試衫

今日陪珍妮去final 試佢d婚紗同晚裝,好靚呀,我特別鍾意綠色o個件,不過最後怕佢影相會淺色o左似婚紗而無揀到,不過佢最後揀o個幾件都幾sharp幾靚o架,嘻,仲有一個月多少少就到佢大日子,到時化埋妝一定個個讚靚o者!!!

睇完衫我o地仲去試酒,不過唔知係空肚飲酒定本身好支力,成個人都好眼訓呢,不過之後去食和花亭(多謝雞泡又做東!)時大家又講唔停,嘻,開心事總係講唔完呢!!!

今晚真係好開心好開心!!!

試妝

今日朝早約o左一個攝影師入o黎傾o野,佢價錢比出面d公司平少少,不過質素好似普通咁,唔係太俾到信心我同我honey呢!!

之後同屋企人去食味千拉麵,honey衰到死,食o左我特登留番俾自己o既帶子同蟹柳喎,成日都係咁o既!我媽媽笑我o地好似小朋友搶o野食喎!

下午四點半出到西九龍中心,嘩,好多年無去過,完全唔認得個商場呢!!今日我其實係o黎試妝o既,叫o左honey同媽媽o黎睇,因為我最信得過佢o地o既taste!!!

化妝師Maggie一開始就問我有咩preference o既style,但我平日都好少化妝,所以就答佢無,任佢試,結果佢前後幫我試o左三個妝三個髮型,開頭上妝時真係睇唔慣自己o架,而且一向眼睛不算小o既我估唔到都要癡雙眼皮膠紙,因為我有大細眼呢!!!!!除此之外,仲以為自己睫毛夠長啦,點知癡完假睫毛後一對比,嘩,始終都係要有d 假o野先靚o既,哈哈!!!

另外,值得一提係佢今年先開始引入o既噴槍上粉,原來佢特登去阿Zing度學,個堂價值不菲,我都覺得自己有幸係佢未加價錢用到噴槍,個粉底真係好貼好薄,我完全唔覺上o左粉,好自然呢!!!!

至於三個造型,除第一個掛妝唔太好外,其餘都OK,特別係Smoky Eyes造形,都幾型幾好睇,用閃光燈影相後,其實完全唔覺得個妝太濃,如果個smoky eyes再深d我諗我都可以接受到呢!!!而髮型呢,都算整得幾好,其實我無乜期望,因為我把頭髮一向難搞,但估唔到佢話又厚又重先易set頭呢,咁都好d!!!!(不過我honey可唔係咁諗,佢始終好抗拒我化妝,哈哈!)

成個試妝過程差唔多兩個鐘,Maggie真係幾好傾,仲講o左好多佢自己o既o野俾我聽,令我好有親切感,加上網友o係網上對佢都有讚無彈,令我好放心,於是就即場落埋訂,yeah,又煩少一樣喇!!!!

夜晚,我o地一家人去食譚仔記米線,真係好難得我媽肯夜晚出街食飯,雖然天氣極凍,不過可以一家人一齊食麻辣米線,成個心都暖晒,好滿足呢!!!

心得: 一路都預o左個妝唔太突兀我就會即confirm,因為想慳番d試妝費,所以我事前於網上都睇o左好耐,結果搵到Maggie,佢個forum條thread唔似其他人咁一味得人PM問資料,而真係有班忠實客人俾意見,絕對唔係一個人用幾個account留言賣廣告造勢,加上佢好努力放相上自己blog同網站,令我事前已經睇到佢o既作品,當然,實際一點,佢o既價錢算係合理,所以我真係覺得搵到佢好幸運呢!!Maggie,我人生最重要一晚就交俾你喇,到時你要令我成為世上最靚o既 新娘先好呀!!!

想睇我試妝o既相嗎?去我MUA個blog啦: 高清噴槍-眼睛識笑既新娘試妝

短記!

呢排好似好少寫日記咁...因為都幾忙呢,放工番到屋企都唔太想對住電腦太耐,哈,大家都知我d日記好長,要寫好耐o架嘛!

