深圳遊 (麥田試衫 + 買影相飾物 + 買全屋燈飾)

好眼訓呀...,雖然我之前都上過好多次深圳,但今次收獲好豐富,支力係支力d,但好滿足!!!

前晚去完舊同事餐飲宴後同honey傾電話傾到成兩點先訓,但星期六一朝仲要早起執呢兩日北上d o野,未開始起行已經好sleepy...haha!!!

出發,先同honey去食我呢區出名雞批同蘋果批好正o既茶餐廳食lunch,然後好滿足咁北上!!

第一站: 麥田映像

上過咁多次,知道福田口岸近d,點知今日個司機唔識路,過o左都唔知,到兜番轉頭已經跳到廿蚊,幾衰,明明十五蚊左右就到!!!!

上到麥田試衫,我開頭以為就咁睇相簿揀o架咋,都唔知原來可以試上身,傻o下傻o下,其實我連girdle都未買!!!我o地前後揀o左五件試,之前都講過佢d款真係無乜幾件o岩我杯茶,不過唯一幾件o岩我同honey杯茶o既都真係唔錯,特別係上次一眼睇中o個套,今日一試真係覺得好o岩feel,最衰呢件真係特別污漕,影相唔覺o卦!!

之後再試埋其餘4件,其中一件一試就覺好正,顏色好特別,我諗無乜邊個影pre-wedding會揀呢隻色...哈哈,我而家唔開估住喇,等影完俾大家驚喜!!!

至於另三件,試上身都係麻麻,見麥田大門公仔著o左兩件打晒燈好閃好靚,一問之下原來係新衫,於是諗住試埋啦,點知咁o岩件衫出o左街,無得試...算啦,橫掂對其他衫都興趣唔大,雖然無得試,照book啦,我諗問題唔大o卦!!!

Yeah,三件衫搞掂,hold到自己想要實在太好,不過客服話我揀o既都唔似影pre-wedding o既衫喎...我知,我都見好多人都揀o個d好似雲海咁o既紗尾影,或者影出o黎真係靚d,但就咁試,我又覺得唔係太靚...!!!

1月9就影相喇,仲未減磅呀,而且仲好煩帶咩便服上去影,我應該買件靚o野去影定就咁casual d帶平日著o既衫影好呢?好煩惱!!!

衫就無影低喇,但走時o係留下賣傢俬o既商場睇到呢個紫+綠擺設好靚,不過我估都好貴!!

第二站: 寶安北路

行完麥田番honey宿舍放低行裝後再轉戰寶安北路,上次去家之福搵唔到燈飾,今次再去,原來家之福分幾座o架,我o地上次行錯o左,唔怪得唔見啦!!!今次終於行o岩,除燈飾外仲有好多其他o野,好似五金玻璃窗簾地毯等等,有心機我估都可以買到唔少o野!!我o地主力睇燈,其中一間感覺比較modern,賣o既款又好似係香港少見d,唔錯,好快我同honey就睇中三款,一於第二日o黎買!!!

之後我o地再睇o左陣水龍頭同花灑,最衰自己之前無係香港了解買呢d o野要注意咩,所以完全唔識睇邊d質料好,最後都唔敢亂買!!!

離開家之福行去荀崗,上次太趕只行三樓,今次就行^.^所講比較多o野睇o既二樓,原來呢度真係多d結婚用品,其中一間仲堆滿人,入面拖鞋褂鞋利是囍字帖紅傘咩都有,一站式咩都買得齊,真方便!!!不過我今日都係唔買住,因為呢d隨時都有啦,咁早買番屋企都無位放!!!

有時間再行番三樓,睇o下有無咩飾物仔可以買o黎影相,其實場內有好多賣飾物,但其中一間好似d石特別閃,連我honey都唔再阻止我買就知呢間d飾物真係唔差,d石幾閃真係幾似水晶,於是我就買o左以下三樣o野喇,埋單唔算平,但相對起佢o既閃度同品質,又好似幾抵,大家覺得值幾錢?

左邊我買時以為係頭飾,點知原來係心口針...唔知可唔可以照放上頭度用...

第三站: 醫肚

行完同honey打的(其實寶安北路都幾唔方便,無地鐵到,我同honey次次都打的,計計埋埋上咁多次只係車錢我估都有兩百幾lu!!!)回宿舍附近醫肚,去番我曾經食過炸龜苓膏o個間,埋單百三兩個人,好味!!!

