HK -> DOHA -> 雅典機場 -> 酒店Settle Down -> 拎去Mykonos船飛 -> 衛城 -> 雅典衛城新博物館 -> Syntagma Square -> 晚飯:
我o地坐左8個鐘到DOHA,再等三個鐘先飛去雅典,其實時間都過得好快,因為我難得地o係機度訓到覺,好開心!!
左:深夜無人o既香港機場
右: 上機喇!
未出發前已經聽空姐朋友講QUATAR AIRWAY係一間幾好o既航空公司,估唔到,真係有驚喜!!唔知係咪中東人高大D,D機位好寬闊,老公子膝頭唔會頂住前座,佢話坐得好舒服!!另外服務都幾貼心,一上機就派小包包,內有眼罩,耳塞仲有socks,方便旅客除鞋o係機上走動,好細心(其實我好耐未坐過長途機...可能間間都係咁...),仲有,最緊要最緊要係,佢地D飛機餐好好味!!!好味到可以話係成個trip最好味o既一餐,真係唔錯,我同老公子都話下次去旅行如果要轉機,都會再坐QUATAR AIRWAY!
超好味o既飛機餐,最正應該左上角個千層麵,真係好好味!!
坐飛機時看到快要日出o既美景!
到達多哈機場!
多哈機場的日出!!多哈機場四面都係一望無際o既沙漠咁...
好得意o既中東文字!
希臘時間一點左右落機,見到D Alpha Beta,'到希臘喇!!!'...到落機呢一刻,終於有番D Honeymoon應有o既興奮感覺!!
等拎行李無o野做,影張相先!
等拎行李其間打番屋企報平安,點知收到一個shocking news, 就係Michael Jackson死左,我o係雅典機場忍唔位大聲咁'o下,Michael Jackson死o左??',結果引o黎唔少香港人望住我呢!!
由於電話費貴,收線後老公子問起我Michael Jackson點死,我先知我無問到我媽,結果,MJ o既死因直到數天後我o地先從第一間有英文台CNN o既新聞時得知...原來...到而家仲係一個迷!!(其實如果唔係我媽講我知,我相信我同我老公子都會以為希臘人好鍾意Michael Jackson,因為好多台都播MJ呢!)
HK -> DOHA -> 雅典機場 -> 酒店Settle Down -> Central Market -> 拎去Mykonos船飛 -> 衛城 -> 雅典衛城新博物館 -> Syntagma Square -> 晚飯
好,講番行程!!
落機先去機場坐巴士X95出巿區,開頭都仲有兩條隊,咁我同老公子就是但排o左一邊,點知排排o下有個鬼佬打尖,我同老公子相量o左一陣好唔好拍佢膊頭話佢,好彩最後無咁做,因為原來當地人都唔興排隊!!!巴士一到,所有人湧上車,包括我同我老公子,好彩我地手腳快,有位坐,因為程車成個鐘,仲要塞左陣車呢!!
機場等巴士o既地方!
落車轉Metro Line 3 到Monastiraki站再步行到位於橫巷o既酒店,雖然呢度都幾近Omonia,但都幾靜下,無咩人,朝早都仲OK,一到夜晚仲靜到有D得人驚,不過感覺都OK,唔似之前上網D人話治安咁差!
Metro入口天花好靚呢!
酒店樓下有架咁靚o既車o既...我都係睇相先知...都唔記得幾時影LU!!
o係酒店settle好再出發已經差唔多四點,好驚D名勝好快關門,不過都先要去醫肚同行下o係酒店附近o既central market!
o係希臘醫肚,最方便又經濟o既,當然係買Gyros啦!成個希臘先後食o左四五次Gyros,個人覺得雅典呢個係最好味(老公子就鍾意Mykonos食o個個多D!),因為雅典呢個好似比較多疏菜,感覺Juicy d無咁乾,而且呢個仲係成程最平o既Gyros,賣1.8EURO!!
Yummy!!
食住Gyros行Central Market,其實個Market唔太污漕,似香港D街巿,但就更加'血肉橫飛',因為行入去左右兩邊全部都係肉檔,吊住全隻類似係'羊'o既動物,更有一檔放滿'羊'頭,好似拍緊恐怖片,由於o係咁o既環境食Gyros唔多衛生咁,於是我o地行入去望兩望就走,都係快快趕去其他地方好過!
警告!!!下面圖片或會令人情緒不安,敬請做好心理準備才往下看!!
.
.
.
.
.
.
'大堆頭'...現場睇都覺得幾得人驚!!