等我講番近排做過咩先!

上星期日同honey一家去海濱公園影畢業相,天公造美,同埋原來海濱公園有迷你花海,都幾靚呢!

至於平日呢...工作有點苦悶,無乜好寫,不過為慳家,我又開始帶飯o既生活,有時成個office得番自己都幾寫意o架!!

另外,好友Jenny婚期越o黎越近喇,姊妹們都開始買姊妹衫喇,但我仲未行動呀,望望身型,噢...點算好呀,有衫都未必著得好睇...農曆年要忍o下口喇!!

宣佈一個月

今日honey好乖,因為佢好早係旺角放工,所以自己去o左金都幫我睇婚宴攝錄d o野(當然都係我request佢先去啦!!),而且佢仲提到佢對婚宴有咩concern,嘻,好開心honey忙住考試都咁有心!

會見證婚律師

今日行程: 海濱公園影畢業相 => 皇家太平洋酒店Promotion Event => 婚紗街 => 沙嗲王 => 朗延酒店見Anthony => 金都搵婚宴攝影

今日節目又好豐富喇...自決定結婚以o黎真係無一個星期可以過自由時間咁...

一朝十點約o左honey一家同honey影畢業相,其實佢件袍遲o左還要罰錢o架喇,而且我同honey其實都影o左,加上近排咁忙,真係唔想影,不過為免掃honey媽o既興,唯有近近o地係海濱公園影!!!

今日天公造美,曬到有d過份,不過o係陽光下,海濱公園原來都幾靚,或者我實在太多年無去過啦,原來園內有咁多靚景,仲有迷你花海,忽然諗起結婚o個日外影都可以o黎海濱公園影o下呢!!!做攝影師影影影,好開心honey媽讚我影相靚,不過可惜,我鍾意被影多過影人,奈何我honey多年o黎d藝術細胞都係咁上下,唔識幫我影靚相...哈!!!

十二點幾,honey出去溫書,我就番屋企,本來honey約o左我Lunch,但最終佢甩我底,衰!!!

下午五點,趕出去皇家太平洋酒店個promotion event,honey又一次飛甩我,無心裝載,我真係好嬲呢,發o左決定結婚後第一次脾氣,我都知搞婚禮其間有爭執好正常,但希望唔會傷到感情啦!!!

去到酒店,噢,周圍都收晒檔,好失望...!!!之後四圍行,去o左婚紗街,不過都係係咁二望o下!呢d都係等honey考埋試先慢慢睇啦!!

約好o左幫我o地做證婚o既Anthony o係朗延酒店見面,佢太太鄭律師都係度呢!!!Anthony好熟練咁解釋行禮o既安排同注意事項,果然好細心呢!!!好,我就將呢個神聖任務交俾你啦!

我同honey之後再去金都,去o左專業製作同幸福宣言兩間婚宴攝錄公司了解,嘩,原來要咁貴,有d失預算呀...點算好呢!!!??

睇場10: 萬麗海景酒店,係你喇!!

今日行程: 萬麗海景酒店(爸媽) => 竹昇麵 => 萬麗海景酒店(Honey爸媽)

今日帶埋雙方家長去睇場,先同家人出去,由於sales唔得閒,所以由我帶,媽媽一睇就覺得好靚,太好喇!!!之後同屋企人去食竹昇麵,不過麻麻啦,雖然d麵幾彈牙爽口,但食得太多都咬到幾支力,而且仲幾貴呢!!!

之後到honey家人,可惜佢o地一貫地遲到!!!!由於reception唔記得打俾sales,我o地等o左好耐,耐到下一個timeslot要傾contract o既couple都到,所以之後sales只能好衝忙咁介紹,更莫講話有時間同佢初商落訂細節呢!!!

不過,真係要好慶幸honey媽都好鍾意個地方,總算鬆一口氣!!!!!終於決定係萬麗海景酒店喇,唔使再個個星期周圍去睇場,真係好!!!不過而家個sales只係口頭幫我hold,始終仲差好多細節要傾,希望下星期傾時可以bargain到多d o野啦!!!!加油!!

