回顧過去,展望將來

又係時候回顧過去,展望將來!!

睇番一年前o既post"回顧過去,展望將來!", 目標原來好簡單咁只有四個:

1. 追番條龍仔!!

2. 老公升職加薪!!!

3. 年中第一次帶Koey去旅行開心又順利!

4. 乖豬越大越聽話, 健健康康快高長大 

結果呢:

1. 仔就係仔, 不過係蛇仔!!其實追o左幾個月都唔成功就已經唔太介意係龍係蛇喇, 總之最後可以o係個囡2歲咁上下為佢添個細佬/妹已經好滿足!!! 雖然今次陀得辛苦過上次好多, 但當知道係細佬時, 真係覺得好幸運幸福, 雖然我無信仰, 但都好想講句 '感恩'!!!

2. 上次陀Koey時升o左, 今年無!

3. 年中第一次帶Koey去旅行, 仲第一次帶Koey游水, 雖然基本上日日都好熱同有D辛苦, 但可以一家三口一齊去旅行點都係開心事, 值得值得!!

4. 乖豬越大真係越懂事, 當然, 仲未叫好聽話同埋都係勁怕生保, 但基本上都算乖巧, 而且病痛真係算係少, 都係健康快樂o既小朋友!!!

展望2013, 我希望:

1. 順利生番個肥肥白白健健康康o既蛇仔仔, 最好當然係產程快D, 唔使痛咁耐!!!

2. 成功餵人奶!!! 不過期望唔敢太大, 始終仲要湊Koey, Koey會唔會因為呷醋而成日黐身黐世都係一個關鍵!!!

3. 希望Koey鍚細佬, 兩姊弟相親相愛!!!

4. Koey搵K1順利, 最好當然係入到新屋附近o個間啦!!!

5. 搬屋順利, 換新屋有新環境新變化, 離開physically and mentally 被困o既困局, 我要積極D帶多D Koey出街見多D人, Koey適應新居順利!!!

6. 老公子升職加薪!!

7. 我生完身體早日回復狀態, 當然唔想好似上次咁坐月先o黎肥10磅減唔番啦!!!

8. 希望全家人身體健康!

9. 希望自己一湊二成功, 唔好人都癲啦!!!

2013將會帶俾我好多新挑戰, 希望我頂得住, 加油!!!

聖~誕~快~樂!

聖誕老人

"聖誕老人" 係乖豬目前識講最長o既一個詞語!!

著大人鞋

第一次見乖豬著大人鞋真係覺得好搞笑!! 上面段片係特登叫佢著o既, 估唔到佢又交足戲行到好似企鵝仔咁, 笑死人!!

乖豬19個月大!! (21/11 - 20/12)

乖豬19個月大喇!!!

因為18個月時病o左, 所以18個月零2周先去健康院檢查同打針!! 因為發展無咩問題, 下次番去就係4歲喇, 由於轉地址太麻煩, 下次番去又咁耐之後, 所以決定唔改地址喇, 不過我大肚o既檢查就麻煩D, 因為原來大圍最近o既健康院要去到瀝源呀, 但到大肚尾段要每兩星期番去大埔又好似太遠, 真係要再諗下轉唔轉健康院好...

講番乖豬:

體重: 10.5 kg (23磅, 60%左右, 有D進步呀!!)

身高: 84cm (80%左右, 我自己度, 未必太準!!)

發展無咩問題, 係俾姑娘叫我快D幫佢戒奶樽同學自己用開口杯飲奶飲水o者!

打針方面, 未打前俾人夾住唔郁得時喊得最慘, 但打完後都好快收聲!!! 

說話能力: 今個月最大進步就係呢樣!! 由開頭要分開咁講'媽咪', '蝴蝶', '企鵝'等詞語, 越講越快, 仲要只係用o左1-2日就由'媽媽'完全改口做'媽咪',話改就改, 好爽手!!! 而家最叻問'係邊?', '係度', 問佢係邊個或者D o野係邊個o既, 佢亦開始識答'藝', 爸爸同媽咪個名仲講得好清楚, 但硬係仲未學到自己個名!! 最長識講o既一個4字詞應該就係'聖誕老人'!!!



不過佢亦有D懶音, 就係硬係要講個'人'字做'UN', '上面' 個'上'講做'善'...教極都唔改, 真係好怕佢會習慣o左咁發音... 

另外, 由於大人講乜佢又跟, 有次我試過唔小心講'黐線', 佢真係差唔多音咁跟住, 真係嚇死, 以後講o野真係要小心D!! 

發展: 仲係未識落樓梯!! 另外近排係屋企愛上讀書, 由朝睇到晚, 好似好文靜...

認知能力: 認顏色有D進步, 除上個月識o既藍, 紅, 黃, 橙外, 開始識答綠色同黑色, 仲要講埋個'色'字, 而唔係就咁單字講顏色, good!! ABC繼續無進步!

