希臘瑞士Honeymoon之旅 ~ Day3: Mykonos (28/6)

28/6 (SUN): 酒店 -> Super Paradise Beach -> Mykonos Town -> 酒店

今日行大運兼發生唔見o野事件,好彩最後都有驚無險!!

唔記得幾點起身,我估八點幾吧!!其實今日行程只係去沙灘,所以應該唔太早起身!!

去食Buffet Breakfast,呢度o既buffet breakfast係全程最好味o既,款式選擇算多,最重要最重要係,呢個早餐係比較熱o既,係其他酒店食早餐,全部都係凍,有d難頂!!

食飽飽,去酒店reception問,confirm一下o係邊度有巴士出發去Super Paradise Beach,之前我上網,只係知道Super Paradise Beach無直接車到,只可以先去Paradise Beach再坐船仔去,點知個酒店reception話我知o係old port盡頭o個邊有巴士直接去Super Paradise,再三confirm後,我同老公子就出發喇!!

行到Mykonos Town,遲疑間上唔到一間巴士,睇Schedule,下架車要半個鐘後,既然係咁,我同老公子就決定行遠D去Old Port,搵o個架直接車!!

Old Port其實都幾靚!!

行呀行,又熱又曬行到Old port,望望望搵搵搵,無車喎!!!

走左入一間類似office o既地方問人,職員話我o地知呢邊無車去Beach!!!要去Super Paradise,要o係Town o個度坐巴士(即係我o地上唔到車o個度!!),再轉船去!!!

o下,唔係嘛,身水身汗行半個鐘去Old Port,原來我o地俾人點,運o左場大吉!!!呢一刻,我同老公子都o係度猛鬧o個酒店Reception!!

無奈下又要走20分鐘番去Town Center坐巴士,等左十幾二十分鐘先有車,咁樣一搞,比原本至少遲o左個幾兩個鐘先出到發,真係激死人,去到沙灘又要捱下午o既熾熱陽光喇!!

相中左邊間士多有巴士飛賣!!

終於買到飛喇!!唔好睇張相好似好開心,其實已經行到好熱好支力!!

由Town Center去Paradise Beach,車程半個鐘唔使就到,都好快!!

去到Beach,嘩,D沙...唔係...應該話係石仔先o岩,好un腳,著住涼鞋D石攝入腳底o個下都幾痛,我諗仲痛過行石春路,但唔著鞋又唔得,因為個地熱到行唔到,o係舉步為艱下,我好慢先行到出去買船飛去Paradise個碼頭仔!!

Paradise Beach!!

呢度D水已經好清好靚!!

坐去Super Paradise o既船仔!!

等船到,影下相先!!

一個人來回去Super Paradise船飛要5Euro,其實都幾貴!!

船仔由Paradise出海到Super Paradise,船程5分鐘吧,好短,但睇住海水顏色變化,都幾得意!!

去到Super Paradise,第一感想係,船費咁貴,個灘係就係比Paradise靚少少,但細d,基本上分別唔算大,早知唔o黎!!

呢度D沙,同Paradise一樣,其實係石仔,好難行!!

落船求其搵o左個沙灘椅就坐,盛惠12Euro,o黎得呢度,預o左俾人'湯',無計!!

放低行裝,脫下Salong,咦!!!

我o地d泳鏡同水呢?

由出發到上巴士,我都好肯定個手抽袋一直o係度,而家去o左邊??即刻睇番d相,發現我o地原來o係等船仔時影o既沙灘相雙手已經無再拎住個袋,亦即係話,我o地好可能買船飛時放低o左個袋,而兇手,當然係出名d o野隨手放,o係之前台灣自遊行三回酒店o既老公子大人啦!!!

老公子去問船家,原來最快開番去Paradise o既船要下午三點先開,即仲有約兩個鐘時間,無法子,唯有等!!

雖然係唔見o野,而且搵唔搵得番仲係未知之數,不過其實我o地算好彩,因為個手抽袋得水、泳鏡、太陽油同太陽傘,無任何貴重物品o係入面,如果唔係,就算明知個手抽袋o係邊唔見,個心都一定心掛掛,仲點可能繼續o係沙灘度游水曬日光浴!!