有史以o黎最近我o既番工地點

上星期先投訴緊番灣仔好遠,點知峰迴路轉,今日可以番新蒲崗喎!!!由我屋企到公司都係兩個巴士站咋,計埋等車朝早用o左半個鐘,真係好爽呀,出o黎做o野咁耐都未試過番工番得咁開心o架,而且OT夜極都唔怕太夜番到屋企(不過夜晚好多人等車,都要45分鐘先番到屋企!),而且,個office人少d,無咁迫,真係心情都靚番晒呢!!!!

今日係公司同honey MSN,忽然講起咩顏色靚d呢個問題,因為一向我鍾意綠色佢較鍾意紅色(但佢有時又會話鍾意黑白色),於是就問honey如果第時有間屋,咁牆身咩色好, 綠色同粉紅兩溝咪變左啡色囉,點知...

Honey: 不如間條啦!

我即刻忍唔住笑, 點知Honey再自問自答: 但係萬一第時我鐘意直間, 你鐘意橫間咁點算呀?

我都未回得切佢就話: 冇問題, 用格仔咪得囉!!!

哈哈,笑死我,奈何我仲要係office 呢...忍笑忍得我好辛苦呀!!!一諗起格仔牆,唔俾我honey激暈,都會俾花碌碌o既格仔整暈喇,哈哈!!!

搵好律師行動要快!!

今日honey好乖,打o左俾Jenny推介o既律師問證婚o既o野,當honey話我知個律師表示有另一對新人早兩天亦查詢過09年6月20日時,我個心真係跳得好快!!!!

之前上網睇過呢個律師真係好有口碑,所以當我知道律師以收到表格為先時,我真係好心急想即刻填表,點知撞正食飯,無奈要出去,搞到我成餐飯都心掛掛呢!!!!

番到office唔理三七廿一即刻填表,都唔理會唔會太公開會俾同事睇到...哈哈...搞掂, send!!!!!

Yeah,終於send o左,Honey仲好叻唔使我提就自動打去律師度confirm收唔收到,太好喇,咁都俾我o地捷足先登喎!!!

過兩日律師會草擬好結婚通知書send俾我o地睇,其實我而家都未知其實係咩,可能就係話會公開張貼睇o下有無人反對o個份啦,之後就會相約同律師見面,好緊張,不過亦好放心,因為從網上o既口碑再加我honey o既形容,我可以百分百相信佢係一個好律師!!!

成晚婚宴氣氛好壞同莊嚴與否都幾靠個律師o架,好彩我o地行動夠快,認真幸運呢,而且,終於證明我咁早籌備結婚絕對唔係太快同太緊張,係真有需要o架!!!!

睇場9: 海景嘉福, 鴻桃, 皇家太平洋, 帝廷皇宮&桃源

今日行程: 海景嘉福酒店 => 鴻桃酒家 => 皇家太平洋酒店 => 帝廷皇宮 => 桃源酒家

又睇喇,今次應該係最後一次,因為我尋日已經搵到我個場喇,無人可以阻止我的!!

海景嘉福酒店Piccaso Room: Appointment好full,本來上星期已經想睇,但被迫要今日先睇到,上網勁多好評,而且呢間酒店雖然唔多出名,但其實係同洲際酒店同一集團的,有點信心保證呢!我同honey去到一睇,都唔錯呀,樓底夠高夠grand,唔錯,仲有麻雀區,唯一又係新娘房無獨立洗手間...美中不足!不過,同尋日萬麗海景個場對比,都係尋日o個度開楊d呢!!

鴻桃酒家: 有朋友介紹,不過可能睇慣o左酒店,開始番唔到轉頭,對酒樓睇唔上眼了...其實遠望呢度都OK啦,不過honey都話唔想入去睇,咁就算啦!

之後,honey要番去溫書喇,唉...下午唯有自己一個去睇場...雖然我都知溫書緊要,但有時都會覺得自己好可憐呢,哈哈...好似一個人結婚咁...

