害喜反應中的一點甜! (回顧第8W)

11/10/2010 (~8wk)

以往, 我成日覺得自己老公子硬係唔及人o地d老公咁細心體貼, 但唔知係我有左後定點, 其實我係睇到老公子正在進步o架!!!

自從害喜出現後, 老公子就差唔多肩負起所有家務, 睇住老公子好專心咁抹地, 唔知點解覺得好感動, 覺得辛苦o左老公子(咁...其實佢以前會唔會覺得我抹地係辛苦o左老婆子呢??), 但同一時間又覺得老公子好鍚我, 覺得自己好幸福呢!!!

===========================================================

12/10/2010 (~8wk)

今日發現大學同班好朋友原來係我戰友, 佢個肚大我5wk, 好興奮!!!我忍唔住即刻係佢blog留言話佢知我都有o左, 好期待佢回覆我, 因為我真係好開心好開心有個好朋友同我經歷緊差唔多階段o既o野, 覺得好似多o左個戰友咁!!!

夜晚, 好朋友真係打俾我, 第一句就係'恭喜', 我都好開心回敬番句'大家咁話', haha!!!之後大家傾o左半個鐘, 大至都係分享大家懷孕後o既感覺同感受, 我同佢d感受同感覺都好相似!!

有個同道中人一齊分享經歷真係好開心, 至少, 我知道我唔係一個人, 害喜幾辛苦都好, 仲有好多人同我一樣, 努力咁忍受, 學做好媽媽!!!

===========================================================

14/10/2010 (~8wk)

上星期開始, 發現我好似有d唔鍾意食魚....

其實之前都係懷疑, 但尋日番我媽屋企食飯, 聞到我媽蒸魚陣味, 真係好想反胃呢...

好彩, 食都仲食得入口, 未至於要嘔, 但如果有得揀, 我似乎真係無咩意欲想去夾魚食...

唔食魚唔得喎但係...噢賣葛!!!