左上:西洋菜煲
右上: 污漕雞
左下: 炸龜苓膏
右下: 海哲頭

好掛住o既炸龜岭膏,肥係肥d,但苦苦o地,真係幾好味!!

成日食食食,硬係覺得Honey最近肥o左咁!!

夜晚同honey揀o下屋企牆身顏色(我山長水遠帶埋重疊疊o既乳膠漆色板上去...)同plan去honeymoon d 行程,唉,honey而家晚晚OT到好夜,傾電話又好難一齊plan行程,今晚要把握時間,因為我唔想我自己一個理晒...點知Honey成晚好唔專心,掛住睇電視,結果我o地傾到成點幾都好似無進展,激死我!!!!

第二日: 買全屋燈飾

今日我照舊神早醒,次次係honey宿舍訓都好似無訓過咁,好辛苦,但無法!!至於honey又照舊踼極都唔願醒...唉,我成日覺得一朝出街時間好用好多,但偏偏我honey無下午都唔會起身,第二時真係唔知點夾,我估呢樣都係我o地一大挑戰!!!

Lunch係宿舍食,honey今日做大廚,仲要好主動o個隻!!!以前我讀U住宿舍成日煮麵honey食,今日到honey煮麵俾我食,好開心呀,仲有糖心蛋做早餐,honey真叻(補充,我honey係唔識煮o野o架,所以今餐雖然係別人眼中好簡單,但我食得好窩心o架!!!)!!!

Honey o既愛心烏冬!!!

估唔到食物相加水印感覺咁得意!!三隻蛋白雪雪,又幾可愛喎!!!

食完先出去羅湖唱錢,因為尋日唱得太少,實唔夠買燈!!!之後又打的去家之福,以為好快搞掂啦,點知今日間舖得一個男仔(加一個掛住睇劇唔幫手o既女仔!),佢又勁好生意,結果我同honey係舖頭等o左兩個半鐘先拎到貨走,真係等到hup眼訓!!!

不過呢位哥仔都幾好人,幫我o地換晒d米仔膽燈頭做慳電膽燈頭,做勁到話所有燈都轉到,只要客人諗得出佢就做得到,勁!!!大家知嗎,當我知道d靚靚水晶燈可以換慳電膽不知幾開心,因為香港問親都話慳電膽款得d最簡單o個d,水晶燈一定係米仔膽o架!!!雖然我認米仔膽係靚好多,但米仔膽真係好熱,即係浪費o左唔少電係熱能度,注重環保o既我真係唔多鐘意,我仲因此有放棄買水晶燈o既念頭呢!!!

又想慳電又想靚,我o地最後決定四款燈中大廳同書房先換慳電膽,因為比較常開,至於睡房同飯廳少開d,就用番米仔膽啦!!!

經師傅約半小時努力,終於整好大廳燈,我o地仲靈機一動,保留番幾粒米仔燈頭,加個電子開關,yeah,要靚要請人o黎屋企參觀時開米仔,平時自己用時只開慳電膽,一舉兩得,十個讚!!

搞到五點終於完成,四款燈總值一千人仔,其實我覺得可以平d,奈何呢間可能好生意,講價只肯收齊頭,平得幾十,我同honey又好弱講價,無法!!!!

拎住四個大盒番香港,honey仲要出去深水土步wet,結果我要一個人兩隻手拎住行李同燈番屋企,好彩d燈唔太重咋,唔係一定手都斷!!!!!

番到屋企急不及待向家人展示戰利品,我爸專業做水電,一睇就講出燈o既電線有咩地方quality唔夠好,電線太熱好易熱溶至短路,嘩,唔怪得上網見好多人話大陸買d燈易燒啦,好彩我爸好熟行,一睇就知,幫我裝燈前仲一定可以整番好d燈o既安全裝置,yeah,thank you papa!!!!!

不過,屋企人對我o地揀o既燈好似有d保留,話我o地揀成三款係方形,質疑我o地做咩唔買襟睇d o既圓形喎...係咩...乜圓形襟睇d o既咩...嗚...本來我好鍾意d燈,聽完佢o地comment有d唔開心添,乜方形真係唔襟睇o架????

Anyway,呢兩日深圳遊雖然好支力,但難得唔似上幾次咁趕頭趕命咩都睇唔切,仲大有收獲,我真係好滿足呢!!!

(本來好想影d燈,但最終都唔好意思o係燈舖影相...等d燈裝好後再同大家share!!!)