時間尚早,去o左婚紗街,自己都快做姊妹喇,要睇姊妹衫,不過呢度全部都係新娘衫咁,都唔係好咁入去d舖頭睇呢!!!

皇家太平洋酒店: 酒店有三座building,都幾難搵地方,而且之前上網睇到d相,個場o既老虎紋地壇好肉酸,不抱太大期望...的確,個場普通啦,唔算太靚,不過佢下星期日有個promotion,即叫經理幫我reg,哈哈,唔幫襯去抽o下獎幫補o下都好嘛!!!

帝廷皇宮&桃源酒家: 就係皇家太平洋酒店樓下o既中港城,上網都見好多人揀,就睇睇啦!!帝廷皇宮宮廷式裝橫,不難想像我媽一見一定即ban,始終我o地都係鍾意清雅o既感覺多d!桃源酒家,裝橫平實一點,不過新娘房都係無toilet...普通啦!!而且最重要係,呢兩個場我都meet唔到最少圍數requirement,真係諗都唔使諗了,哈哈!!!

經過今日,我決定了我心水場了,今次係酒店呢,睇怕下星期帶雙方家長去都唔會好似去煌府咁遇到反對吧!!!!!Good Luck!!!!

睇場8: 萬麗海景酒店

今日行程: 萬麗海景酒店

無錯,今日要番工,不過好彩酒店係我公司附近,所以lunch去睇呢,不過就要捱o下肚餓,食少日lunch!

萬麗海景Oasis Room: 個場幾細o架,但都放到十四五圍,不過若要放十五圍,麻雀台會得番四張...um...要諗諗點處理了...不過個場真係好靚,有如玻璃屋,雖然樓底矮了點,新娘房又無toilet,但唔理了,我喜歡呢度o既清雅!!

萬麗海景Concord Room: 個場大好多,最多三十圍呢,而且我o地都應該meet到最低消費,不過無玻璃屋o既感覺,差少少,不過都OK啦!!!

價錢方面,高級酒店o黎講呢度算實惠點了,雖然都係好貴一圍,但我同honey都開始豁出去了,budget比預先plan的貴了很多,但無辨法,一生人一次,豪少少...當然,亦希望o黎飲o既大家到時識做點啦...哈哈...

另外,呢度o既sales跟得好好,好有禮貌,俾我好好印像呢!!!Sales亦肯幫我hold住日子,不過佢太忙,最快下星期先方便帶家長o黎睇多次場,anyway,希望下星期順利,家長們都唔反對啦,因為我認定了呢個場了!!!

:(

完成荃灣個project o既工作,尋日開始落第二個project,番工地點係灣仔...嗚...好唔開心呀,又要過海番工,下星期開始要帶番飯做番慳妹先得喇!!!

新工作環境其實都幾差,d台又窄又細,對於我o地呢d長時間對住電腦工作o既人簡直係惡夢呀,只係兩日咋,我肩頸都梗晒喇,好痛!!!

可能係新環境未慣,我又試無晒鬥志喇,嗚...

睇場7: 博藝會&海逸軒

今日行程: 番工 => 放工 => 博藝會 => 海逸軒

勤力o既我一個人去睇場,有時一個人行動真係快N倍,輕鬆好多!!!

博藝會: 三個場o既其中兩個o黎緊會裝修,會加高天花至十一呎,睇設計圖有d似星願亭,似乎幾靚,不過上網睇博藝會好似服務同食物都麻麻,唔怪得呢度同同一個集團o既德藝會、大舞台飯店最低消費平四五成,太誇張,雖然實惠呢點好吸引,但令我對佢唔太大信心!!!加上,親眼所見,博藝會o既reception亂到似寫字樓o既文件堆咁,d staff穿著亦唔太整齊,似去o左夜總會/K場咁,個場幾靚都大打折扣...不過,我仲有年半先擺酒,咩事都可以發生,或者到時佢服務同食物都可以追上另外幾個場都未定,但係我都係唔多敢拎自己o既大日子教飛...諗諗先...

