鐵人媽媽1湊3: 5月 2009

2009年5月30日星期六

我倆的第二輯婚照 ~ 室內篇

倒數20日, 之前都講過室內相好多唔滿意啦(不過偏偏揀入冊又係咁多個景之中最多...都唔知點解...),唔入相冊o既就不看也吧,今次直接upload已修相o既室內入冊相俾大家睇!!!

呢個景我極唔鍾意,所以只揀o左呢張唔係好睇到後面張牆紙o既入冊!!

中間塊鏡本來有個人,不過執走左,唔講大家未必覺,不過只要細心留意鏡o既燈光倒影就可以發現到!!

呢張我第一次睇覺得一個望左一個望右好怪,但我屋企人又話唔覺,仲話幾自然!

無記錯,相中有兩個其他人,其中一個個頭被人執走o左...鏡中我鼻尖位置就係o個個無頭人喇...

兄弟姊妹第一次gathering!! (倒數21日)

今朝繼續為新居添置日常用品,原來買呢d都幾貴o架,搬出o黎住真係唔係想像中咁簡單,哈!!

下午三點半,兄弟姊妹們都準時到達火車站集合,之後就一齊出發先去女家,等當日大家都識得去女家集合!!女仔們仲上埋女家望下到時接新娘o既地方,方便大家就住屋企o既空間去玩遊戲!!

四點半,大家齊齊上我同honey新屋開會,大家都好合作,無用太多時間去參觀新屋又或者睇相簿,嘻,放心放心,遲d honeymoon完我o地house warming時再慢慢參觀過!!!

上次^.^生日會未能出席o既大姐,今日我幫^.^一次過炸佢o地兩下,炸成咁,哈哈!!!

大約個半鐘後就傾完rundown喇,除左有少許改動外,rundown大至上都應該清楚o既~~~嘻!!之後大家食過tea,男士們就先行離去,剩下女子組相量接新娘遊戲!!!最初大家都無咩頭緒,不過後尾越講越興奮,最後都順利傾好所有遊戲,yeah!!!!

婚前會再約一次眾兄弟姊妹食番餐飯,真係要好多謝大家幫忙,620就要辛苦一下大家喇!!!

2009年5月28日星期四

為明天兄弟姊妹第一次gathering準備 (倒l數22天)

一朝忙到傻,先快手快腳send個最update rundown俾各兄弟姊妹,等佢地有時間睇一次,諗定問題聽日開會問!!之後就係print rundown for咁多位,再之後就落銀行唱錢同拎外幣,再再之後係一連串email/msn...哈哈,因為我衰,無問清咁多人聽日幾點available,結果原來大家都要遲,唯有再改遲d,咁都好,咁我同honey就多d時間prepare喇!

夜晚target:

執明天物資,執下舊屋,玩新手機,入低聽日meeting資料!!yeah!

又上深圳 (倒數23日)

今日又去深圳

一朝上新居,見到honey之前自己跟o既兄弟太成品...噢,做乜d色咁o架,都唔係我要o既橄欖綠色!!我真係嬲嬲地o架,之前帶過honey睇過幾次姊妹裙,連成品都見過,仲自稱係我blog忠實fans,有咩理由我要o既橄欖綠都搞錯!!!好彩今日計劃番深圳一轉,唯有我親自去揀色,造過一批!!

一點上到深圳,先搞掂兄弟太,再去車窗簾,因為新屋都有基本家俬喇,唔想d家俬俾西斜o既太陽曬親!!除窗簾外仲車左兩個床頭cushion套同一個在架仔o既套,全部加埋720RMB,honey猛話覺得可以再平d,但我覺得OK!!

買完窗簾先去買我o既玩具,就係睇中一排o既'大陸iphone',Meizu M8,呢部機唔係山寨機o既,好正,1999RMB,外形同iphone差唔多,又係smart phone,認真平靚正!!終於可以有新機入晒d旅行資料入去去honeymoon喇!

買手機都搞o左成個鐘,五點,honey話又落雨笋崗又遠,點都唔肯陪我去埋,無法啦,咁仲未買o既結婚用品唯有遲d去金都買算啦!!

夜晚番新屋又抹屋,仲去日本城同實惠掃貸,因為星期六兄弟姊妹上o黎無理由紙杯同水都無得人飲嘛...一抹就搞到夜晚十一點半先走,但感覺仲係間屋好唔見得人...

2009年5月26日星期二

久違了的感覺!! (倒數24日)

記得之前Mrs Cocoa Bean o既婚後感想提過婚禮籌備時間唔應該太長,最理想係8個月左右,我深表認同!!

不過現實歸現實,特別係你對場地有要求,o係香港呢個咩都講快o既社會,要搵靚場地,穩陣起見最好年半或之前就book定!

Book好場,意味住大日子落實,準新娘又點可能保持冷靜,等到倒數8個月先開始正式籌備?

結果,興奮過後準新娘倒數1年至半年呢段期間見時間鬆動,往往懶散下來,沒有好好準備,到最後半年才開始忙這忙那,結果到婚禮籌備最後,但卻最重要的階段時,因為婚事籌備過於繁鎖而變得心情煩燥,休息不足,狀態不好!

我,便是當中一個!

現在跟Honey開口埋口都是結婚事項,出街不是買傢俬就是結婚用品,做每樣東西都是有所目的!!有時,真的感覺很累,但又不能不做,簡直身不由已!!

現在,我真的很想很想過回以前煲電話粥傾無聊計傾到訓著覺、逛街由旺角走到尖沙咀的日子!!!...開始明白為何honeymoon是honeymoon,因為到時不用再煩大日子,又可以懷住新婚的興奮,讓我倆有時間重拾拍拖的情懷!!

June Brides的連環炸彈 (倒數25日)

記得我提過上星期五會偷步同^.^一齊派帖嗎?o個晚雖然一班大姐只有少數出席,但一樣開心好玩!!

雖然不會互相出席,但我o地都有互相轟炸...哈哈,放心,沒有火藥味的!!
可以兩個一齊派帖,都幾開心o架,好似好熱鬧,充滿囍慶感覺!!

相反,一晚同時被兩張帖轟炸o既大姐們面色就...哈哈,好可愛!!

唔知係唔係我o地太嘈,定係兩位六月新娘同時派帖實在太引人注目,我留意到對面一台女仔望o左我o地好耐...好奇怪呢!!

2009年5月24日星期日

M (倒數26日)

M遲到了!!可惡!!上月神算過後,順利的話,佢將會o係我大日子後,honeymoon前到來!!!點知...

唉,我估係我呢個月太大壓力喇,遲了快兩星期了,下個月我百份百肯定佢會陪我去honeymoon,我唔制!!我諗我要去睇醫生佢叫開葯阻止M陪我去honeymoon喇..

買龍鳳被 & 新居大掃除 (倒數27日)

今日一朝又再殺入一田,目標係Hallmark o既床單,10點9去到已經排晒長龍,當時仲好後悔自己無早d到!!好彩入到去先知Hallmark d床單無5尺size,而且想買o個款床單原來唔似leaflet中咁紅,根本唔o岩做龍鳳被,所以我同honey唯有放慢腳步,慢慢睇其他牌子o既床單!!

左望右望,原來想買套非傳統龍鳳被o既大紅床上套裝都真係唔易,因為d款一係唔夠紅,一係又紅得滯俗得滯,之前一向留意開雅蘭o個款圓波點床單個床kum又無Queen size...(其實都有d我OK,但我位比較有taste o既honey ban晒!!)結果,我o地竟然豪花千二蚊買o左套意大利品牌床套!!