帶BB去新加坡之旅: Day1

由買機票到出發足足等o左半年, 終於出發帶乖豬去新加坡喇, YEAH!!!

  
乖豬o既旅行裝備: 太陽鏡同背囊仔!!

我o地夜晚8點幾機, 成朝我就忙住執行李同預備乖豬D食物!!! 老公子就上網買寄艙D行李費, 點知一check原來要幾百蚊, 而我o地件大行李size一定要寄艙, 由於行李仲有好多位, 我又覺得BB物品唔一定要寄, 所以要臨急call我媽借佢個細gip, 然後就由大行李般細行李, 好彩都塞得晒入去, 唔使寄, 慳番幾百蚊食o野好過呢!!!

下午4點幾5點, 終於出發喇!!! 乖豬坐機場巴士心情勁靚!!

排隊check-in!! 乖豬後尾開始唔耐煩, 係咁扭我抱!!

Check-in好順利, 我o地個gip超左少少重o者!!

check-in完就去T2食晚飯!!



咁就百幾蚊, 味道麻麻又貴, 貴過我o係機場番工o個陣好多呢!!!

大人食完就到乖豬開餐!!

食完時間緊迫, 急急腳入閘, 去到閘口已經登機中, 於是快手去個toilet同幫乖豬換片!!

 

上o左飛機喇, 我o地坐尾二o個行, 近toilet, 隔離個位無人坐, 唔知同我o地有BB有無關呢? (回程時發現係無關o既...)

飛機起飛喇!! 起飛時Engine開隆隆聲, 但乖豬一D反應都無, 似乎耳仔亦無受氣壓影響而唔舒服, 總之就係一切正常到不得了, HAHA!!!


食奶時間!!

10點幾, 乖乖訓覺喇!!!


降落新加坡已經十二點幾一點, 之後打的去酒店, 乖豬一直訓覺覺豬, 好乖咁...

我o地住Orchid Hotel, 近China Town又近MRT, 房間俾預期中大, 又夠乾淨, 好good!!!

去到酒店點半, 放低乖豬諗住可以執下o野先訓, 點知...

乖豬望到環境唔同o左, 之後就醒晒, 仲周圍搞搞震...

雖然已經拍埋o左單人床同大床, 但都怕乖豬會跌落床, 我同老公子要是但一個看住乖豬, 得一個人執野真係好慢...結果兩點幾訓得, 乖豬仲係唔肯訓, 一抱埋身拍佢就發惡, 結果唯有熄晒燈又得佢自己係我同老公子中間滾o黎滾去爬o黎爬去, 最後佢近3點先訓著...可憐我之後先訓得...


夜麻麻唔願訓o既曳曳小朋友!!!!