過其實問我呢, 我都唔算太大感覺, 覺得得意多過感動...嘻...

唔通要等到bb大到識踼, 我同老公子先真係feel到我肚內確確實實有個小生命係度????