係'堆頭'附近,我地仲可以食Gyros,勁唔勁!!
坐Metro去到Akropoli站搵船公司個Office,順利拎o左船飛後再衝去衛城!!
HK -> DOHA -> 雅典機場 -> 酒店Settle Down -> Central Market -> 拎去Mykonos船飛 -> 衛城 -> 雅典衛城新博物館 -> Syntagma Square -> 晚飯
衛城係全室外,無遮陰地方,我o地第一次感受到希臘太陽o既熾熱,日日戴太陽眼鏡o既日子,就由呢刻開始!!
衛城o既資料唔講喇,大家可以參考呢個Website: http://odysseus.culture.gr/h/3/eh351.jsp?obj_id=2384
呢堆石好似Lego呢!!
係衛城上面望到雅典成個巿,好靚!!
呢張係老公子影o既180度相,我用photoshop merge埋o左!!
Thru幾條石柱望出雅典巿呢個角度又係勁靚,但影相硬係影唔到個效果,要親眼去望去感受!!
衛城新巴特隆神殿附近個地好滑,我同老公子好幾次差D滑倒,大家要小心!!
衛城上o既liu望台!
上o左Liu望台望番神殿!
呢隻應該係我o地係希臘見到o既第一隻貓咪!
走喇,夕陽映照衛城!
衛城其實幾大,我o地無行晒,只係行o左最重要同集中o個幾個景點就落番山喇,因為我o地見到衛城隔離有個好靚好大o既博物館,我o地怕佢關門,所以早少少去睇!!去到博物館門口,原來門口貼住佢6月21號,我o地拍拖10周年o個日先開幕,唔怪得個博物館個樣同我之前research o既咁唔同啦!!入Acropolis o既門票唔包博物館,本來諗住太貴就唔會入去喇,點知只係1EURO入場費,好抵,最緊要行完衛城咁熱,呢度有展品睇之餘仲有冷氣!!
博物館從來都唔係我杯茶,記得上次o係台灣用o左兩個鐘睇o個個有白菜同豬肉石頭o既博物館,而家諗番咩都唔記得,所以我個人覺得博物館係一個浪費時間o既地方!!...不過我老公子就幾好有興趣,見呢個博物館咁新,又有希臘古蹟,即管參觀下!!(後尾先知,原來我地比D希臘政要仲早去呢個博物館,因為之後唔知一日定兩日o係Mykonos睇希臘電視台見到一大班政要去o左博物館,應該係主持開幕之類呢!!好彩無撞正D政要呢日去咋,唔係實封館無得參觀o者!)
入到去,嘩,咩事,個地下透明o既???原來博物館地下就係古蹟遺址,所以場館地面中央用玻璃做,等遊人可以睇到地下遺跡!舉頭一望,嘩,三樓又係咁,女士們如果要上三樓行玻璃就記住唔好著裙喇!!
透明地下!我真係唔敢行!!!
玻璃設計,唔錯,不過...我畏高呀,結果我只行側邊唔透明o既位,老公子就行中間,好搞笑!!
展品方面,大部分展品都好公開,件件都可以申手摸埋去,但唔知係咪D展品經過處理定點,件件都好似好白好乾淨,完全無幾千年前o既feel,唯一係o個幾條女神像石柱比較'真',其他o既望兩望都無咩印像喇!!
展館入口!
展館內望番出衛城!!
最出名及最值得睇,我估都係呢五條女神石柱喇!!後尾番香港搵番呢個展館開幕o既新聞先知,希臘要求大英博物館歸還最完整o個條石柱,可惜大英唔肯呢!
D石像全部都好白雪雪,好難想像佢地好多都係400-500BC前o既...
左二個石像好似真人咁,好驚!!右邊係以前d金幣!
行完展館開始日落,即刻行去Syntagma Square,途經Plaka區,買o左希臘手信,不過無時間慢慢睇,之後再行經Hadrian's Arch,Temple of Olympian Zeus同埋National Garden,講旅遊景點,呢度真係夠晒集中,全部都係Walking Distance,好方便,雖然我o地走馬看花,但都叫'睇'o左大半景點,係唯一去唔到奧運場館,都算成績唔錯!!
Plaka區,比想像中靜,唔多熱鬧!
Plaka區內賣精品o既舖頭! D碗好靚呀,但都好貴,唔捨得買!
好靚o既棋!
唔係熱,而係太為食,買o左支2.2 EURO o既甜筒!!
途經Hadrian's Arch!!