自理能力: 開始想自己掉垃圾, 但由於佢知廚房唔入得, 所以佢成日就咁將D垃圾掉係廚房門口個地度, 搞到好似亂掉垃圾咁...等遲D搬屋後廚房做左開放式唔使再欄住佢時, 真係要教番好佢掉入垃圾筒先得!!


自己刨粟米, 但原來唔係太消化...


拎番上年件熊貓衫仔, 勉強仲著到!! 對番一年前D相, Koey大左好多喇, 好掛住Koey個BB樣呀!!

Koey: 雪 (雪人!)

呢日係牛牛打扮!!

呢日去o左Cosi Studio 影相, 其實我都未試過幫Koey打扮到咁lady, 原來都唔係太娘!!

衝落斜, 好有動感!!!

Merry Xmas!!

結構性超聲波檢查 (22W)

13/12

老公子特登放假陪我出TST照結構, 11點去到量血壓同留小便, 之後問下原來要等3個, 預計要個半鐘, 於是我同老公子就先去食o野先!! 

我o地去o左老趙, 味道唔錯!!

食完就番去診所再等, 差唔多1點終於入得, 呢個醫生一路照一路唔停口咁講, 不過講o黎講去都係o個幾句, 只係repeat照Kobe仔重要部位都repeat o左有廿次...可能佢覺得大眾最關心呢點啦, 所以不斷重複...我反而覺得上次阿女時去威爾斯個姑娘續part介紹o黎得專業同詳細!!!

照o左15min 左右, Kobe仔一時做yoga, 一時食手指, 一時又捉腳仔, 總之無時停, 係個健康BB, 不過可能照得太快, 我同老公子都覺得咁就盛惠$2050, 真係肉都赤, 仲係覺得威院俾唔到結構期我好唔抵!!!

(Kobe 仔D 超聲波相後補)

點半走得, 行o下美麗華, 原來basement 間Todai close o左後開左少少家品舖, 其中一間專賣好似變型金剛咁o既傢俱, 都幾得意, 價錢雖然唔係想像中咁貴, 而且樣樣都可以接合又好似真係好慳位, 但我真係好懷疑買o左番屋企o既人係咪真係會日日咁又開又關!!

美麗華

行完我o地就番出去旺角, 因為要去砵蘭街睇趟門同玻璃!!

先去朗豪坊

因為想用coupon食雪杯, 開頭以為咁好有得坐, 點知堂食原來貴D仲要計加一, 不過都坐低左, 無理由走...

之後就行砵蘭街, 唔知係咪今次無上次行咁耐, 定係我狀態真係好左, 今次無行到腰斷咁辛苦, 亦睇中o左一D簡單款o既趟門, 總算完成任務!!!

一年前後

一年前我生日當日一家三口去o左香港公園影相, 眨o下眼事隔近1年, 因為要去觀禮, 我o地一家三口再次踏足香港公園影o下相, 過o左個好開心o既下午!!

番到屋企入番D相落電腦, 順便開下一年前o既相望下, 嘩, 日日對住個囡都唔覺, 原來眨o下眼乖豬大隻過一年前咁多!!!

我一路睇相, 一路就忍唔住講: 好BB呀!! 

本來我都唔係成日懷緬過去o既人, 但睇到D相, 真係好難唔令我驚嘆一句: 時間過得真係快呀!!

haha, 一年前乖豬半歲都未夠, 要單手扶住佢坐!!


而家會行會走不特止, 仲識望鏡頭影相!!

重量方面, 半歲未夠時我諗最多都係15磅吧, 而家22-23磅喇, 我想抱耐D都唔得喇, HAHA!!!

至於大人呢, 有人話我瘦o左, 老公子就肥o左少少, 我同老公子就覺得大家都係差唔多!!!

一年前後, 對於大人o黎講分別可能真係微不足道, 但對於小朋友, 一年o既變化竟然可以係咁大, 有時真係唔怪得家長們為o左仔女'快高長大'呢四個字而努力選擇最有營養最健康o既奶粉同食物俾小朋友!!!

自從乖豬轉o左食Illuma到而家都超過3個月喇, 呢3個月以o黎乖豬長肉o左, 高o左, 亦一次都無病過, 真係令我呢個家長好滿意, 證明轉奶粉呢個決定真係無做錯!!!

不過呢, 最近唔知係咪猛長期定乖豬長高o左拉長o左個人, 乖豬面仔無咁包包面喇...就連我日日對住佢都好似覺得係呢, 不過同一時間, 乖豬其實係食多o左奶o架, 之前夜晚因為近晚飯時間, 開5安左右佢就夠, 點知呢排佢多左話唔夠, 於是我就開番同朝早一樣開番多D俾佢, 佢有時清晒有時食剩1安咋, 睇見佢食得咁開胃咁開心, 我都好滿足呢!!! 

你睇我飲o左幾多奶奶!!

