希臘瑞士Honeymoon之旅 ~ Day10(下): Bern & Murren (5/7)

橫掂honeymoon遊記都拖o左咁耐喇,um...不如我出埋呢篇快手快腳出左新鮮熱辣o既Boracay遊記先再續瑞士行程啦!!!嘻...

==========================================================

Day10上半日行程: 希臘瑞士Honeymoon之旅 ~ Day10(上): Luzern (5/7)

遊完Luzern我o地就出發去Bern喇!!

Bern火車站都幾大 (話晒都係首都o既車站呢!!), 我o地決定係呢度醫肚!!!由於揀o黎揀去都覺得貴,最後終於一嘗好多人都話算抵食o既瑞士燒雞!!

味道真係唔錯,o岩晒老公子呢隻食肉獸!!

食飽飽,出發!!

Bern係瑞士首都,成個巿都被列入世界文化遺產,因為成個地區就係一個古城!!路邊每座建築物郁D就係五六百年前起o既,亦即係話,自己企住呢度,五六百年前都係一模一樣,呢種感覺好有趣!!

資料顯示:伯爾尼古城於公元12世紀建在阿勒河環繞的山丘上，古城幾百年來不斷發展進步，但城市的規劃理念卻始終如一。 伯爾尼古城保留有15世紀典雅的拱形長廊和16世紀的噴泉等建築，這些建築的歷史可追溯到各個不同的歷史時期。這座中世紀城鎮的主體建築在18世紀重新修建，並保留了原來的歷史風貌。

(聯合國世遺官網: http://whc.unesco.org/en/list/267)

傻下傻下,見到有鐘就以為呢個係Bern o既地標鐘樓...所以咁又影一餐!!

大棋盤,好似香港咁,好多叔叔伯伯係度捉棋!!

行行下天色開始灰暗,好似想落雨!!而偏偏同一時間,我開始發現Bern呢個地方比想像中大得多, 手中print 出o黎o既Bern地圖中景點同景點之間o既距離比想像中遠好多...

國會大樓前o既濆泉,有好多小朋友係度玩呢!!

行呀行, 行呀行...係Bern呢個古城入面,我覺得我同老公子好似小矮人,街道長長好似行極都唔完...加上可能係星期日關係,街道兩旁o既店舖都無開,話係古城,倒不如話似座死城...!!無路人可以問路下,我o地竟然搵唔到景點之一o既鐘樓同愛因斯坦故居...

終於見到其中一個景點!!Cathdral!!但係...點解又裝緊修???由米蘭大教堂開始,已經係第四個地方遇著裝修或開show喇...似乎我o地同呢D名勝無乜緣...

行行下路中間有隻'腳'!!

左: Bern以熊為地標, 古城四周不難見到熊型雕像!
右: 街道兩旁都係商店,有好多商店起o係地爐!!

終於行到去教堂喇!!

d雕刻好仔細!!

教堂內部比較黑!!

參觀完教堂,我o地繼續沿住好似無盡頭o既街道前進,向熊洞進發!!

o係天台角樓訓覺似乎好舒服咁呢!!我都好想有機會試下申對腳出街曬太陽!!

到了到了!!但係...原來熊洞close o左!!!!

睇下告示板...原來熊洞close o左超過一年喇,點解我research o左咁多資料都唔知到...我真係好失策啊!!

唉...雖然唔係話特別恨睇熊,但行足大半個鐘得個吉真係覺得好無癮...

雖然睇唔到熊,但熊洞附近景色其實幾靚,只係可惜呢日天氣唔好...

無奈下只有回程...

 

忽然發現了之前搵唔到o既愛恩斯坦故居...可惜,當時已經五點正,故居關閉了,老公子十分失望...

愛恩斯坦故居附近就係鐘樓...唉,如果剛到步時係行呢條街道,咁我o地就趕得切去愛恩斯坦故居了...

