大日子

今日我同honey過o左一個好開心o既星期五,好耐都無試過玩得咁開心喇,多謝honey呢!

好似平時咁早起,嘻,好似好耐都無化過粧出街咁!八點幾帶住靚心情出門口,先同honey去蔡潤記食個豐富早餐,今日d湯低好似特別濃,好惹味,不過我卻癡牙,結果坐車時全程lor lor luen,好彩後尾去到金鐘站俾我搵到牙簽咋..哈哈,差d俾d牙屑影響o左我成日o既心情添!

到達今日o既目的地~海洋公園!去到已經好多人,除大陸團外仲有唔少中小學生,原來中小學生會有團去海洋公園o架喎,點解我以前無試過o既!

我同Honey由正門入去,雖然海洋公園剛加價,但因為今日係我大日子,所以唔使錢,而honey就有九折,都算抵,不過我留意到電子板寫住生日優惠去到出年1月10號咋,好彩今年決定o黎玩o者!

一入正門就見到七彩升空氣球,幾年前無o架,所以即刻排隊,約十個人坐上氣球,嘩,都幾高呀,加上今日天公造美,唔凍唔熱唔曬唔落去,所以無尋日咁大霧之下可以望到好遠,咁大個女第一次坐氣球咋,好玩!

o係氣球上面,好高呀!

落番地面後我o地去跳彈床,我同honey玩完後都覺得跳彈床超好玩,落地o個時仲覺得自己仲跳緊,感覺好得意,不過呢度無人排隊,唔知點解其他人咁唔識貨呢!

跳彈床,好好玩呢!

再之後去探安安佳佳盈盈樂樂,安安佳佳年紀大,比較成熟穩重,而BB盈盈樂樂就可愛活潑又唔怕醜,坐到好近玻璃,所以我要幫佢o地影寫真一d都唔難,真係好kawaii,難怪佢o地咁得人歡心呢!

呢個咁可愛o既BB背影,唔知係盈盈定樂樂呢!?

 

左: 兩個為食BB掛住食,一個背住遊客,另一個就直頭用竹葉蓋住自己
右: 本來背住我o地o既BB有行動喇,佢食完竹想去邊呢?

 

左: 哈,原來只係轉位繼續開餐,不過今次佢坐正o係遊客前面呀,仲眼仔碌碌周圍望人,吸引人猛影相,好識搶鏡呢!
右: 臨走經過安安佳佳,兩位老人家不約而同都番o左室內lei埋食竹,哈,或者老人家唔想同BB爭上鏡呢!

坐纜車上山,之後去參觀鯊魚館、水母館同海洋館,第一次去水母館咋,d水母半透明o既身仔隨住燈光變色,好優美呀!不過,我同honey都覺得海洋館始終係最好睇o既,因為夠大又多魚,我o地睇o左好耐呢!之後我o地去o左食o野,本來我o地今朝食咁豐富就係唔想o係公園住面食貴o野,不過個肚打晒鼓,唯有幫襯M記啦!

 

Honey送o既鏈!                               呢杯o野靚就靚,不過好難飲!

 

      鯊魚館!                                     水母館!

 

 

蛙魚!黑漆漆咁,仲好似有手添o架!                   海洋公園標誌!

 

Nemo同佢d親友!                魔鬼魚同巨型魚!

 

一pet o野咁o既八爪魚!                                       海龜!

 

鬼魅般o既魚!                      全場個樣最惡o既鯊魚先生!

好,食飽飽,出發玩剌激o既機動遊戲先!第一樣就係最得人驚o既海盜船,對上一次係我第一次玩,印象好深,所以今次我排隊時都好驚,honey猛叫我坐最後一排,但我點都唔肯,最後各讓一步坐第三行,噢,點知原來兩邊唔平衡,一邊五行一邊四行,咁o岩我呢邊係四行 ,所以我就坐o左上第二行,honey話我賴貓,因為佢真係好想坐最後一行呢...不過,我一d都無後悔坐第二行,因為真係好恐怖呢!

之後誤打誤撞行o左去海洋劇場,距離開場仲有一個鐘,不過我同honey見無咩地方去,所以就坐低等,由於好多大陸客,所以不難見到d著得好靚o既女士除鞋捽腳...噢...真係無眼睇,著到咁時髦又有咩用!

傾o下傾o下夠鐘,首先有四個人出o黎演奏,不過同廸士尼差好遠,因為佢o地無笑容o架!表演開始,不過內容同幾年前無分別,自從海威小姐走o左後海洋劇場只由兩隻海獅同三條海豚擔正,感覺比較單調,唔知海洋公園有無諗過再養番條鯨魚呢!?

右邊黑衫個女仔高高瘦瘦,好少見咁靚女o既訓練員呢!

 

之後我o地再去坃越礦飛車同滑浪飛船,好好玩,不過成身濕晒,都幾狼狽,哈!最後,我o地去o左百鳥居,咁耐以o黎我同honey今次先第一次去咋,入面有好多顏色奪目o既雀仔,我o地冒住中雀屎o既危險,o係入面都行o左好耐呢!

d雀仔完全唔怕人,反而我仲怕佢o地,睇o下,呢隻藍雀行得幾大搖大擺!

話咁快玩到六點,臨走買o左個竹形o既餅仔做手信,之後長途拔涉趕番去,本來都有諗過出去食飯,但為o左追大結局,所以最後決定簡簡單單去伍仔記叫食送食飯,之後就各自番屋企睇電視,結束今日o既開心之旅!

 

手信,學另一主題公園咁喎!                           冷盤同口水雞,好好味!

上年去廸士尼,今年去海洋公園,兩個主題公園各有各好玩,不過今次去海洋公園就覺得佢有唔少地方想向廸士尼學習,好似幫遊客影相同增加o左唔少手信類別咁!不過講真,廸士尼係賣夢幻,同米奇呢d國際大明星合照的確開心過今日同威威師令影相o既~...不過海洋公園係港產,機同遊戲剌激好多而且地方夠大,主題亦比較有教育意義,所以兩者真係唔可以比較o既,最緊要入去玩o既人可以開開心心就得喇!

P.S. 今日收到好多friend o既SMS同Facebook留言,多謝大家厚愛呢!
        另外,今日買o左張六合彩,希望壽星會幫我帶o黎好運啦,哈哈!