其實睇見乖豬一年前後變化咁大, 佢無咁包包面, 大個女o左其實可能都係成長o既一部份, 話晒都歲半喇, 唔通仲好似BB咁肥嘟嘟一舊飯咁樣咩...HAHA, 其實乖豬頭髮一向多, 個樣一早都唔係好BB, 有D老積, 真係一方面又想佢'快高長大', 一方面又有D唔捨得BB樣o既佢, 呢種心情真係好令人矛盾, HAHA!!!  

如果每年都一家三口去番同一個地方影一次相做對比, 相信一定好有趣!! 

期待乖豬繼續食得健康, 食得開心, 期待每一個明年今日!!!!

===================================================================

最後講番我生日正日!! 因為之前提早o左慶祝, 今日又因為要去睇concert, 所以中午抽o左少少時間同乖豬落公園仔影合照!!!


食個迷你蛋榚當慶祝!!

呢張合照好靚呀!!!

二人合照, 乖豬出世後都好似好少影!!

是晚睇軟硬VS草蜢演唱會, 乖豬出世後第一次兩公婆放低個女去街去到咁夜, 辛苦晒媽咪幫我湊乖豬訓覺, 仲要留守到我同老公子成12點幾番到去先走得, 真係多謝媽咪呢!!!

乖豬歲半健康院檢查

由於乖豬歲半o個幾日病o左, 所以遲o左兩星期先番健康院, 成績表如下:

體重: 10.5 kg (23磅, 60%左右, 有D進步呀!!)

身高: 84cm (80%左右, 我自己度, 未必太準!!)

發展無咩問題, 係俾姑娘叫我快D幫佢戒奶樽同學自己用開口杯飲奶飲水o者!

打針方面, 未打前俾人夾住唔郁得時喊得最慘, 但打完後都好快收聲!!!

不過龍年效應, 今日健康院真係超多龍B, 又熱又焗, 乖豬由入健康院至走得呢兩個鐘入面佢都好不安, 猛咁叫'出出'表示要走, 但當Grandma抱佢出去行o下時, 又不斷喊喊o地口叫'媽咪', 好似想救埋我走咁, 真係令我覺得又冧又搞笑!!

=====================================================

體重方面上到60%真係有D surprise, 因為出世到一歲一直都係維持o係50%條生長線, 估唔到今次會多過50%, 我諗同我呢段時間轉o左食Illuma都有D關係呢, 真係轉得好, 真係要keep住食落去呢!!!

不過, 講番戒奶樽, 其實乖豬5個月就識用飲管, 但一直用飲管杯都係間中飲D間中飲D, 要我一下用飲管杯代替奶樽真係無咩信心, 好怕佢又係好似飲水或其他o野咁, 鍾意先飲啖啜啖, 咁一支奶都唔知幾時先飲得完, 都咪話唔煩惱!!!

至於開口杯呢, 呢個我反而想開始train佢, 不過得歲半人仔, 倒瀉就難免, 所以都係諗住用水練習先, 費事倒到成身都係時清潔就麻煩, 特別而家入冬開始凍, 仲麻煩!!!

所以同我媽咪相量過後, 我都係決定過o左呢個冬天先開始戒奶樽計劃, 費事而家戒搞到食到天一半地一半, 又或者等到D奶凍晒都食唔完咁浪費!!!!

乖豬呀乖豬, 俾多個冬天你同奶樽親親啦, 有時睇見你用奶樽食奶食得咁滿足, 唔好話你, 連媽咪都唔捨得幫你戒呢, HAHA!!! 


食住奶都古靈精怪!!

清晒, 真係乾杯呢!!!

乖豬歲半大!! (21/9 - 20/10)

都快19個月大喇, 而家先o黎補番18個月o既blog...其實都唔係太記得呢個月發展係點喇...

體重: 23磅

身高: 84cm

便便: 隔日先便便一次

食: 每日2餐粥, 2餐奶+1餐Tea

說話能力: 開始控制到嘴仔講詞語, 最快識講應該係'蝴蝶', '早晨', 而 '媽咪'亦越講越流利, 但仲係主要叫緊我'MAMA'!!

另外, 仲越o黎越識用學到o既字, 唔係再跟住大人講先講, 好似見到污漕就會叫大人'抹', 要著/除衫時會講'著'/'除'!!

發展: 行得快o左, 鍾意追o黎追去玩'lei'埋, 一問佢'沛藝係邊?'佢無論身處何方都會即刻笑晒咁走出o黎!!

認知能力: 無乜進步, 停留o左係認識1-0同大階A, B, C, 其他英文字母學得好慢, 問親又唔係太願答!! 另外, 開始識'repeat' 我肚入面o個個係弟弟, 弟弟係一個BB之類, 但實際明唔明真係佢先知!!

自理能力: 開始想自己'畢'o野食, '畢'得好左少少, 但我仲係怕佢整到周圍污漕晒而好少俾佢試!

寫住咁多啦, 真係無乜印像喇!!

(post相太麻煩, 有時間先...)

胎動 (18-21W)

21W磅重番番去120磅喇, 不過我覺得呢日著件冬天衫重D, 所以實際可能唔夠120, anyway, 跌8磅升番4磅, 都OK啦, 話晒我出街都仲係嘔得幾勁, 所以暫時體重升得慢D都好正常!!!