天色昏暗,加上又過o左五點,死城更加像死城...

資料顯示: 鐘樓是伯爾尼最具特色的城市標誌之一, (1191-1256)被看作為中世紀鐘錶製作藝術名副其實的傑作。它是13世紀時伯爾尼城門的前身, 塔中的小人在每一整點前的4分鐘開始報時,於大火後的1530年建成。

資料顯示: Bern有“泉之城”的美稱。城中共有100多處泉眼，其中11處至今還保留著舊貌，這些噴泉形態各異，如正義女神像噴泉、熊噴泉等點綴著伯恩的街道。帶給遊客神秘的追溯感

麥記, Cheese Burger 2.5CHF, 即大約16HKD一個!!

熊洞睇唔到、愛因斯坦故居去唔到、景點又遠、仲要拖住件一唔扶住就會跌o既行李、個天又忽然行雷閃電...最麻煩最麻煩o既,應該係我成日話要影相...結果呢個時候,老公子發脾氣了!!

至於我...,成個Bern巿都行完,但我一張同老公子正經企係度o既合照都無影過(因為老公子心煩氣燥,路上只肯求其幫我影,大機無拎過出o黎不在話下,合照更加唔肯同我影!!),去旅行唔影相咁去o黎做咩!!個天開始落雨喇,我亦開始喊...

...呢次就係我o地婚後第一次唔開心喇...

望望手錶,距離預算火車開出時間仲有一段時間,行番去車站又太早,但景點相距又遠,再走回頭路又怕時間唔夠...喊住o既我,得到老公子可憐,於是我o地行番去鐘樓位置睇多陣!!

再折返鐘樓時,個天已經下起滂沱大雨, 本來就已經心情唔好而且好狼狽o既我倆就更加狼狽了!!唔通...我要求折返參觀呢個又係一個又任性又錯誤o既決定...

行到鐘樓,見到好多人圍住鐘樓向上望,羊群心理,我o地又一齊望,原來鐘樓每個鐘都有'雞啼'同小人公仔報時,原來折返呢個決定又錯唔晒呢,睇住公雞報時,我同老公子心情都好番d!!

睇完,我又用我隨地都搵到位放機自拍o既技術,set好位影正經合照...唉...望番張相,不禁令我唸起影呢張相o既時候,其實只係剛喊完...

真係要離開Bern喇,點知污雲片天,下起傾盤大雨...雨勢大到根本行唔到,最衰係剛到Bern時天氣甚好,我同老公子見好天仲放低o左把大縮骨遮係車站locker...

等呀等,雨勢一d都無援和o既跡像,最後,我唯有拎住裝滿手信o既大購物袋舉o係頭上跑,老公子就拎細遮,向火車站跑!!(其實我記得gip內有雨褸o架,但當時搵極都唔見,最後番到酒店先見到原來係個gip個網度囉...)

跑得快好世界,終於番到火車站,好彩個人都唔算太濕,但個手信袋就爛左喇,去到酒店之前,我地都要好小心拎住個袋,免得掉晒之前o既戰利品!!

坐火車向Interlaken出發!!

好彩,似乎只係Bern一帶天氣唔好o者!!!烏雲並無跟住我o地架火車去interlaken!!!

相中兩座山中間就係Interlaken喇!!故名思義,Interlaken當然係夾係兩個湖中間啦!!!圖中係Lake Thun, 另一邊就係Lake Spiez!!

原來呢度d火車好得易,同一卡車前2卡係去A地方,後半卡去B地方,去到分叉路口,前後兩邊火車就會脫勾各行各路!!

呢度係Lauterbrunnen!!!好多人都會選擇呢度作住宿地點,因為呢度上雪山比較方便!!

不過, 我就無揀住係呢度,因為上網有人講過Lauterbrunnen係山谷,周圍係崖同瀑布,感覺比較焗束同陰暗,所以我就揀左Murren呢個位於海拔1600米o既地方落腳!!!上網好多外國人讚Murren靚,話佢比較寧靜,景色又靚!!!

