Oscar test (回顧第11W)

8/11/2010 (11W6D)

終於等到去威院做oscar o既日子喇!!!

因為好多人都話好彩o既話, 只要姑娘/醫生好人, bb個pose又靚仔o既話, 會有機會見到bb性別, 加上oscar test係檢查bb健康o既一個重要測試, 所以我一直都好期待今日o既來臨!!!

希望:

1. 遇到個好醫生 (但原來係姑娘照o既,唔係醫生!)
2. bb要擺個靚pose, 唔止for度頸皮, 仲要俾我o地清楚睇到性別
3. bb要郁俾爸爸睇 (因為我問老公子期唔期待見bb, 佢竟然話其實佢無咩感覺, 因為到而家都好似好唔實在, 好似仲未肯定bb係度咁喎~!!!所以我好想老公子睇到bb郁, 等佢感覺到一個小生命真係o係老婆子我肚入面!!)

下午o係公司食埋個午飯就帶住興奮o既心情出發去威院!!!約o左2點15分, 我同老公子差唔多2點10分到達(但老公子無時間食lunch, 好可憐!!), 時間剛剛好!!先去度高磅重, 重量同一星期前去健康院一樣, 但身高矮o左1.7cm...

之後等o左15分鐘左右就有得入房照喇!!!姑娘好似都幾好人, 佢話bb個pose好似倒豎葱咁, 睇到佢個頭形好似外星人咁, 面尖尖, 不過呢個pose度唔到佢頸皮, 姑娘好力碌o左我個肚一陣bb都唔郁, 無法下, 姑娘就叫我去抽血, 行個圈番去先再照!!

血眨o下眼就抽完, 由於想bb郁,所以我索性行兩層樓梯上番婦產科, 之後仲去埋toilet先番去診室外等!!!除o左我o地之外, 我仲留意到有另外2 pair都係好似我咁, 照唔到要出去行一轉, 其中一pair比我o地快一步入o左診室, 點知一入就好似半個鐘, 睇呢位媽咪年紀比較大, 個肚又大, 似乎係孖胎,唔怪得照咁耐先出番o黎啦!!!

見孖胎媽咪出番o黎後我同老公子一個箭步就入去診室, 姑娘又再幫我照喇!!!

一照, bb今次係側面訓係度, 仲不斷郁手郁腳彈彈下, 好似蜈蚣彈又好似一隻蝦仔咁郁, 好得意呀, 老公子更加係第一次見到bb郁咋, 唔知佢有咩感覺呢!!!

姑娘好努力(同用力)咁又zoom又碌咁度, 度o左5-6次頸皮, 平均好似係0.118 (單位唔知係cm定mm...), 總之問姑娘, 佢話頸皮算係簿!!!至於bb身長原來己經有5.93cm, 3星期前仲係2.15 o架咋, 估唔到有長大o左咁多喎!!!最後, 有另一個姑娘(後尾先知係中大d醫科生)入o左房, 我就o係呢個時候request姑娘試o下睇唔睇到bb性別, 點知俾姑娘拒絕o左, 因為姑娘話今日d case個個都好唔順利, 佢照到手都軟, 連醫科生都叫我唔好難為姑娘今日咁辛苦, 叫我唔使咁心急, 等bb大d先再睇性別...

就係咁, 最想知o既性別暫時始終係個迷...至於超聲波相, 姑娘亦都以'唔會送'去拒絕o左我...

照完bb己經4點半, 老公子極肚餓兼趕住去機場睇清明上河圖, 所以佢就先走!!!至於我, 因為應承o左幫中文大學做研究, 所以仲要去另一間房做問卷度骨質密度同結構, 原來個study係想知vitamin d同懷孕婦女所生o既bb健康有無關係, 就係咁, 一搞就到5點半我先真正離開威院(好彩個醫科生都幾好人, 仲祝我bb生得好似我咁靚添, 嘻!!!)!!!!

wow, 足足係醫院留o左超過3個鐘先走得, 同番工一樣咁夜呢!!!

雖然今日又唔知bb性別又無相留念, 但今日能夠見到自己bb活活潑潑咁, 始終係一件開心事!! o黎緊要12月10號先再去威院做第一次產檢, 不過醫院產檢無得照超聲波o架, um...睇o黎隔多4個星期要去私家見o下bb先得喇, 我怕隔太耐我會掛住bb呀!!!