講番胎動, 其實踏入16周已經好似feel到少少, 但由於Kobe弟弟實在仲細, 所以每次我'feel'到後都好唔肯定!!! 踏入17周, 胎動開始比較'實在', 我亦比較肯定, 不過上胎我都係17周就feel到胎動, 所以今次都係差唔多, 唔算早過上次!!

唔知係咪我已經忘記乖豬o個陣o既胎動係點, 硬係覺得Kobe弟弟D胎動好似勁D, o係19-20周開始, 我已經係無時無刻都feel到弟弟踼我, 連企o係度都feel到, 到20-21周, 直頭多o左feel到佢好似打司egg 咁有規律地踼, 我印像中Koey應該無咁早打司egg吧??同埋o個陣好似企o係度就無乜feel到踼?? 


由於胎動都幾明顯, 有時仲踼到近肚臍位, 所以呢排都有試o下叫Koey摸下弟弟, 上面條片仲拍到佢俾弟弟踼到'噢'一聲叫, 好肯定佢摸到!!! 雖然同Koey講過弟弟係Baby, 叫佢鍚佢, 佢亦都好似好明白咁, 但唔知o係Koey腦仔入面, 會覺得我肚入面郁o既係乜東東呢??? 真係世上只有BB Koey先會知喇, 到佢大個, 睇怕佢睇番片都唔會明, HAHAH!!

落樓梯 & 改口叫媽咪

終於識識o地落樓梯, 另外, 仲完全改口叫我'媽咪', 唔再係'媽媽'喇!

轉奶粉FAQ

自從寫o左幾篇blog講乖豬轉奶粉後, 身邊多o左朋友問我關於Illuma o既o野, 綜合番媽媽朋友們o既問題, 其實都離唔開下面呢幾樣:

1. 隻奶粉係咪真係好好?

2. 食o左後便便好唔好? 有無熱氣?

3. 開幾多份量?

其實朋友們唔多唔少都聽過Illuma呢隻奶粉'好', 所以一知我幫個女轉o左, 就紛紛踴躍查詢, 想知點究竟點'好'法!!! 情形就好似我當初'聽聞' Illuma幾好幾好, 但真正點好, 始終都係要問過身邊o既'用家'先覺得夠忠肯, 夠真!!!

好啦, 等我就上面3條問題一次過o係度解答先:

1. 好!

其實...呢條問題好難答'唔好', 基本上唔好話Illuma, 我深信而家科技咁進步, 好少奶粉真係會食得BB'唔好'!!! 至於對於乖豬o黎講, Illuma'好'o係邊呢?  相信就係'長肉'o左喇, 呢樣真係比較明顯見到o既, 相信真係吸收好o左先會咁!!

2. 轉奶粉初期便便差o左, 但適應後就好好, 亦無熱氣!!

唔好話我一直只講Illuma好話, 其實之前都有提過乖豬開頭轉食Illuma時便便係差o左o既, 開頭真係有擔心係咪乖豬腸胃唔適合呢隻奶粉!!! 不過好好彩, 食o左大約2星期左右, 便便慢慢回復番正常, 及後一直到而家都無再試過便秘或去便便辛苦, 所以我諗開頭只係腸胃適應問題, 只要適應o左就無問題喇!!! 如果媽媽們遇到類似問題, 記得轉奶粉期間都要俾BB有充足o既水份吸收, 有咩問題可以打去Illuma熱線問姑娘!!

3. 乖豬食o既係3號, 最近早晚都係開 180ml水 + 4殼半奶粉, 開出o黎8安左右!!

其實Illuma 3號罐上建議開o既份量係130ml水+3殼奶粉, 開頭我都係跟呢個份量, 然後再跟據乖豬o既胃口慢慢加減!!

希望以上解答可以幫到想了解呢隻奶粉o既媽媽們啦!!!

笑到傻o左!

呢排講o野進步o左好多, 仲成日自己發明D新'terms', 無人明佢講咩時佢就最開心, 拍片呢度就係咁笑到典晒床!!!

三隻小豬

好認真咁聽故仔!

食麥皮

開始'筆'到o野食, 但我仲係好怕佢'筆'到成地都係...

乖豬1歲半喇!!!

乖豬1歲半喇!!! 

不過今日我同乖豬都病病o地, 成日流鼻水呀, 仲要去睇醫生添, 好彩食完藥好似真係收番鼻水, 同埋病得都唔太重, 所以乖豬仲係好精靈, 希望乖豬繼續身體健康, 聽教聽話啦!!

詞語

開始控制到嘴仔講詞語喇!

Fill in the Blanks!!

Koey次次訓覺必聽o既歌仔, 估唔到聽得多, 自己識fill in the blanks添喇!! 希望大家聽到佢唱咩字啦!!!

第一次威院產檢 & 第三次私家產檢 (15-17W)

29/10: 

第一次威院產檢, 磅重52.9KG, 即都係116磅左右...

