害喜加劇, 好辛苦! (回顧第7W)

4/10/2010 (~7wk)

今朝9點就去o左威院排期...以為只係登記好快搞掂, 點知都要搞到10點幾, 好彩OSCAR 有位, 暫定11月8號去check,而第一次產檢就係12月頭, 嘩, 到時都4個幾5個月肚lu...

============================================================

我知...我知自己身體係變化緊, 所以感到不適係好正常...

之不過...

真係好辛苦呀, 呢幾日我無再飲奶, 個胃的確無咁脹, 但o個種腸胃不適而囉囉孿o既感覺真係令我好辛苦, 我妹尋日見我, 忍唔住出聲叫我唔好成日皺眉頭...

我都知, 我應該要保持心境開朗, 但個人真係好唔舒服呢...我都唔想皺o架...

呢幾日, 肚餓同飽o既感覺令我覺得好混亂...明明呢頭食飽個胃頂住, 但轉個頭, 竟然出現肚餓o既感覺...咁快餓?會唔會誇張o左d...

OKOK, 收到, 食d o野啦....攝完牙lar...點解仲係餓呀...help...

我係咁餓, 咁我好易變肥C9喎...但唔食, o個種餓o既感覺又好辛苦...

help...

另外, d人話大肚會訓得差, 本來早兩星期仲好地地, 但呢兩日忽然真係訓唔到, 都唔知係天氣轉涼定真係關我大肚事...總之, 呢兩晚我都訓得奇差, 好似無訓過咁...

真係好辛苦呀...但而家應該只係開始咋...

===========================================================

8/10/2010 (~7wk)

尋晚係有左後第一次因為太辛苦太唔舒服而喊...老公子好溫柔咁又鍚又呵, 但真係好無奈, 心理上o既安慰點都敵唔過生理上o既唔舒服...

有時都覺得自己好似好可憐咁, 明明大肚係應該開開心心, 但我真係自有害喜出現後, 眉頭一直都緊皺, 無一刻試過開懷歡笑, 唔知咁樣, BB第二時都會好似我咁, 變左舊忟薑...

===========================================================

9/10/2010 (~7wk)

一年前9號風球發現屋企窗台滲水, 一年後管理處終於安排人o黎塔棚維修...

um...大肚好似唔可以裝修屋企喎????

但等o左一年先整, 如果唔整, 再漏水點算??等到我生後管理處都唔知仲會唔會幫我整...

於是, 我唯有一早避席, 去我媽度玩電腦, 希望今日內可以搞掂個窗台, 屋企唔好俾D煙塵整到污污漕漕就好喇...