'蝠'到!

老公子就留係屋企, 因為有人o黎拆棚(年幾之前打風漏水屋苑幫我o地維修番書房窗台外牆), 而我就落o左屋企留下會所避席(d人話有左屋企唔可以裝修, 但排左年幾先有得整, 我唯有避開唔留係屋企避一下算)!!

我番到屋企, 老公子就同我講: 好彩你頭先唔係屋企咋, 唔係你一定喊到飛起!!!

我奇怪: 點解呀?

原來, 老公子話拆棚時有一隻細蝙蝠飛o左入屋, 係書房飛o左陣企o左係書櫃頂想鑽入我放係櫃頂d鞋盒度, 雖然隻蝙蝠身得半隻手咁大, 應該係bb, 但蝙蝠喎, 黑色一舊o野咁, 都咪話唔恐怖!!!

老公子想叫拆棚d人幫手, 點知拆棚d人話唔方便幫手, 於是老公子係極驚o既情況下, 只有'殺生'...用拖鞋扑佢...佢就暈o左係屋企地上...

老公子話佢用廁紙捉起佢時佢仲郁, 好恐怖, 但無法子, 都係要將佢掉出屋外垃圾房!!

我聽到呢度, 個心好唔舒服!!!

蝙蝠呢, 佢同我o地一樣, 都係哺乳類動物, 係熱血o架, 殺o左佢同殺隻貓殺隻狗一樣咁殘忍!!! 我忍唔住眼濕濕, 想怪老公殘忍, 覺得老公子應該活捉再放生出窗外...但老公子猛咁表示, 可憐o個個其實係佢, 因為成件事實在太太太恐怖, 只係我唔在場感受唔到!!!

老實講, 忽然'蝠'到, 之後又無端端o係屋內'殺生', 咁o既經歷真係太離奇古怪, 我雖然唔算身在事件中, 但感覺還是很複雜!!!其實老公子一入門口就猛肉緊我, 話好彩我唔係屋企, 怕我喊, 我應該好開心, 亦應該可憐我老公要一個人面對古怪o既'天外來客', 只係無計可施唔敢活捉才痛下殺手...但無辜誤飛入屋o既bb蝙蝠就咁送命, 我覺得佢真係好可憐, 成件事就好似一個悲劇...

'蝠'到??係凶兆定吉兆??...而家, 對蝙蝠o黎講, 肯定係凶兆了...對不起呀...我o地唔係有心o架...