今次唔算等太耐, 見醫生我只係俾第一次ultrasound d 相佢, 希望有機會令佢跟呢個時間改我EDD 而俾structure個期我...點知都係白費心機, 因為佢地有我照oscar o既record, 話BB size跟到last M個EDD o既生長線, 所以唔改EDD, 結果structure都係 話我知無期俾唔到我, 真係失望!!!

所以而家我政府EDD 係 4月16, 而私家照o個兩次EDD就4月19同4月22, 其實我M一向唔準, 4月16一定無可能, 我自己就選擇跟4月19個日子當EDD啦, 因為上網睇D人話8-10W度o既size應該比較可靠!!!

到聽心跳, 原來唔係心跳, 而係照超聲波, 不過醫生一照到心跳叫我望完就無再照, 我只係望到BB心跳同好似見到佢隻腳板仔, 想望多眼都無...之後醫生亦無問我細左o既o野, 咁就睇完, 好求其!!

======================================================================

10/11:

踏入第17周, 仲記得上次陀乖豬時呢個周數去照性別, 結果照o左3次都睇唔到, 當時覺得個checking好似好無謂嘥o左D錢咁, 仲同老公子講, 早知唔check!!! 點知到今胎, 又係為o左只係知個性別, 我都係忍唔住呢個周數走去檢查, HAHA!!!

今日診所唔算多人, 加上有老公子陪我等, 再加上對面開o左間影碟舖播緊"喜愛夜莆2", 睇o下傾o下好快就叫我名喇!!! 

入到去量血壓磅重, 重量比上次去健康院升番1磅多D呀, 睇o黎嘔少o左體重終於止跌回升啦, good呀, 不過由於出街嘔吐問題依然嚴重, 醫生都會繼續開維他命同鈣片俾我o既!!!

到照超聲波喇!!! 先睇到眼窩鼻同嘴仔, 再睇心跳同D手仔腳仔!!! 不過當佢睇緊手仔腳仔時我已經忍唔住狂睇BB脾LAR, 好似見到D o野喎... (後尾先知老公子原來同我一樣都留意緊脾lar!!)

好喇好喇, 醫生終於睇脾lar喇, 佢話'明顯有d o野喎', '肯定係喇, 咁都仲唔o係?'

原來真係'仔'呀!!!! 而且仔真係好易睇, 易睇過女好多好多呀, 唔係馬後炮, 但我同老公子真係醫生未講前都已經睇到係仔, 只係無醫生肯定而唔敢確定咋!!! 

好喇, 之後就照size喇!!!

肚圍: 63%, 少少大肚腩!


頭圍: 82.5%, 大頭仔呀!!! 而且一照個頭時, 醫生同我都不約而同一樣反應, 就係覺得個頭好圓好圓, 唔似普通頭形咁窄D扁D!! 之後醫生都話個頭形可能似我老公子圓D, HAHA, 我都覺我老公子係大頭仔o架喇, 只係佢高唔太覺, 估唔到醫生會係我知音, 總之我個頭一向唔大仲偏細, 呢個頭仔點都唔係似我呢, HAHA!!!

haha, 搵番乖豬17周照o既超聲波, 細佬個頭真係明顯地圓好多呢!!!




大脾骨: 13.9%, 噢, 咁短o既, 似我老公子無理由咁短腳喎, 老公子呢方面就話係似我, 但我點都唔認, 女仔o黎講我對腳都唔算短o卦...

就係咁, 開開心心照完同俾o左8舊幾水, 雖然都係好貴好貴, 但今次知道性別好似已經係一大收獲咁, 老公子見我咁開心仲問我係咪貴D都會照, HAHA!!



講番知道係仔o既心情, 其實知道係仔後我又試好似上次知道係女咁開心到有D眼濕濕同忍唔住猛笑!!! 等我仲以為一向鍾意女o既我今胎真係無咩要求, 但原來知道係仔o個刻都會咁開心, 真係自己都估自己唔到!!! 反而上胎已經想要仔o既老公子話佢都開心但感覺唔大喎, 無咩特別...男人真係男人, 估唔到可以冷靜到咁都無反應...都唔知係咪唔肯去表達o者, HAHA!!

BTW, 上胎諗英文名時已經改好o左仔o既名, 以後就叫蛇細佬做Kobe仔啦, 請大家多多指教!!

P.S. 今胎嘔咁勁, 睇o黎都可以入埋係陀仔數喇!!

兩歲的我

今日係我生日, 成日都post 乖豬D Video, 今日就等我自己做番主角啦!!!

以上片段係我兩歲生日時拍o架, 亦係我人生入面第一段被記錄落o黎o既片段, 好珍貴呢!!!

奶粉唔溶點算好?

又隔o左兩個星期喇!!! 

上回提到多得姑娘跟進同幫助, 乖豬D便便總算正常番好多!!!