海逸軒: 位於海逸酒店,之前quote過海逸個包場價,要成廿萬,高級酒店果然唔同d...不過咁都俾我發現到美心旗下o既海逸軒,位於海逸入面,但最低消息竟然只係6萬,仲要有180無敵海景添,真係要睇睇!!!上到去,原來場地正中間有條大柱,差唔多大半個場都無法睇到全個台...終於我明白佢點解咁實惠喇...坦白o既經理亦講出佢個場o既另一d缺點,就係熱...

恭喜!

老友,雖然我有少少介意我竟然要從第三者口中才得知你的好消息,但我還是想真心同你講句:恭喜!

睇場6: 逸東, 彩福, 帝苑&科學園

今日行程: 逸東酒店 => 佐敦道彩福皇宴 => 帝苑酒店 => 茶餐廳下午茶 => 科學園囍慶

又睇睇睇睇場喇,睇o左N次,開始麻木同有點氣'lui'...今日睇o左兩間酒樓兩間酒店,其中有d同尋日重覆,因為無法啦,雙方家長都要睇嘛...可惜,最終結論都係無一個地方o岩心水...究竟幾時先可以firm實個場呀...好唔開心呀!!!

逸東酒店明珠/翡翠廳:本來都有d期望,因為逸東價錢較合理,點知原來package好多o野唔包,menu又set死用d cheap食送,要upgrade就要等quote價,都幾煩,雖然個場係我鍾意o既形狀,樓底又高,但新娘房好似廁格咁細,太唔掂喇!!!

逸東酒店佐敦廳 :T形場,樓底好矮,honey媽就鍾意,我就唔鍾意!!!而且我要強調,帶我o地睇場呢位逸東sales好無禮貌,令我對成間酒店印像都好差,唔掂!!!!

佐敦道彩福皇宴:上網睇到個場幾靚,裝橫無煌府咁俗,於是上去睇,個場d裝修我覺得OK,係我鍾意o既shape,點知包場價都唔平,拍得住酒店,不過toilet就好迫好細同污漕,而且難得honey媽都話酒店好d,佢同經理bargain又bargain唔到d咩,算吧,放棄!

帝苑酒店: 又睇喇,呢個場honey同我媽都話唔錯,而且酒店o黎講算實惠,不過細場有柱,而且最多十四圍,我o地怕會多過十四圍呢...而大場就太長條喇,我唔鍾意長形廳呢,樓底亦唔高,不過,我都覺得如果其他酒店價錢真係太貴,呢個場我都會選擇的!!!

科學園囍慶: Honey媽去到都覺得呢度幾特別,不過新娘房無toilet,要去就要經過地濕濕o既廚房走廊,都幾唔方便,而且講真,地點咁唔方便,又唔係大集團,再加上forum上唯一有o既一兩篇評論都係彈,雖然價錢真係好實惠,但我唔係好想冒風險呢!!

睇場5: 帝苑, 日航, 大舞台飯店, 逸東&科學園

今日行程: 帝苑酒店 => 日航酒店 => 靚靚車仔麵午飯 => 大舞台飯店 => 逸東酒店 => 科學園囍慶

又安排o左一整日睇場活動,真係腳都軟,而且睇o黎睇去差唔多,開始睇到無乜心機,真係好想盡快落實!!!!

今日先去帝苑再去日航,由於周圍好多酒店,所以唔理咁多,無做booking都照撞入去試試睇場,可惜原來無booking真係睇唔到o架,所以香格里拉,海景嘉福都只係拎到資料呢!!

帝苑酒店: 個細場好骨子,不過都幾細,十二圍就OK,如果十四圍可能都幾迫喇!!!而且呢度有柱位,只係d柱位唔係檔住個台,而且天花d燈無得做燈光效果,樓底又矮,不過佢就有落地玻璃,可以睇到酒店內景,都算開陽少少,OK啦,我honey同我媽都覺得幾好!

日航酒店: 個廳OK大,但都係最多十四圍,而且仲係長條型廳,我麻麻o地鍾意,但呢度有海景睇,似乎幾靚,但我Honey同我媽都話呢度比較舊,鍾意帝苑多d呢!!!

大舞臺飯店: 同屋企食完車仔麵再過海去睇大舞臺飯店,一向對呢度都幾好印像,因為夠晒特色,不過今日去o左之後都有少少失望,因為個場真係太黑,而且我同我媽都覺得佢唔多襯婚紗晚裝,所以都係放棄!!!

逸東酒店: 好支力喇,但一場出到o黎,順便去埋逸東,點知都係睇唔到場,不過今日一問,佢個menu比其實酒店平原來係因為咩都唔包,連椅套都要另收費,想upgrade個菜又要quote價,好似太多未知之數喇,感覺唔太好!!!Anyway,聽日要同honey媽再o黎睇,都係聽日先再慢慢問啦!!

科學園囍慶: 最後最後,爸爸順路去o左科學園一趟,因為呢間酒樓我一家人都有食開,質數都OK,而且酒樓外邊環境比較cyber同空擴,價錢亦實惠,只係我硬係唔鍾意佢粉襯黃o既台布同椅套罷,如果唔去酒店擺,係呢度擺,用多d錢做decorate可能仲化算...唔...都係番屋企慢慢計數先得!!!

番到屋企成個日散晒,聽日仲要再行多轉,真係好想快d落實...嗚...聽日又要努力喇,加油!!!

覆診

星期五,今朝去o左覆診,仲以為可以好快睇完番office,點知醫生遲番,搞到我差唔多食lunch先番到office呢!!!!

講番覆診,我隻左眼仲係有影,右眼呢排夜晚都唔太清,咁我當然要找佢悔氣啦,點知驗眼我又正常,只係左眼有50度散光,醫生亦解譯我知點解右眼會唔清,但我唔係好信...或者我已經對呢個醫生無o左信心啦...

嗚...點解個個朋友做都無事,我就好似咁多事咁o架!!!!

睇場4: 煌府&朗豪酒店

今日行程: 旺角道煌府(睇場 + 午飯) => 朗豪酒店

Honey大前日整親腳,行都行唔到,估唔到佢隻腳好得咁快,今日已經可以免強唔用手扙喇,加上屋企有車,所以照出去睇場!!!

旺角道煌府: 前日honey媽已經睇o左場,仲大讚添,今日帶我媽去睇,諗住一向有taste o既佢一話OK就即confirm,點知...點知我媽一睇就唔鍾意喇,話太娘太俗...嗚...而且今日我o地飲埋茶,味道亦麻麻...之後我媽不斷叫我o地睇d酒店,噢,即係唔使諗啦,唉...又要由頭再搵過場,而且我o地仲俾o左錢添,唉...好肉痛,好徬徨...

於是我o地walk-in去附近o既朗豪酒店睇場!!!由於無booking,sales都差d唔理我o地,好彩最後都有位sales肯帶我o地睇!!

朗豪酒店八樓上海廳: 我o地先去八樓,不過個廳太長太窄,仲要麻雀台同新娘房都同主場分開好遠,麻麻o地!

朗豪酒店四十二樓星願亭: 嘩,靚到'dum'一聲,之前上forum都見到好多人大讚,估唔到真係靚成咁!!!點靚?相信大家都知旺角最高係朗豪,試相像身處42樓o既呢度由落地玻璃望出九龍有幾震憾,總之就係好靚啦!!!而且個新娘房又有,又有一個pre-function area可以for見證或麻雀房,總之設備一應俱全,掂!!!!不過,就係太掂喇,個場實在太太太太貴,最少要成十六萬五先包到場,我同honey大約得十數圍咋,過萬蚊一圍實在afford唔起,真係得個恨字...唔知將來我有無朋友會o係o個度擺呢,雖然自己唔得,但都真係好想試試o係呢度飲宴o既滋味!!!

睇o黎o黎緊呢個星期六日,我o地要將目標改去酒店或會所喇,加油!!!

P.S.送honey去睇跌打,佢竟然跑了幾步,明明早幾日仲係行都行唔到o架,又會好得咁快o既?