令我鬼咁開心o既聖誕禮物!!!

聖誕快樂!!!!今日boxing day無節目,舅父母o黎搵我爸媽開台,我就靜靜留o係屋企,好珍惜呢一份悠閒,好耐無試過喇!!!

講番標題所指o既聖誕禮物,雖然唔及我o係公司party度交換到o既拔罐禮物咁'特別',但就tum到我鬼咁開心...哈哈哈,我honey仲笑我成日o係度'回味'喎!!

不過,份禮唔係honey俾o既,而係...

投注站門口一位阿姐!!!!!

哈哈,大家都估到我份禮物係咩啦!!!!!

無錯!!!就係我俾人查身份證呀!!!!

...哈哈哈哈,你話份禮物係咪好值得回味呢!!!!估唔到都就嫁啦,咁o既年紀仲有人查我身份證,諗番轉到出o黎做o野後應該都無試過喇,阿姐,真係多謝你俾面,聖誕節tum到我咁開心呢!!!!

=======================================================

平安夜怕迫無出街,尋日聖誕先出動,先去金都買girdle!!

事前上網成日見d人話金都二樓阿婆好,於是就去買,點知我搵o黎搵去二樓得一間埋內衣,但就唔見有阿婆...噢,是但啦,橫掂我對girdle無咩要求,買o左先算!

由入去到出o黎同位阿姨講o左都唔知有無十句,咁就買o左,成日聽人講賣內衣d舖會叫你買埋佢d bra,但阿姨又無hardsell我呢樣o野喎,我鍾意!!而最勁o既係佢輕輕一掂就知我身型有咩問題,好利害!!最後一個girdle連pad盛惠$320...噢...乜咁貴o架咩,我以為百六七咋喎...算啦,唔好煩,就咁算啦!!!

之後再同honey睇煲太,其實唔買都得,但我o地又怕麥田o個d會好土,所以都係買o左一個最簡約o既黑色款,麥田唔掂o既先用!!!

另外,我仲睇o左姊妹裙,大家應該記得我o係姊妹裙網上大搜查提過想用紫或綠色做姊妹裙襯番theme color,但始終心儀o既橄欖綠色好難搵,亦可能好蝦人著,所以上星期同伴娘睇裙時主要都係紫色!!不過,今日竟然俾我o係金都搵到我心儀o既橄欖綠姊妹裙呀,真係好驚喜!!!!

金都見到條裙隻色同上圖o既色都有八九成似o架,總之正啦!!
至於上星期睇紫色反而好難遇到心水色,因為大多數唔係太粉色就係太深!!!

姊妹們,真係要搵日帶你o地去睇o下先得!!!!

========================================================

之後同honey出去TST GOD,因為之前睇中o左款地櫃,諗住年尾會減價啦,點知無喎!!之後就陪honey shopping,因為honey好耐無買新衫喇,不過都係睇唔o岩!!

大約八點幾我o地再過中環,因為今晚honey o既兄弟o係一間bar度搞o左個party,我一向好少接觸佢d兄弟,認識o下都好!!!!

是晚party好多人,場地細細但請o左八十幾九十人,迫到我o地成晚都要企o係bar門口,而且人太多,小食得菠蘿腸雞翼三文治,所以好多人都無乜食o野,後尾仲要拉隊去第二度食糖水/麵,不過成晚咁熱鬧,睇得出佢兄弟真係好落力,又扮聖誕樹又安排遊戲俾大家玩,相信佢呢個聖誕真係好難忘充實!!!!

好多人!!

十二點走,好彩趕得及尾班車,呼!!

==========================================================

P.S. 有無blog友打算去麥田影相呀,尋日我o地收到麥田電話,話我只要介紹到人去join,就會送三百蚊coupon俾我呀,而我介紹o個位都有優惠,有興趣o既同我聯絡呀,慳番d都好嘛!!!