你今日捐o左未?

我咁大個女第一次捐血咋,仲記得一年前有捐血車去我舊公司樓下,本來約埋d同事一齊捐,點知個個掛住做o野唔記得o左,今年又有機會喇,所以同而家d同事一齊去捐,其中一個同事仲特登趕番o黎捐o架,好有心呢!!!

由於得幾張床,所以要等到六點幾七點先有得捐!我o地四個人一齊去,由於我未捐過,開頭睇住另外兩個同事捐o既時候都有少少驚,佢o地都話有打麻醉針,搞到我都好驚會好痛,不過話晒第一次捐,都係唔用麻醉針好d,要感受下嘛!!!

支針'吉'落o黎喇...噢,原來唔痛o架,同先前'吉'指尖驗血差唔多,於是我就同仲要捐o既同事講話唔痛,叫佢都唔使打麻醉針,點知...

哈哈,原來男仔支針粗過女仔o架,因為男仔係捐450cc,女仔係350cc,男仔支針太幼會'有排捐',所以佢o地係會痛過女仔o架,哈哈,個同事邊捐邊話'都唔係你講到咁唔痛o既~',好搞笑呢,不過佢唔知係咪血壓勁d呢,佢d血'泵'得好快,明明遲我好多先開始,竟然遲我少少就搞掂呢!!!

至於我呢,雖然唔同,不過我d血'泵'得好慢,慢到個儀器(血壓儀??）'咇咇'聲咁響,不過我已經好盡力握實拳頭o架喇,仲'泵'到手都支力,不過都仲係捐得好慢呢!!!個姑娘話係我d血管收縮o左,所以咁慢...

好,終於捐完喇,姑娘'mun'番支針出o黎...嘩...做乜仲痛過'吉'入去o既??姑娘咪就係我血管收縮o左,所以夾住o左支針先會痛囉...噢...!!!!

望一望包血,嘩,呢d血就係我o架喇,哈哈,唔知我係咩血型呢?好想快d收到紅十字會寄o黎o既資料呢!!!

講真,我今次捐血係出於好奇多於其他原因,不過最重要o既係發現捐血原來唔多痛,所以,我相信如果紅十字會話我d血無問題o既話,我一定會再去捐呢!!