無錯, 奶粉再好, 充足o既水份對BB o黎講始終係最重要!!! 乖豬飲親水都一啖起兩啖止, 唯有o係湯水方面補充多D, 咁樣先可以更好咁發揮奶粉o既好處!!

便便問題終於解決o左, 今次係開奶問題!!

其實轉o左食illuma後已經發覺佢比較難溶, 乖豬每次食完奶都不難發現奶樽內有不少一舊舊奶粉未能溶解,  我試過先加2殼搖一次後才再加2殼也未能解決呢個問題!! 但上次姑娘至電時我掛住問便便問題忘記o左問呢樣o野, 真係大頭蝦!!! 

今次姑娘再至電跟進, 我終於記得問番呢個問題, 原來只要用筷字幫手搞下就可以, 試完真係比我狂chok支奶有效好多, 估唔到方法只係咁簡單, 我竟然無諗到喎, 失敗!!!

未得到姑娘提點前, 食完奶後, 樽內有好多一舊舊奶粉固體未溶解!

聽姑娘建議後, 固體奶粉即刻明顯地少o左好多!!!

為o左等大家都唔使再浪費奶粉, 等我再詳細d解釋下我而家沖奶粉o既程序啦!!!

而家乖豬食o既份量係: 

早上: 180ml 水 + 4 殼奶粉

晚上: 130ml 水 + 3 殼奶粉
step 1: 將150ml (夜晚用100ml) 室溫水倒入奶樽
step 2: 將 30ml (早晚一樣) 熱水 (熱水壺熱水約90度) 加入奶樽
step 3: 將 4平殼Illuma奶粉加入奶樽 (illuma奶粉罐內有方便刮平奶粉殼o既設計, 真係超細心!!!!)
step 4: 以攪拌棒或筷子插進奶樽, 再順住一個方向垂直打圈攪拌約5秒
stgp 5: 最後擰上奶樽蓋再雙手搓奶瓶數下

跟住以上程序不單可以令奶粉溶解得更好, 更可以減少氣泡形成, 咁就可以少D風飲入BB肚仔喇!!!

希望食緊illuma o既媽咪都覺得呢篇blog有用啦, 以後就唔使再浪費奶粉喇!!!

害喜改善了一點, 但體重還是...(13-14W)

自12周後害喜好似真係改善o左少少...

無錯, 只係少少...至少, 精神好番D, 肚餓時亦唔會好似之前咁辛苦, 食o野o既份量亦無之前咁少, 之前可能食幾啖都嘔, 而家應該食到半碗先嘔吧...

anyway, 出街食o野真係可免則免喇, 基本上食少少都必嘔, 反而係屋企坐定定就可以食多D, 好間中都可以食到正常份量而唔嘔, 所以而家約親朋友見面, 甚至同屋企出街lunch, 我都真係寧願坐係度唔食好過, 最多打包番屋企先再開餐...

而家個肚又再大o左, 好似至少有5個月肚咁, 但其實4個月都未夠...有時都希望時間可以過得快D, 上胎6個月止嘔, 希望今胎唔好破紀錄吧!!!

至於體重...以為嘔少o左DD體重應該可以止跌吧, 點知14周尾再磅, 得116磅多少少, 比做oscar時跌多1磅喇...噢, 差3磅就回復我未有Koey前o既體重喇, 估唔到生完乖豬一直跟身呢10磅肥豬肉會o係大肚時自動走左先得o架...真係令人又愛又恨呢!!!

轉食Illuma ~ 跟進

眨o下眼食o左Illuma都有一個月喇!!!

開頭真係唔多習慣開奶粉個份量, 因為罐身suggest用130ml水開3殼奶粉, 出o黎得5安多D, 而我就成日以為乖豬食開以前o個隻都有8安啦, 所以我一開始食illuma時就好大貪, 用180ml水開5殼俾乖豬食, 點知乖豬成日食剩3安甚至4安...waste o左咁多奶粉都咪話唔肉赤!!!!

其實waste o左D奶粉肉痛都係其次, 最擔心反而係佢轉奶粉頭個幾兩星期D便便都麻麻o地, 變o左一粒粒咁去得唔多順, 唔知係咪轉奶粉腸胃唔適應!!!

不過好好彩, 後來Illuma o既姑娘打o黎跟進, 佢建議我盡量餵番多D水俾乖豬飲, 如果乖豬飲水少, 咁就要餵佢餵密D, 等佢吸收多D水份, 同埋開奶粉o既份量跟番罐suggest o既份量, 唔好一下就開咁多, 等BB適應o左隻新奶粉, 食完唔夠先慢慢加番D份量, 唔好操之過急!!

聽完姑娘o既意見, 再加埋自己o既觀察, 而家我朝早開180ml+4殼奶粉, 夜晚就因為近晚飯時間, Koey比較飽, 就開130ml+3殼, 可能因為朝早餐奶水o既份量多左, 加上乖豬腸胃開始適應, 便便真係好番呢, 咁我都放心D, 真係好多謝Illuma姑娘o既專業意見呢!!!

