第一次政府產檢 (回顧第16W)

10/12/2010 (16W3D)

今日一個人去威院做第一次政府產檢, 因為一早知政府唔會照超聲波, 所以我都無要求老公子陪我, 亦拒絕媽咪o黎陪, 因為我知就咁等真係好悶好無聊!!

爸爸車我去威院, 點知唔識路, 仲誤行巴士專線, 俾交通警抄o左牌, 搞到我極唔好意思...

9點去到威院就報到, 一等, 就係個半鐘, 差唔多到10點8個字先聽到我個名, 當時成個婦產科呢邊都坐滿晒人, 相信個個都好似我咁, 等到hup眼訓...

入去見醫生, 後生女o黎, 個姑娘同醫生一輪咀講o左幾句就叫我訓上床, 醫生就模肚, 用胎心機聽心跳 (只係俾我聽o左幾秒咋), 聽我呼吸同檢查我條頸(唔知for what?), 成個過程都唔知有無2分鐘...

之後醫生同姑娘又一輪嘴極快咁講話威院安排o左結構俾我 (聽到呢度, 我個心笑o左一笑!!! hehe!!), 又俾埋催生張紙我 (心諗, 咁快講到催生???), 叫我到o左5月31日呢日都未生得就要入院, 早過呢日生得時都要拎住呢張去威院唔知邊度唔知幾樓...總之, 佢講得極快極趕時間, 我真係接收唔到!!!!

"得喇, 走得!!" ...嘩, 真係好趕...

好彩我都有把握機會問兩句...

1.膀胱痛!!
上星期有一日唔知係咪訓得唔好, 第二日大半日都膀胱痛!! 醫生話大肚婆係易d尿道炎, 我之後無再痛就ok, 平日記得多飲水就得!!

2. 4個月都仲係嘔嘔嘔!!!
我仲成日嘔, 由11周去健康院產檢到而家16周都未有重過,有無問題?? 醫生就話我bb size ok (佢只係按左一按咋, 咁都知size ok, 真係勁...但好難令我有信心呢!!), 所以無問題, 仲反問我就算叫醫生開止嘔藥, 我都未必會食啦...

3. Oscar報告 (其實係我見到姑娘拎定下個patient份報告先記得問!!)
醫生話無人打俾我就即係ok, 我個報告係正常...(我都知正常, 但我記得上次照oscar個姑娘好似話醫生會講番個report結果我知嘛...估唔到都係得'正常'兩個字!!!)

最後10點10個字就離開威院!!!雖然感覺威院好求其, 但今日排到政府結構真係好開心, 因為上網都見到好多人都排唔到, 連我朋友o係屯門都係無期, 我排到真係好好彩!!!又慳番一筆!!!