係時候欣賞o下個Super Paradise 喇!!!呢度係同性戀/天體天坣,落船一刻一望,已經見到不遠處有一對肥大男女赤條條企o左係度,我o既感覺係...好似上緊Bio堂!!!

o係我o地沙灘椅附近都有唔少人裸曬,不過老公子並無大飽眼福,因為身型靚又後生o既都唔會裸曬,裸親o既都係d上年紀o既肥胖人士...雖然應大o既好大,但,好多時個型狀都...好怪!!

望完人,望海!!呢個灘真係好靚,水o既顏色一層層,好有層次感!

黃色o既係一塊大石咁o既物體,上面生滿毛茸茸o既東西,行上去好似踩緊地jin咁!!行出黃色範圍就已經好深水喇!!

親眼望,現場比相片仲要靚好多o架!!

落水,d水好凍!!其實大多數人都係曬太陽,無咩人游出海,所以我都唔敢游太出(仲有,最重要係我無泳鏡,所以無潛都落水睇魚仔同感受下d水有幾清,可惜!!),不過浸下水,望下身邊D魚仔,都幾好玩!!

三點式泳照拍了一點,唯一見得人,應該係呢一張!!!!經我後期用photoshop裁相及加工了一點(唔係加工身材!!)後...呢張相,應該係場程最'正'一張吧!!!!水著o靚模身材咁勁,我都係show個背jek算喇!!!

登

登

登

登~~~~~~

正嗎???Of course 唔係指我八月十五啦...哈哈!!!現場望,個海都應該有咁靚o架!!!
(因為呢張相,呢篇都係set做Private Entry先!!!)

老公子呢,佢忌水,於是只o係岸邊無無聊聊!!哈哈!!

話就話唔擔心個手抽袋,但一到三點,我o地都係趕番船過番Paradise Beach,bye bye喇,Super Paradise!!

未落船,我o地兩個已經遠遠望到我o地個手抽袋高高掛住o係埋船飛個booth仔度,賣船飛D人都講笑話wonder when we will be back, haha!!!

檢查下,水同泳鏡等都苶唔見,呼~今次真係有驚無險!!

坐巴士番Mykonos Town,去醫肚先,之前上網見有人提一間叫Jimmy o既,於是經過又食下佢個Gyros,不過無尋日o個間咁好味囉,而且又貴d,不過,係呢度我o地撞到對年輕香港夫婦,其實坐巴士由Paradise番Mykonos Town我地已經眼望望,話晒大家香港人嘛,於是大家坐埋一齊傾計,分享去Paradise Beach o既行程(佢地只去Paradise,原來o個邊得上身裸,唔似Super Paradise咁有全裸!!),呢兩日食飯經驗,買水經驗,哈哈,原來我o地係同船o黎Mykonos,之後一日同船去Santorini,好有緣,我o地仲合照留念呢!!

Crepes, 朱古力香蕉味,好味!!

又係Gyros!!

另一對香港couple, Ming & Karen!!

酒店望番去Mykonos Town!!

酒店泳池!!老公子終於落水喇!!但佢好似無離開過呢個角落...

番酒店去酒店泳池游一陣水後就早早洗白白煮晚餐,今晚我o地要坐o係露台睇住日落、食住酒店送俾我o地o既香檳食番餐浪漫晚餐!!

煮完,剛好日落,set腳架影影影,可惜攝影技術有限,人清楚時個天曝晒光!

芝士撈丁!!之前一直久聞咁食一丁係好好味,結果...係就係好味,但原來好漏!!飽到滯晒!!

酒店送o既酒溝埋橙汁汽水,好味!!!(o黎到希臘,我地日日都有酒飲呢!!)

加上睡衣look o既我倆,有D殺風景,哈哈!!

寫意就係咁!!

是晚日落有雲,無尋日咁靚!!

(呢晚睇電視,見到現場直播一班希臘政要去o左早兩日我o地去過o既衛城博物館,嘩,原來我o地比d政要早去個博物館呢,哈哈!!)