而家, 飲o左Illuma一個月喇, 乖豬而家D便便完全正常之餘, 唔知係咪吸收真係好o左, 乖豬D肉地好似真係實淨過未飲Illuma之前, 有時近鏡影相, 仲會影到乖豬好似好肥好好肉o地咁, 騙得下人呢!!!

真係好想mit下佢面仔呢!!!

 
行路方面, 越行越穩陣喇, 差在仲未跑!!!

力大無窮!!

乖豬17個月大!! (28/9 - 25/10)

乖豬17個月大!!!


體重: 22-23磅

身高: 無度

便便: 大約每日1次, 間中會隔日

食: 每日2餐粥, 2餐奶+1餐Tea

說話能力: 今個月學講o野進步神速, 已經數唔到佢識講咩新o野, 總之大人講乜佢好多時都會執人口水尾跟住講個尾音, 聽歌都係咁, 仲會成日order大人做o野, 好似佢喊有鼻水或見到有地方污漕就會叫人'抹', 玩玩具要倒晒d o野出o黎就話'倒', 我見佢學講o野好似快o左咁多, 決定慢慢教佢叫我'媽咪', 不過暫時成效麻麻, HAHA!!!

另外, 仲開始識apply學到o既生字, 好似之前餵過佢食綠色o既豆豆, 之後佢見到玩具上面有D好細好似豆咁o既珠仔或圓形都會叫'豆豆', which我係從來無咁樣叫過呢D物件o架!!

發展: 開始古惑o左...其實乖豬不嬲都帶點爸爸古惑o既基因, 但而家更顯露出o黎!!! 好似搬運佢堆公仔出入房同大廳, 佢而家會一開始就塞晒其他公仔俾你, 自己最後先拎佢最愛o個隻!!!

仲學識講反話, 上個月問佢鍾唔鍾意媽咪(or others), d o野好唔好味, 佢全部會up頭, 但今個月開始全部變晒擰頭呀, 仲要係邊奸笑邊擰, 分明係講反話, 可能係之前佢講第一次時見到大人反應好開心, 仲會Jit佢, 佢覺得好好玩, 所以次次都講反話, 搏你jit佢同佢玩, 真係好百厭!!!

另外, 仲好鍾意重覆大人o既rules, 好似我o地教佢唔可以坐o係我肚度彈彈跳跳, 坐爸爸先可以, 咁佢就會伸直手掌仔向住我邊左右擺動邊口講'nono', 表示我唔可以, 之後就會望住爸爸up頭, 表示爸爸可以, 之後仲會repeat 幾次去confirm條rules, 好似make sure佢清楚無搞錯咁, 好搞笑!!

跟住就係識得收埋D 物件o係身後然後扮無, 仲會自己覺得好好玩而忍唔住笑, 真係激死人, HAHA!!



認知能力: 一路都有教佢形狀, 數字, ABC同顏色, 形狀o係上個月佢應該已經識識o地, 但真係到而家都唔肯再入形狀, 都無得再confirm佢識唔識...至於數字同ABC, 今個月無啦啦認得, 由月初認得大階A, B, 同C後成日周圍見到就會大叫呢D英文字 (特別係'B'字), 到近呢個月尾發現佢認得晒貼係白板o既1-0, 真係好驚喜, 因為之前佢一直只係認得個'1'字o架咋, 估唔到無啦啦識晒其他, 仲要唔只認得, 仲識講埋, 真係要讚下!!! 最後就係顏色, 我搵番一直放埋一邊o既顏色玩具出o黎, 我拎一隻色出o黎叫佢拎番一樣色, 原來佢係識o架, 當然, 佢仲未認得'紅'係咩色, 但我已經覺得進步o左, 至少佢原來對'顏色'呢樣o野已經有concept呢!!!

仲有, 可以準確咁指住頭髮/鬍鬚/手毛講'髮'/'鬚'/'毛', haha!!!

自理能力: 呢個月開始識得主動表示要坐potty去便便喇!!! 其實乖豬無o係片片去便便好耐o架喇, 但一直都係我兜佢去小便佢就會順便去埋便便, 而家我狀態唔太好, 所以少o左兜佢小便, 變相佢無得'順便'去便便, 變o左佢要去時識得主動摸下條片向我示意, 仲會主動走埋去potty度拖個potty出o黎想坐添, 開頭我都唔肯定佢咁樣係咪撞彩o架, 但至今已經超過5次咁樣喇, 都幾肯定真係戒片在望喇, 而家只係差佢唔肯小便都去potty咋, 希望佢快D學識埋, 唔好咁懶成日係片片去就好喇!!!

最後, 又係揀歌仔, 今期佢識表示想聽咩歌喇, 因為有首歌仔有'紅蘿蔔', 於是佢想聽就會講'蔔蔔', 唔使我成日估估下!

(成個月好多相, 不日再update)

踏入開學季節後...

踏入開學季節之後, 好多小朋友都開始揹起書包番學喇!!!

