第五十三周 (18/5 - 24/5): time schedule亂晒籠!!

乖豬一歲喇!!!

但呢位'大個女'食同訓方面都越o黎越難搞呀!!!

訓方面:

其實乖豬 o係去旅行前已經開始越o黎越難tum訓傍晚o個覺小睡, 去旅行其間又熱又攰, 乖豬每日都訓到兩覺, 不過time schedule因為成日都出左街, 所以都幾亂, 試過8點先訓小睡, 亦試 過3點幾4點小睡...

番到HK,一切回復正常, 但我又要開始為傍晚小睡而煩惱, 因為而家我就算6點半先開始tum佢訓, 佢7點幾都仲未訓著, 一o黎waste time, 二o黎再俾佢訓, 咁夜晚餐粥就要極夜先食...於是呢排開始我索性放棄俾佢訓第二次小睡, 但乖豬到8點幾就真係超眼訓超攰, 好多時到食奶時間佢就食到訓著, 好陰公, 我係就係可以早D休息唔使tum佢訓, 但我又唔想佢就咁訓左水又唔飲牙又唔刷喎...總之就係煩!!!

食方面:

乖豬越o黎越唔愛食o野咁, 特別係打完針o個兩日, 基本上食2啖就唔食, 點tum都唔肯mark口, 一係就lur, 好曳!!!

去完健康院, 姑娘話1歲要減奶, 咁乖豬2點幾o個餐奶我就要改食其他固體, 但4點幾5點又食生果, 7點又食粥, 9點幾食奶訓, 每2個鐘就食一次, 超密, 其實係咪應該merge埋2點幾o個餐同生果一齊食?? 咁就唔使食咁密, 等佢食夜晚餐粥仔夠餓可以食多D? um...真係要試下先, 希望乖豬快D適應食少餐奶, 同埋食番多D粥仔啦!!! 

21/5: 今日去o左屯門探康晴!! 康晴大個o左瘦o左呢, 同時亦乖o左同'成熟'o左, 少o左之前見面咁大聲叫, 真係大個女o左好多, 仲好禮讓, 見乖豬想搶某D玩具而大叫大喊, 佢會主動俾玩具乖豬, 真係好抵鍚呀!!! 希望乖豬都快D'定性'D啦, 佢而家實在太黐我身喇, 又膽仔小咁, 康晴行近D佢就大喊, 但其實人o地都無蝦佢呀...真係睇到我滴晒汗呀, 乖豬呀乖豬, 希望你大D唔會咁黐身, 識同其他同齡BB玩啦!!!

22/5: 去健康院打針磅重!!! 重8..9kg (50%), 差DD先夠20磅!!! 本來無得度高, 好彩咁o岩我個中學同學(o係o個度做姑娘)呢日係負責呢part, 我o係少D人o既時候叫佢幫乖豬度高先有得度咋, 結果係75.5cm (75%), 滿意滿意!!

之後姑娘就問下乖豬發展, 問乖豬識唔識自己抹嘴, 識唔識推玩具車, 同埋識唔識扮講電話...呢D我都無乜同佢玩過呀, 所以都答唔到佢識唔識...結果俾姑娘話我同佢玩得唔夠多元化, 話佢而家一歲大個喇, 要玩多D唔同o既o野, 可以開始俾佢玩疊高同俾筆佢畫o野等等, 總之就叫我同佢玩多D...

唉, 其實我雖然係全職湊B, 但家務繁重, 有時仲想做下自己野好似整理相片同寫blog, 自問一日入面全心全意去同乖豬玩o既時間真係連一個小時都未必有, 真係有D慚愧, 我真係要努力多D同乖豬玩先得!!!

見完姑娘打針, 乖豬主要係俾我夾住唔郁得而扭計, 打o個下都有痛到喊, 但唔係真係喊得太慘, 我抱住佢行番出房已經收晒聲, 都算叻女!!!

其他相: