回顧過去,展望將來!

一年眨o下眼又過去喇,又係時候回顧過去,展望將來!!

睇番一年前o既post"回顧過去,展望將來!", 我曾為2010年定下以下目標:

1. 出年係旅行年,planned trip 已經有三個, 但我好想arrange多一個只有我同老公子o既trip,希望唔係得個講字啦!

2. 要開始還債, 儲錢方面會比較難,但希望盡力儲多d!

3. 工作方面,希望新工完o左3個月contract後會續我啦,如果唔係又要再搵...終極目標當然係搵到一份perm job啦,但我都好明白目標明確唔代表一定成功,時移勢易, 做I.T.唔俾人outsource真係應該偷笑...希望我都有可以偷笑o既一日啦!

4. 我份工咁唔樂觀,唯有寄望老公子出人頭地,2010年加薪再加薪啦!(老公子似乎已經成為我將來o既一部份喇!)

5. 同老公子繼續enjoy二人世界,一齊做多d 運動, 因為年紀大喇,再唔郁骨頭真係會硬!!

結果:

1. 一早plan o左o既三個trip, 一個係同姊妹Jenny 2pair人去西藏, 一個就係同一班好姊妹去台南, 最後就係同家人去泰國!!!結果, 西藏同泰國都去唔成, 因為Jenny同我都分別有BB!!不過呢, 我今年都係去左三次旅行, 因為我最後真係arrange o左一個同老公子二人世界o既長灘島之旅, 另外老公子又自把自為買o左世博門票, 結果又去埋上海!!再加埋一次同老爺奶奶一家去澳門同我寫遊記得獎o既豪華澳門住宿之旅, 我今年真係可謂驛馬星動呢!!!

2. 開始還債, 儲錢方面真係難o左,所以成績麻麻...!

3. 工作方面,年頭o既短contract job最終都續唔成約, 不過皇天不負有心人, o係我努力爭取同自薦下, 我終於得到一份contract長過1年o既工, 仲要番工地點極近屋企, 唔太忙又穩定, 實在係dream job!

4. 2010年老公終於同做o左6年o既公司講Bye bye, 轉o左份工, 工時比較穩定, 人工都有加, 但福利好似麻麻...

5. "同老公子繼續enjoy二人世界" <== 其實一年前o既願望並非呢個, 真正願望其實係我搵到份穩定工作就開始造人大計, 只係呢d話唔埋嘛, 所以上年無寫出o黎!!! 結果, 呢個造人大計大成功, 而家已經快5個月喇!!至於運動, 相信我老公子有做多左o既, 因為佢而家要幫我抹地洗衫...haha!!

2010年,除o左以上幾點外, 仲有一件事值得一提!就係2010無想像中咁多熟朋友結婚(當然都有, 只係無我想像中咁多!!), 反而今年下半年開始知道好多朋友都開始有BB, 大家一齊交流, 話題比以前更多, 關係忽然好似拉近左好多, 呢樣o野都算係今年o既bonus, 令我好開心呢!!!

展望2011,相信大家唔使估都知我o既展望都離唔開生小朋友啦!!!haha!!!

1. 生番個肥肥白白健健康康兼得人鍾意o既小寶寶!!

2. 生活會因為乖豬o既出世而發生大轉變, 希望我可以做個稱職o既全職媽媽, 亦希望老公子唔會因為呢個轉變而覺得生活壓力加大!!!

3. 希望放棄dream job無想像中咁肉痛, 亦希望我可以成功搭到舊同事refer一d freelance job俾我幫輕老公子!

4. 同上年一樣, 繼續寄望老公子出人頭地,2011年加薪再加薪!(老公子唔只成為我將來o既一部份, 更係乖豬, 亦即係我o地一家大小o既衣靠喇!...哎唷, 擔子好重呢..!!!)

5. 儲錢...要做全職媽咪, 少份收入, 其實都知儲唔到錢o架喇, 唯有希望努力慳錢下, 呢年都唔使運用銀行儲備去應付開支啦...

噢...2011年目標好似好少...不過, 以上目標要達成都未必係想像中咁易, 真係要好好努力呢!!

o係呢度, 都祝大家2011年更進一步!!!