第六十四至六十五周 (3/8 - 16/8): 越o黎越有主見!!!

呢兩星期講o野進步o左, 腳腳唔再講'GAGA', 發音好接近'腳腳', 另外, '抱抱' 同 '佳佳' (唔該) 都識得用, 會唔使叫就主動講, 呢個星期尾仲試過係引導幾次下, 識識地講'佳佳爸爸/媽媽', 雖然都係斷斷續續, 但都係好開始, HAHA!!

行路方面, 越行越快, 可能信心大左啦, 有時真係亂咁衝亂咁撞咁, 仲反而易跌親D, 呢兩星期就分別撞瘀o左兩邊面, 好彩都係少少瘀o者!!! 

最後就係越o黎越有主見, 其實一向佢都有, 但而家識自己行, 就多左要求落地, 推車仔行街時亦多左指住某邊方向要行, 我地唔推o個邊佢就發脾氣, 真係激死人呢!!


7/8: 今日老公子生日呀, 生日快樂!!! 不過今日D節目好似安排俾個女咁, 似乖豬生日多過老公子生日咁呢!!

一朝起身9點幾就去游水!!

呢張好得意, 影到乖豬好肥!!

中午, 我o地出o左奧海城, 乖豬訓o左, 我同老公子可以二人世界Lunch!!! 本來今晚想同老公子食團購番o黎o既dinner, 點知full o左, 今晚食外賣算, 所以lunch就食好少少!!

風月堂個甜品真係好好味, 正!!

之後乖豬訓醒我o地就去o左playtown玩, 因為之前團購左1日通行證!!

不過場內太多人喇, 乖豬係最細個咁滯, 只可以係BB area好斯文咁玩!!!

好驚Sir滑梯!!

掛住玩好難影相, 呢張難得有笑!!

扭軚扭得似模似樣

玩o左一個鐘多D, 人好似少D, 我地過o左大小朋友玩o既地方爬左陣!

我同老公子都覺得去呢D地方可以睇到好多唔同性格o既小朋友, 有D都幾有風度, 但更多係唔理人只顧自己, 好似越大o既小朋友通常越衰!! 老公子更加話, 讀書幾好學幾多o野都無用, 出到o黎都係睇品德行先, 我都好認同呢!!

最後過番奧海城tea同影下相!

最後臨走無耐性等劉翔, 如果企左5min我同老公子可能就可以現場睇住佢跌倒...

夜晚買個tart唱生日歌, 但相機開唔到, 唯有用手機, 仲無得自拍!!!

8/8: 今日打水痘針, 乖豬越大越識o野, 由醫生聽心口開始就猛喊, 嘈住成個診所!!!

10/8: 今日約o左Wendy Tea!!

昊昊個八字眉好搞笑!!

12/8: 今日去食團購番o黎o既8度海逸酒店dinner!!

乖豬係度玩刀刀叉叉, 仲expected 咁識講, 好搞笑!!

.

其他精選相:

大力士

第一次砌到咁高都整整爛 (當然我幫佢扶住先砌到咁高!)

Grandma話怕赤腳行會凍, 買左對拖鞋仔, 但一D都唔好行, 乖豬兩日後都當佢透明!!! 

煎雞翼

大力士又現身!!

食愛心饅頭, 食得仲滋味過麵包!!

大細EO!!! 大o個隻係grandma知佢鍾意細EO所以買!! 乖豬真係好鍾意EO, 訓覺食野去toilet都要拎住!!

(P. S. 衰Yahoo我打得咁辛苦貼完個video無左大半, 無心機再打喇, 簡短D算!!)