Temple of Olympian Zeus關o左門,我o地只可以係閘外遠處影相留念!
跟住又途經一個遺址仔,告事牌話係以前d人浸浴o既地方喎!!
仲經過National Garden,但無入到去,只係影張相就算lu!!
HK -> DOHA -> 雅典機場 -> 酒店Settle Down -> Central Market -> 拎去Mykonos船飛 -> 衛城 -> 雅典衛城新博物館 -> Syntagma Square -> 晚飯
去到Syntagma Square大約七點幾啦(唔多記得喇!),以為咁夜無得睇衛兵交接啦,點知一去到就見到兩個衛兵好似機枻公仔咁操緊,都幾好彩,不過其實無咩好睇,望兩望影多兩張黃昏相就走喇,坐Metro去Metaxourghio站去搵一間叫Alexanda the Great o既Restaurant食希臘菜,呢間o野我o係Trip Advisor.com無意中見到,o係希臘餐廳o既comment排頭幾位,好似好掂咁,於是決定去試!!
d衛兵操緊,唔知係咪就係交接儀式呢!?
夕陽下o既國會大樓!
去到餐廳環境一流,幾有情調,同希臘街頭灰灰黑黑o既感覺有D唔同,叫o野食喇,呢度餐牌有中文,Good!!我o地叫o左三碟o野再加酒,唔知係咪唔識叫,味道OK,但唔係想像中咁正,不過不失啦!!
食晚飯o個區,一出Metro就覺得呢區比較雜咁...
Alexander the Great Restaurant!
有中文餐牌!
個炸矮瓜好好味,魷魚就麻麻,豬肉都OK!!
希臘第一餐,cheers!!
回程番到酒店個車站,唔識路番酒店,行行o下去o左d酒吧區!!好熱鬧!!
仲見到夜晚o既衛城,好驚喜!!
番到酒店我估都十點幾十一點,梳洗完早早訓覺之後一日要5點半起身趕船!!
Day 1 總結:
衣: 希臘下午真係好曬好熱,入黑後會比較清涼,最好有件風褸旁身!另外,怕曬o既太陽眼鏡同帽係必備外,太陽傘都好重要!!雖然外國人見到你日光日白拎遮可能會向你投以奇異目光,但曬黑事少,雀斑事大,怕曬真係要帶定遮旁身!!
食: Gyros真係幾好味,又唔貴,大大個都幾飽,但男士們可能唔會當佢係一餐,所以我老公子一兩日後開始好'恨'有餐'殿粉質'食...之前上網見到有人話central market斜對面有間賣Gyros o既舖頭貼左好多相好似好好味,我買o個間都係central market斜對面,但唔見有相貼住,不過味道都OK,1.8EURO一個,雖然係我全程最平,但比起網上其他人寫o既價錢都係貴左少少!!水方面,上網知道去Market買一Pack6支水最抵,但我o地唔知邊度有Market,結果捱貴水,盛惠1EURO一支!
住: 呢間酒店叫Athinaikon,係全程第二平,46EURO一晚,睇相已經知好細,但原來比相像中仲細!!不過d o野都叫乾淨,係張床太軟o者,最緊要對出係小街,靜好過嘈,將價就貨,可以一住!
行: 希臘Metro得三條line,景點集中係一兩個站,所以好方便!!而且Metro去邊都係1Euro,一個鐘內任坐,好似我坐去酒店settle down再出發咁,再坐就唔使俾錢,咁就慳番一程!!不過,唯一唔好係出口得D街名,有時對完地圖都唔知自己應該出邊個出口,好似我要搵船公司Office就要問幾個人先搵到,有少少麻煩!
人: 之前上網見好多blog友話D希臘人古古惑惑,食飯送包原來係要收錢,又話係Metro有人偷o野,但好好彩,除食飯送包同唔排隊係無可避免外,我遇到o既希臘人都幾nice!!好似我o地快降落雅典時,坐我隔離o既希臘人就主動話俾我o地知mainland隔離個長形島叫'long island',mainland地上種o既就係Olive Tree咁,坐巴士快到巿中心時,上巴士打我尖位希臘大叔又忽然向我地介紹景點,又問我o地o係邊度o黎,就連問路o個幾個無o野做警察都好似好熱心對遊客,所以希臘人俾我o地o既感覺都唔錯呢!!
呢個就係Long Island喇!
p.s. 大家留意喇,day1 o既我,皮膚仲係白雪雪...之後會越o黎越黑喇!!!
沒有留言:
張貼留言