帶BB去旅行: 準備篇

今日一家三口去新加坡旅行喇!!!!YEAH!!!!番o黎再同大家分享遊記!!!

而家先寫下我帶BB旅行o既準備工夫!!!



雖然我提早o左一個星期已經拎o左gip 出o黎預備執行李, 但要執o既實在太多, BB用品又多數要用到最尾一刻先可以放入gip(e.g. 奶樽, 洗奶樽o既用具等), 都唔知點開始好, 真係好頭痛!!!

另外, 事前仲要好似做實驗咁'實習'下去旅行o既用品, 確保可以煮到粥仔俾乖豬食!!!


去完honeymoon後旅行煲又可以出動喇!!! 係屋企先試下用熱水壺早一晚焗定D米, 之後第二朝用呢個煲粥, 幾分鐘就煲好, 都唔算痴底痴得太勁, 不過就一定要帶埋洗潔精洗煲...


奶粉方面, 因為無買細罐o既, 所以就諗到用用剩o既儲奶袋裝奶粉, 既密實又衞生, 一餐一個袋, 咁就唔使帶奶粉隔, 到時要沖奶又方便!!

為去旅行, BB都要接受少少訓練, 就係沖涼喇!!! 因為乖豬之前試過用花灑沖涼喊到收唔到聲, 所以我o地就要帶吹氣浴盆去旅行, 而事前係屋企就要試下乖豬用吹氣浴盆有咩反應!!!

結果佢'認浴盆', 喊到好慘!!! 所以為o左去旅行沖涼可以開心D, 就要早D係屋企train乖豬適應個新浴盆喇!!!


當波波池俾乖豬玩, 佢玩得好開心!!!

好彩BB適應力強, 第二日已經若無其事可以用吹氣浴盆沖涼喇!!!

之後就係BB車喇!!! 事緣老公子出trip見過有人推一種極輕巧o既BB車, 佢一問下, 架BB車竟然係o係北韓買!! 之後我係屋企附近都見到有人用, 所以淘寶搵下, 真係俾我搵到類似o既BB車仔, 只係重2.5KG咋, 真係好輕巧, 於是就買o左諗住去旅行用喇!!!

試車!!! 車身較貼地, 不過真係好輕便, 上的士拎上車就最feel到佢正, 不過佢唔可以單手收車, 呢方面就唔夠細心喇!!!

雖然試o左車, 但越諗越覺得BB要訓覺, 又要食奶, 仲怕會曬同落雨, 坐咁多日呢架只能坐直o既車始終唔係太好, 好怕BB訓'LAI'頸 (為此, 我o地連BB頸枕都買埋!!), 最後向航空公司查詢, 原來BB車可以上機前先寄, 又唔使加錢, 所以最後決定呢架細車都係唔會用!!! 不過都唔怕浪費o既, 架車只係百幾蚊港紙, 留番俾我一個人帶乖豬出街用都OK!!!

最後o既準備, 就要多謝住o係新加坡o既朋友仔喇!!! 佢特地幫我去o左酒店附近間超巿check有無o岩我用o既BB用品!!


我o地住o既酒店, 近China Town, 都係好友推介o架, 又近MRT又新!!

.
酒店對面就有街巿同超巿!!!


BB尿片有28片裝, 尿片雖然輕, 但太阻行李位, 所以特地去check有無細包裝, 原來有28片裝, GOOD, 不過要成20新加坡紙呀, 好似貴o左d!!!所以而家可能執完行李仲有位置o既話都係自己帶去都未定!!!



Baby food, 香港有o既大路牌子都有售, 所以到時D粥要加肉可以買呢D babyfood o既肉加入去, 新鮮生果可以買蕉或其他易食o既, 無就買babyfood o既果蓉!!!

以下係我整理出o黎o既check list, BB o野真係多到爆, 但既然自己揀要一家三口去旅行, 辛苦D都唔緊要, 最緊要一家三口到時玩得開心又放心!!!

BB用品:

BB藥 (退燒藥, 止瀉止吐, 傷風藥)

棉花棒 (少量)

防蚊貼

尿片

BB車

BB車雨檔

BB指甲鉗

BB髮飾

BB衫 (後備衫) + 涼鞋

BB泳衣 + BB水袖

BB毛巾 (沖涼毛巾仔, 抹身, 游水, 抹汗)

BB包被

BB紗巾

BB口水肩

BB外套(1簿1厚)

BB Cream

BB沖涼液

BB洗奶瓶液

BB食具 + 剪刀

BB奶瓶 X 2

BB背包仔

BB玩具

吹氣浴盆 + 泵

BB護照 及影印本

膠袋及密實袋 (最少每日每樣1個)

BB濕紙巾 (抹pat pat/手)

BB餅仔

BB揹帶

BB熱水壺 (1大1細)

旅行煲
洗潔精

BB水杯

BB奶粉/米

大人用品:

雨傘

相機

相機防水套

戶照

背包

拖鞋
衣物飾物化妝落妝用品,cream

毛巾

泳衣泳褲泳鏡
太陽眼鏡

各種叉電器

拖板 (我老公話唔使帶, 話酒店實有得借喎...)

萬能插頭
外套
錢
紙巾N包
膠布
軍刀
酒店機票旅遊保險單據

希望今次旅行好天氣, 一切順利, 乖豬訓酒店唔怕生保, 第一次泳水唔驚啦!!!

Singapore, 我o地一家三口o黎喇!!