去Murren其實比較麻煩,首先要到Lauterbrunnen轉吊車上山,之後再轉纜車先去到!!

吊車, 嘩,望上去唔見盡頭咁o既!!!

嘩,不知不覺吊車站已經好遠...

我同老公子都未上過雪山,當時都唔知1600米算高定低...當時只係知道,原來山上面唔少村落都係o係咁高海拔地方,覺得好勁!!

吊車站得番一粒點咁細...望落去都幾恐怖!!

終於到站轉纜車喇!!

雪山近在咫尺!!

高山景色又有另一程美態!!

呢三座應該就係少女(Jungfrau)、僧侶(Monch)、艾加(Eiger)三峰喇!!不過我唔知邊座打邊座!!

纜車臨埋站,我同老公子都忍唔住叫o左出o黎,因為我o地見到鹿呀!!!仲要係至少6-8隻一群o既鹿呀!!!係瑞士幾日,牛馬羊就見得多,鹿真係第一次見,所以好興奮!!可惜傻瓜機唔生性,影唔到咁快o既動物,其實上圖中央草坡上o既淺啡色物體就係鹿喇!!

落車去到hotel已經近9點,天色陰陰濕濕咁,開始天黑,經過一日又支力又狼狽又唔多好玩o既行程,終於可以settle down喇...!!

濕漉漉,好彩只係毛毛雨,不過都幾凍呢!!

今晚住o既Hotel!!不過我o地唔係住main building,而係住呢座building後o既木屋!!呢間酒店房我book時已經知佢係無電視o既,為o左感受最接近大自然o既感覺,我當然唔介意啦,出發前亦對興世隔絕呢兩晚有d期待...點知我o地間房係o係地下o個層,跟本望唔清雪山,難免有d好失望...

Anyway,hotel都係訓覺o既o者,呢一刻,我o地最迫切o既應該係去醫肚!!

點知...山上面o既舖頭9點鐘都關晒門,一片死寂,我地求期入o左一間仲有開o既,點知職員話得番d麵包三文治呢d間單食物...!!

當我地正煩惱緊今晚得d杯麵實唔夠飽(其實我無問題o架,但我老公子實捱唔住!)o既時候,我o地又行o左入一間中國人開o既食店,原來老闆同老闆娘都係香港人,哈哈,o係咁高o既山上都可以用廣東話同人溝通,感覺好親切!!

老闆同老闆娘見我o地咁可憐無o野食,原本已經收晒爐o既佢o地都特登為我o地開番爐,用店內緊餘o既牛同雞肉炒o左兩個炒麵俾我o地外賣拎走!!

原本,我無打算o係honeymoon trip入面食中餐,估唔到'走投無路'下都係要食,而且呢兩個炒麵幾貴,大約120-140(唔多記得!)港紙一碟,貴到不得了!!不過,o係無得揀之下,呢兩碟鑊氣十足o既炒麵又好似乎特別好味,究竟係我o地太餓太支力,定係思鄉掛住中國小炒所至呢??

由於無電視,食埋飯沖埋涼老公子開始埋怨喇!!雖然佢一早知呢兩晚無電視,但原來實際上佢係忍受唔到無電視o既生活o架!!但對於我o黎講,沖完涼執下旅行gip都夠鐘訓啦,邊似得老公子咁'得閒'睇電視新聞喎...所以有無電視我都無咩所謂!!哈哈!!

夜晚,由於住o係1600米咁高,睇見窗口都起晒水氣(室內有暖氣),似乎出面好凍...係就係'貼近大自然',不過外邊又濕又黑,咩都望唔到,感覺都幾得人驚...雖然我有d想出去望下星星,但最後都係唔敢出去...可惜可惜!!(如果我地住到上層就好啦,有露台我就應該敢出去呢!!)