今個星期乖豬明顯百厭o左, 爛反o左, 而家去到陌生地方(朋友或四大長老家)都無乜認地方大喊, 相反仲因為周圍d o野好新奇又有人同佢玩而勁笑勁開心!!!
雖然乖豬笑多o左的確tum到好多人開心, 但係惡起上o黎亦唔係人咁品, 佢一喊就基本上得兩個solution, 就係同佢玩引開佢注意力等佢笑, 又或者俾番我抱!!!
引
開佢注意力呢招有時都work, 但只限佢唔係太眼訓時, 如果佢眼訓就真係喊得好惡, 任你之前同佢玩得幾happy都唔肯俾你抱,
交番到我手先止到咳, 我老公子抱都無乜用!!!其實我見到佢咁我都幾開心, 因為佢咁o既表現同之前認生保唔同, 佢唔係因為唔認得人而喊,
而似係佢'想媽媽'而喊呢!!!
5/11: 第日一家三口出沙田行街, 帶o左乖豬去Snoopy land影相, 點知天氣勁熱, 乖豬出到室外就發脾氣影唔到相!!! 而家諗番, 原來我生日o個日乖豬雖然影相唔笑, 但全程無扭計任影相係好合作o架喇!!
下午同老爺奶奶飲茶, 開頭坐住車車乖豬都對住麻麻笑幾開心, 但爺爺麻麻一抱就發long lai勁喊, 喊到成間酒樓D人都望住我o地咁滯,
惡到飛起!! 奶奶見抱唔掂俾番我, 乖豬一到我手就收聲, 點知奶奶唔心息, 即刻又話要抱過, 好快咁係我手中搶o左乖豬走!!!
乖豬呢頭先要番媽媽, o個頭又被搶走, 咁當然又大喊啦!!!點知奶奶越抱佢越遠, 行得好快, 我估佢係唔想乖豬見到我扭我抱, 同埋想試圖行街引開佢注意力啦...
好彩, 無錯, 我話好彩, 好彩乖豬好醒繼續大喊, 無錯, 係好醒, 因為我當刻真係覺得奶奶好似'老笠'o左我個女囉...其實肉緊個孫都唔使咁猴禽嘛!!!
7/11: 今日抱乖豬入屯門探Jenny同佢囡囡康晴!!!乖豬開頭心情普通, 間中會喊下, 但比之前去人地屋企算合作喇!!
食完奶乖豬同康晴一齊訓o左陣覺, 我仲拍低o左佢o地一齊啜嘴o既情形, 好得意!!!
能始終係陌生環境, 乖豬好快嘈醒左認地方唔再訓, 不過都好彩, 佢之後好乖, 好自在咁係康晴張playmat度玩, 仲越玩越開心,
自言自語同笑, 我都係第一次見佢去人地屋企玩心情靚成咁, Jenny話康晴都一樣, 心情好靚, 或者BB們知道媽咪同朋友傾計開心,
佢o地自然玩得開心!!
8/11: 今日去探仲有一個月左右就生得o既好友Wendy, 佢個肚唔係太大咋, 好fit呢!!! 之前睇佢貼上facebook d相見到佢腳勁腫都有d擔心, 但呢日見佢無腫, 行動自如, 都幾好狀態咁呢!!
今日乖豬繼續心情勁靚, 令我更肯定佢又大個左唔怕生保地方同埋開始貪玩, 成日笑笑口!!
呢日下午落好大雨, 最後我要留到6點幾等我爸車我走先得, 加上我老公子臨時甩我底話唔番o黎食,所以我臨時番我媽度食飯呢!!
10/11: 今晚抱乖豬番奶奶屋企dinner, 乖豬之前無乜點訓, 仲估佢會心情麻麻, 點知相反呢, 佢心情好到不得了, 仲笑晒, 老爺奶奶佢地好開心, 因為佢地應該都係第一次見乖豬笑得咁開心!!
食完飯奶奶抱乖豬玩, 拎住個大Hello Kitty公仔無啦啦拎住乖豬隻手拍落公仔度, 話'打打打', 之後姑仔又加把口, 話Kitty曳, 打打打, 乖豬笑到咭咭聲, 又用手拍公仔, 好么開心!!!
我第一時間已經出聲, 話應該教佢鍚公仔, 摸公仔斯文d, 點知因為乖豬笑晒, 奶奶姑仔並無因為我出聲而停止, 仲不斷'打打打'...
離
開奶奶家後我同老公子講覺得奶奶咁樣做唔好, 因為乖豬仲細, 未識分辨是非, 我覺得係佢未明道理前唔應該俾佢接收到d唔o岩o既訊息,
就好似今次咁, 個公仔咁得意, 點解唔係教佢鍚公仔摸公仔, 而係立亂話公仔曳, 然後就打佢!!! 就算公仔真係曳, 都唔應該'打',
用'拍'字會唔會好d...仲有就算要'拍', '拍波打球'點都好過打公仔!!!
老公子雖然都認同, 但佢份人無我咁緊張, 佢覺得好少事無乜問題...
番到屋企我又忙餵奶搞乖豬訓 (呢幾日乖豬好醒訓, 明明9點幾已經餵到佢訓左, 但一抱佢上床就醒, 仲要醒左唔願訓, 之前一晚仲要12點先訓!!), 我都唔記得件事...點知...
深
夜4點乖豬無啦啦喊醒, 仲要抱極都喊, 最後餵奶先止到!! 自乖豬個幾月戒夜奶後都係第一次餵夜奶咋, 我媽話佢手腳凍可能係凍醒,
唉...我個腦之後就不斷諗'打打打'呢件事,
係度諗應唔應該打去同奶奶講我覺得咁有問題...但又怕佢又以為我對佢不敬鬧番我...另一方面又擔心唔講奶奶之後一定仲有無數我睇唔過睇o既反面教材會
出現, 怕乖豬一朝學壞...
就係咁, 我就訓唔著到天光, 眼訓加上忽然覺得教育乖豬真係幾大責任, 我竟然忍唔住喊!!! 襯老公子就起身番工叫醒佢話佢知我因為咁訓唔著, 老公子就話奶奶都係第一次咁o者, 唔使出聲住!! 之後老公子出左門口我餵乖豬先訓得番一陣...
第二日中午, 本來約o左我媽出街, 但太攰喇, 所以媽咪上o黎, 我忍唔住問我媽, 佢一聽到'打打打'就即刻話咁樣真係唔好, 不過佢覺得唔使出聲話奶奶, 自己之後教番乖豬就OK...
聽完我媽講後我個人先真正放鬆左少少...因為我就係我媽悉心教出o黎, 自問我都算係一個'好'人, 所以我對我媽o既教導方針好有信心!!既然我媽都話之後教番乖豬就得, 我應該要信!!!
雖然我無再為呢件小事煩惱, 但我知呢個只係開始!!!
唉...咁小事我已經自製壓力, 幾時先得教大個女...都唔知自己將來面對乖豬四周無數o既反面教材會唔會發癲!!
============================================================================================
今周其他相:
天氣轉涼, 冬裝出場!!
沒有留言:
張貼留言