萬豪自助餐

今日同家人舅父舅母表弟等去萬豪食自助午餐,聽講都幾出名o架,真係要多謝舅父搞今次自助餐gathering呢!!

我o地一行十一人十二點半去到金鐘萬豪酒店,當時cafe入面已經好多人喇,我o地放低o野後急不及待就去揀o野食!!!

老實講,地方比我相像中細,而且食物款式只係OK,唔係想像中咁多,不過海鮮還是有加菲蟹、長腳蟹、東風螺、翡翠螺、生蠔、青口同蝦,雖然無用具開d殼,搞到唔係好食到d長腳蟹,不過平均o黎講d海鮮都好有鮮味,特別係青口,平日真係好難食到d青口係咁清甜呢!!!

至於魚生呢,就有三文魚、吞拿魚、赤貝同魷魚,另外仲有幾款sushi,最鍾意係佢o既手卷,師傅即叫即整,唔係太多人發現到咋,不過味道好得,因為佢將甜甜o既鮮芒卷埋入去o架,好好味,不過掛住食其他,最終唔記得食多一轉呢!!!!

熟食方面,有燒牛、海南雞、燒味、花膠、魚柳、咖哩等等,其中茄子同林到好似魚咁o既炸豬扒令我印像比較深,而名貴車仔麵就有龍蝦做食送,湯底亦夠濃,仲係全場最熱辣辣o既美食,的確好味!!!!

話就話無想像中咁多款,但都足以食到脹住個肚走呢!

番到屋企,honey猛問我諗住下次幾時再食喎,哈哈!!