希臘瑞士Honeymoon之旅 ~ Day11: 少女峰Jungfraujoch (6/7)

今日o既活動係去瑞士必做o既,就係上少女峰!

一朝起身食早餐...今日呢間酒店o既早餐算唔錯喇,有炒蛋呢...不過係凍o既!!

個牛角包好好味!!

由於住o左上山,落山又上山需時,所以我一早plan o左呢日好早起,點知最後我o地都係遲o左,miss o左d好疏o既車落山,唯有比原先計劃遲o左成個鐘先出到發!!

wow, 今日好大霧呢!!!係咪因為呢度有千6米高所以咁大霧呢?

上: 先坐吊車落番去Lauterbrunnen
中: Lauterbrunnen
下: 坐車上wengen

開始坐登山齒軌火車上山喇!!(就係呢程火車令我o既識讀少女峰個英文名喇!!!haha!!)

車入面坐滿來自世界各地o既旅客,亞洲人方面以日本同韓國'長者團'多,如果我年老時仲可以好似佢o地咁著少少衫就上山都唔錯,證明仲好健康,哈哈!!

我同老公子都係第一次去有雪o既地方,大鄉里出城心情特別興奮!!坐我o地附近有兩個似係東南亞o既人,佢o地o係火車入面已經不斷影相,似乎仲興奮過我同我老公子!!後尾大家互相幫忙影合照時交談o左幾句,原來佢o地來自泰國呀,唔怪得保暖措施比我o地更勁,哈哈!!

仲係好大霧呢,都見唔到雪山!!!

去到Kleine Scheidegg再轉車上Jungfraujoch,隨住海拔越高,氣溫開始下降, 我都著上羽絨喇!!

wow,開始見到雪喇!!

齒軌火車o係山洞內慢慢往上爬,雖然無景睇,但隨住火車越爬越高,空氣開似越o黎越凍,心情只有越o黎越興奮!!火車會o係中途停兩個站俾旅客適應海拔o既高度,雖然站外都無咩o野睇,但見到窗外一片白色依然好開心,哈哈!!

d雪好似好污漕咁!!

呢度就係d中途站喇!

有圖文介紹呢度係點起出o黎o既!!

經過近兩個鐘時間,終於上到少女峰喇!!

一落車,真係好凍!!!(噢,老公子眨o左眼!!)

我o地跟住人群先去冷洞睇冰,不過呢度除o左凍之外其實無咩特別,因為d冰雕都唔係特別靚同有特色!!

之後我o地就出去睇冰川...

不過當時天氣好差呢,冰川若隱若現,好免強先見得到!!

終於第一次踩o係雪上喇,其實感覺都唔係太特別呢,可能因為質感o係以前去o個d有人造雪o既地方無分別吧,哈哈!!不過,當我o地開始o係雪上行走時,開始感覺到呢個task一d都唔簡單,因為...因為我o地著o既只係普通波鞋,仲要係舊到鞋底都蝕晒o個d!

唔扶住o野我都勉強行到,但重心高o既老公子就唔得喇,佢行少少都好似會跌咁,好搞笑!!

之前睇過細佬影拖雪球好似好得意, 我又玩!!

呢班外國人好勁呀,咁凍都可以著背心喎!!!

由於天氣唔好,我o地o係室外逗留o左一陣就番入室內,行去搵地方食lunch!!

搵地方食飯時行經賣手信o既地方,見到好多人寫緊明信片,係喎,呢度係全世界最高郵局喎,於是我o地又買o左三張明信片分別寄俾兩邊家人同自己新居,哈哈!!無錯,自己都要留個紀念嘛!!

寄完明信片去食lunch,由於我唔餓,加上唔捨得百幾蚊食一個set,於是我o地只叫o左
一碟腸+薯條,我食幾啖就算!!我o地仲用曖wu沖番杯o係酒店早餐拎o既華田飲添,好味,不過室內暖氣太勁,無o左幻想中上山凍到結冰時飲杯熱華田暖肚o既感覺!!

食飽飽我o地就行去雪山最高點參觀喇!!

3571m!!

行出外邊睇風景...不過仲係好多霧呀!!
唔知點解咁高都仲有咁多雀仔呢, 好勁呀!!!

觀光位置地下係通lone o架,令畏高o既我行到腳仔軟!!

之後我o地就出去行雪山喇!!!!

頭先我o地就係o係山頂喇!!!
咦,天色比頭先光猛好多,天上o既雲散去後雪景好清好靚,仲好曬,曬到有d熱呢!!

d雲開始散呢!!!咦,後面一大班人咁熱鬧o既?

仲見到直升機呀,應該係有人滑雪受傷呢!!

原來一大班人咁熱鬧係o係度玩緊滑雪兜,只係5CHF咋,咁抵,我o地當然要玩啦!!點知我o地去到時d兜俾人租晒,等左一段時間先有得玩呢!!

gogogo!!!

滑落去幾秒鐘, 行上o黎就唔係咁易呢, 因為d雪好滑, 要行得好慢好小心先上得番去斜坡上!!

玩過番尋味,encore!!!

wow, 天氣超靚呢, 同頭先簡直180度轉變呀!!

曬到好熱呀,終於明d外國人點解著背心喇!!

