生日禮物 & 第一次健康院檢查 (回顧第11W)

2/11/2010 (11W)

今日生日,雖然照樣番工, 放工都只係簡簡單單番屋企同家人切蛋榚慶祝, 老公子又無買任何禮物表示, 但今個生日, 依然係一個特別o既生日, 因為我肚入面有o左你呀, 我o既乖豬!!!!

先前post 過o既兩條托腹牛仔褲!!

依件靚靚rabbit大肚衫都係淘寶買o既!!!我, 我媽同我老公子都覺得呢條大肚裙好靚!!!買佢, 當然係因為隻閃石兔仔啦(不過都唔平呢, 要二百幾蚊!!)!!

今年好似係少有一年生日一張相都唔影...haha, 咁又點得呢, 於是就影o左呢張'一家三口'相留念, hehe!!!

===========================================================

3/11/2010 (11W1D)

尋日無請假, 今日卻請o左成日sick leave, 因為今日第一次去健康院產檢!!!

我媽陪我10點鐘去到, 一去到就驗尿, 點知驗到我有少少蛋白尿喎...姑娘叫我隔一陣睇完講座再驗!!!噢...蛋白尿唔方好野啦, 不自覺有點擔心....

之後度高磅重量血壓,血壓正常, 身高162, 重54.6kg,  ...嘩, 慘囉, 即120磅...成世女未試過咁重...比未有之前重大約5磅, 但其實2星期前仲係重o左2磅左右o架咋...原來不知不覺呢兩星期重o左咁多...再咁重法,真係不敢想像...實變大肥婆lu...

量完身高, 入o左間房聽講座...正確d講, 係睇電視影帶!!!睇完先知, 原來我留小便驗尿o既方法做錯晒...

睇完, 再用番正確方法留小便, good, 今次無蛋白尿喇, 放心晒!!!

之後等多十幾分鐘, 見姑娘, 姑娘都幾好人, 但其實都係問下對上一次m到, 父母病歷之類, 無咩特別!!! 見完姑娘再等多10分鐘, 見醫生!!!女醫生幾後生, 仲好好人, 幫我檢查乳房同模肚, 佢話好勉強好勉強模到少少脹起o既子宮, 話我因為11wk子宮未夠12wk大,所以未必可以用胎心機聽到bb心跳!!!不過, 醫生都好努力咁幫我用個機碌下腹,碌o左好耐, 可惜都係搵唔到bb心跳...噢, 始終都聽唔到bb, 有少少失望!!!

另外, 我仲問o左醫生其實bb係邊,原來o係d毛毛對上少少o架咋!!!咁...我個肚突出o黎o個d係咩?哦~~~原來係個子宮頂o左d腸上去, 所以, 我小腹突出o黎摸落硬硬o地o既其實係腸, 而我成日feel到間唔中彈一彈o既唔係bb, 只係d腸o者!!!!

最後, 就係抽血, 我之前試過捐血因為血管收縮捐好耐, 點知今次姑娘話我左手血管靚,抽左手, 快到baba聲就抽完, 真係未試過抽血咁順利, 我見隔離位準媽媽抽唔到,要兩個護士幫手, 好似好慘咁呢...

終於, 12點15分先搞掂, 估唔到唔使點等都要搞2個幾鐘, 真係耐!!!

臨走, 撞到係健康院做姑娘o既中學同學, 佢恭喜我仲問我幾時預產期

我: 5月24
姑娘: 同jodi差唔多喎!!
我: o下, 佢12月頭生得喇喎...
姑娘: 哦, 差半年o者...

haha, 原來係姑娘心目中, 差半年係好少, 但o係我呢個新手媽媽心目中, 唔好話半年, 我個好朋友戰友個肚大我5wk, 我己經覺得我同佢經歷緊o既大肚stage都好唔同喇....hahahhaa!!!!

檢查完, 約o左1月生得o既小學好朋友percy lunch兼shopping, 佢介紹o左間大肚衫舖頭俾我, 我買即買o左條大肚西褲同兩條底底, haha, 其實間o野一直都係度, 但可能唔係大肚婆啦, 我真係完全唔知成日行o既商場有間咁o既舖頭!!!!

今日同percy傾o左好多計, 又一齊買大肚o野同做師奶去超巿買食送,hehe,呢d生活好正呀, 如果真係可以唔使do就好喇!!!

===========================================================

5/11/2010 (11W3D)

早幾日'迫'老公子同我上網睇johnson's homepage個講座video, 學o左少少孕婦按摸, 於是連續幾日叫老公幫我按, 有時間就做晒全套, 無時間就就咁鍊下手、手指、背部, 唔知係咪呢d按摸真係有效, 定純綷因為老公透過按摸俾到安全感我, 我呢幾晚訓得出奇地好, 直頭係有左以o黎訓得最好o既幾晚, 唔似之前咁只能'淺睡'同成日無啦啦醒o左醒o左勁精神訓唔番, 亦無再夜尿頻頻 (可能進入深層睡眠, 都唔覺得急lu!!), 總之, 真係訓得好o左好多, 真係要多謝老公子!!!

老公子, 你要勤力d幫我按摸喇!!!勞煩晒!!!