至於乖豬呢, HAHA, 仲未番學, 所以仲係日日玩樂中!!!

20120905: 游水!!! 游o左5次水左右, 而家未落水已經識開心定, 落到水仲開心到笑晒同腳young young!!! 就咁用水袖就浮到, 叻!!!

20120907: 去Snoopyland玩, 點佑因為曾落雨, 所以close o左, 但乖豬見到Snoopy就衝埋去好開心咁!!!

 
20120915: 呢日跟老公班波友齊齊入長洲玩!!! 乖豬第二次去沙灘呀, 再唔去秋天就o黎, 要出年先有得再玩!!

呢日乖豬都好合作, 訓o左近兩個鐘, 一起身就玩沙喇, 好enoy!!!!

不過好搞笑, 佢唔慣o係沙上面行個感覺, 開頭放佢企係度佢就一步都唔敢郁, 兩腳插係地一味大叫抱抱要人幫佢!!!

唔幫佢咩佢又無發脾氣喎, 反而企係度彎腰玩沙, 個pose好搞笑!!! 結果佢要到臨走前先適應到D沙, 總算敢周圍行喇!!!

老公子D friend留係長洲過夜, 我o地就坐5點幾船走, 番到屋企都7點半有多喇, 呢日真係好攰呀, 但睇見乖豬玩沙咁開心都值o既!!!!

haha!!! 乖豬就仲o係度吃喝玩樂, 但同一時間, 我o係fb度亦開始見到同乖豬差唔多大o既小朋友媽媽都開始為報N班而頭痛...老實講, 睇見人o地咁緊張我有時都會有少少壓力o架, 係咪我太唔著緊? 係咪唔幫乖豬報N班乖豬將來就唔夠人爭???
...anyway, 而家先諗呢個問題實在太遲, 況且, 我亦唔係今日先諗呢個問題, 自day1 決定做全職媽咪我已經決定唔報N班, 我應該對我呢個決定有信心!! 乖豬o既禮貌學識守規矩我日日對住佢應該都可以應付到, 係唯一群體生活呢方面未必俾到佢, 唯有第二時勤力D帶佢去同我D全職媽咪朋友屋企同其他小朋友玩, 等佢學習下點同其他小朋友相處!!!

講開開學, 近排亦多o左見到朋友/blog友o既小朋友病倒o既消息!!! 唉, 真係無法子, 而家D小朋友越o黎越細就要番學, 連流唔流口水都未控制到更莫講話注意衛生, D病菌一個傳俾一個, 想唔病都難!!! 

慶幸, 乖豬出世到而家都未試過點大病, 只係試過傷風咳流鼻水2次, 就連平時去健康院打針都無咩發燒反應, 唯一一次發燒就係幾個月之前玫瑰疹o個次, 雖然比起其他BB佢只係燒兩日已經算好快好番, 但諗番o個兩日平日精乖活潑o既乖豬咩精神都無晒, 做爸媽o既又點會唔擔心!!!

 

仲記得出玫瑰疹o個期正正係我預備想幫乖豬轉食Illuma o個段時間, 如果唔係出疹, 我本來會早少少轉, 不過亦因為咁, 帶乖豬睇醫生時就順便問埋醫生應該咩時候轉奶粉同對Illuma呢隻奶粉有咩專業意見!!

仲記得當時醫生話就算退o左燒, 都要等D疹出埋同完全清晒先好轉, 因為剛病完身體都未恢復就轉奶粉身體o既適應能力可能比較差, 萬一轉奶粉有咩反應時又分唔到係未病好定係轉奶粉問題, 咁就麻煩!!! 

至於Illuma 呢隻奶粉呢, 醫生話都有好多BB媽咪問起佢, 佢話呢隻奶粉有隻成份叫Sn-2, 對BB腸胃同吸收都有益, 叫我等乖豬好番可以放心轉!! 連醫生o既專業意見都讚呢隻Sn-2呢, 咁即係代表我之前上網搵o既資料無錯啦!!

就係咁, O係做足資料搜集同得到醫生o既專業意見支持下, 我對轉奶粉呢個決定真係更加有信心, 為o左要俾最好o既乖豬, 等佢可以健健康康肥肥白白, 我終於等乖豬病好之後正式轉食Illuma!!!!

而家, 飲o左Illuma都一排喇, 係除o左開初兩星期乖豬唔知係咪病完腸胃唔適應而令便便差o左外, 而家便便完全正常番之餘, 吸收亦好似真係好o左, 乖豬D肉地好似真係實淨過未飲Illuma之前, 有時近鏡影相, 仲會影到乖豬好似好肥好好肉o地咁, 騙得下人, 我諗呢樣真係所有父母最開心o既事呢!!!

講o下講o下好似講遠o左添, 總之, 無人想睇住自己小朋友身體弱同生病, 老土D都係o個句, 健康o既身體幾時都對人係最總要, 如果唔係唔好話玩水玩沙, 就連去番學都難呢!!!!

最後送上近照一張!!!

20120920: 乖豬16個月大喇!!