每人滑o左兩至三次我o地就還兜兜喇,噢,原來o個5CHF係deposit喎,即係免費就有得玩,好開心!!

之後我o地就影下相!!

呢個路人甲好叻呀,影得好靚!!!

由於時間已經唔早,行動又不便(鞋底太滑), 我o地決定回程!!

忽然...

有隊雪狗隊經過呀!!!

d狗仔係咪好得意呢??好似笑緊咁呢!!!

因為有雪狗, 我大叫走o係我前廿尺o既老公子幫我影相,因為雪狗會經過我身邊,我仲企定定望住鏡頭笑晒...

雪狗走喇,我走前睇番d相好興奮咁問老公子,影唔影到?影唔影到?

影到...不過...相入面得d狗...
我呢??係相邊??? (左邊得3份1人o個個咪我囉...)

可以同雪狗合照o既機會就咁無o左,我明明就o係d狗側邊, 仲要己經不斷高呼叫我老公子'影相呀, 影相呀'...點解老公子只係識zoom埋d狗度完全忘記我o既存在???

我o個一刻真係嬲到爆炸,覺得老公子好stupid!!有咩理由我大叫大嚷叫住老公子幫我影相,佢竟然只影D狗...

火山爆發下,我...忽然間見到雪山圍欄外d雪好乾淨好靚...於是我用手指o係雪上面畫...

為o左影靚相,我免強抑壓住怒火,竟然畫左個...心!!

老公子見狀,知我忍左道氣,於是努力配合我,o係雪地上畫!!

所以,呢兩張雪地寫字o既相,其實係o係我滿腔憤怒時影o既!!!

其實諗番起都真係幾搞笑...老公子影相失敗作又多張作品喇!!!

真係走喇!!bye bye 冰川!!

bye bye jungfraujoch (音: 翁frau郁)!!!

落山時努力欣賞高山上o既點點風光!!!忽然諗...點解咁高地方都有咁靚o既花呢???大算然真係好神奇呀!!!

山下依然好多雲, 雲中忽然有個lone, 見到雪山, 畫面好有趣呢!!

 落山我o地無坐番去Wengen,而坐o左去Grindlewald!!

呢度係一個好多人讚靚o既地方,不過,我記得我搵資料時話呢度為保護環境,唔俾用油o既車行o架,但我去到時周圍都係汽油車囉...唔通Grindlewald變得太旺,所以要環保大倒退???

四圍都係車呀!!仲有大馬路添!!

o黎Grindlewald o既目的其實係去First坐吊車去行山,不過,我o地去到時已經近五點,得番尾班車,因為怕上o左去唔知行到幾點先落到山,怕天會黑,所以我o地最後決定唔行山住喇,橫掂聽日仲stay係呢度,聽日先再行吧!!

四圍行下Grindlewald !!!

回程!!!

係lauterbrunnen轉車終於見到兩卡車點接埋呢!!!

又坐超高吊車番murren喇!

勉強見到三座峰!!!

之前一日太夜到murren, 今日比較早, 終於見到多d遊人喇!!

至於今晚o既美食,就係瑞士有名o既瑞士芝士火鍋喇!!

之前已經聽過N咁多個人話我知瑞士火鍋好難食,因為酒味太重,建議我要食都好,叫一個share就夠,免得食唔晒浪費...結果,Murren呢間餐廳個menu,寫明Fondu o既minimum order係2!!!!

無法啦,都坐低左,於是我o地叫左一個最基本o既fondu, 一個menu上最貴o既mushroom fondu食!!

兩煲小小o既Fondu再加一大兜麵包,咁就47 CHF!!
眼闊肚窄o既我o地開頭仲覺得份量咁少,夜晚一定要食杯麵呢!!

用包浸一浸芝士再放入口,咦,幾好味喎!!

一向鍾意食Cheese o既我覺得好味都唔奇,最奇係見到酒店朝朝早餐都有芝士見到怕o既老公子都話味道好呢!!唔知係咪我o地一心諗住芝士火鍋係好難食,而家唔難食,所以出奇地覺得好味呢??

酒味係重,但唔係'好重',剛剛好,唯一美中不足係兩個fondu d味好似,早知叫tomato fondu味道可能分別大D!!

食fondue時窗外有兩個小朋友係度玩堆泥沙,我o係窗外引佢笑佢仲笑得好開心添,鬼仔真係特別唔怕生保呢!!

食完飯襯天仲光, 係murren周圍行下先!!

其實murren係上雪朗峰o既必經之地!!!

wow, 呢兩間木屋好靚呀!!!!

好似童話書d屋仔呢!!!

前面仲開滿白色小花添!!!

揀呢度落腳似乎無揀錯呀, 我就係想住呢d無城巿感覺o既地方呀!!!!

上: 山坡上不遠就有好多羊仔喇!!!
下:呢間屋門外有好大隻鹿頭骨做裝飾呢!!!

尋日太黑無影到, 呢間就係我o地住o既木屋喇, 可惜我o地住下層住唔到上層!!!

個view差d...

呢晚,老公子買左英文報紙睇,以解佢無得睇CNN之苦...哼,我特登book無電視o既酒店想感受o下離開城巿o既感覺, 老公子郤因此多多投訴呢...其實...無電視可以同我傾下計o者...估唔到我連電視同報紙都不如...