買金 (倒數6日)

今日一早先去做信用卡送o既免費facial,買埋派俾同事o既囍餅後就帶媽咪上新屋幫我舖新床,呵呵,過千蚊o既大紅床舖真係特別靚...嘻...(不過我今日先知床'單'同床'笠' o既分別...!)

下午四點同未來99去沙田買金器,今日金價9320,係呢兩星期以o黎比較低o既一日,唯有當係好彩!!!

左睇右睇,過程順利,感覺上都好快揀到,但原來前後都睇o左超過兩個鐘!!!花鍊係我大半年前金價73XX時睇中,好彩今日仲有,呢條鍊我真係好鍾意,開頭仲怕金價咁貴未來99會只買金鈪,估唔到佢會買埋花鍊俾我呢!!好開心,多謝未來99!!

夜晚趕出西九龍搵MUA Maggie Yeung揀飾物同傾一傾當日rundown,老實講,佢D飾物麻麻o地,無CDL咁靚,唯有期待佢到時巧手將我扮到最靚啦!!!

P.S. 是晚為食同honey買o左兩支甜筒,點知其中一支即掀即中送多支甜筒,於是食o左三支,點知呢支又即掀即中送多支...如果唔係仲未過大日子,我同honey一定繼續食到無得送為止,哈哈!!