接放工

今日honey出o左銅鑼灣陪我食飯,之後仲一齊行街睇波鞋!!放工又接我陪我一齊番屋企,好開心呢!!!

疲

尋晚又發惡夢,雖未至於嚇醒,但夢見俾人追殺始終唔係幾好,訓醒好似無訓過咁,加上尋日行o左成日山,除腳指腫痛外,仲腰酸背痛(真係打波都無咁支力...),好彩老細話聽日先俾task我,所以今日都仲幾遊閒(就算今日俾o左我做,相信我個腦今日都運作唔到...)!!!!

經尋日Pat一提話要做鄰居,我今日就用o左個下午睇o左好多資料...不過我估都係得個睇字...

P.S. 有個Master同學仔問我MSN張相(早幾篇blog深田恭子張相!)係咪我喎,開心死!!!!

畢業相大雜匯

約o左十一點係CU,所以九點幾起身化妝扮靚靚,今日我約o左三班唔同o既friend由朝影到晚,所以要保持最佳狀態!!!

反轉CU第一轉:

時間:1100 - 1400
人物: Vivi, Vivi男友(攝影師) & 舊同事施主(苦力及燈光)
留腳毛地點: 新亞書院牌匾、孔子像、草地、天人合一、U Lib、迷宮、空中花園(我唔知o個度叫咩名,自己作!)、小橋流水、藥園
特點: 最緊要'正'字、攀樹、Yes封面、以白色雨傘代替反光板打光、兩個半小時狂影百多張相...總之又嘔心又奇離...不過d相應該幾靚,好期待快d有得睇!!!!

反轉CU第二轉:

時間:1400 - 1630
人物: Bely, Solon, Sam, Natalie
留腳毛地點: 荷花池、U Lib、中大牌匾
特點: 交換生日禮物(我同Natalie)、最緊要'正'字(有中學同學會o係節目中被訪呢!!!!...呢個節目太紅喇,兩班friend不約而同提及到...或者中大校園同呢個節目o既關係實在太深入民心!)、烈日當空、汗流浹背、妝'溶'、高人一等o既Sam攀上中大牌匾高峰...d相比第一轉正經,但陽光充沛,希望d相唔好影到我個妝溶同埋油光滿面!!

反轉CU第三轉:

時間:1630 - 1800
人物: Pat + 第二轉人物 - Natalie - Sam + Bely's 同學
留腳毛地點: 新亞書院牌匾、孔子像、天人合一、天台(唔知咩building o既天台)
倩影特點: 交換生日禮物(我同Pat)、靚...當然唔係指我啦,因為有大美人Pat在場嘛,影到日落美景!!!

三轉過後,星期五打波整親o既腳指痛到腫o左兼成身散晒!!!...吸收今次經驗,下星期如果再係咁熱,我一定唔再著長袖衫,仲要帶定波鞋...著住番工鞋o係中大山頭通山走真係唔易呢!!

之後我本來仲有下場,但由於約唔齊小學同學,所以取消o左!!!所以夜晚得我同Pat撐台腳,之後仲一齊shopping,繼之前發現大家不約而同買o左同一條褲後,今日Shopping又發現大家都鍾意去同一間boutique,佢試衫時我唯一拎起拼過o既褲佢及後都讚靚...再之後上到我屋企,佢再驚訝咁發現我屋企的台及我的一對殘舊波鞋同佢擁有的一樣,由於全部唔係大牌子,相撞o既唯一解釋似乎只有我o地一樣咁好taste(!!)...果然係我最要好同識得最耐o既'老'朋友,令我諗起'Nana世上的另一個我'...今日雖然支力,但一次過見咁多friend真係好充實好開心呢!

轟炸

今日被連續轟炸了三個小時,慶幸耳仔又可以隔一排唔使再受罪...

今個星期我同honey完全就唔到時間,各有各忙,哈哈,無得見添!!...

夜晚為聽日畢業相之旅做足準備,差電,清理memory card,仲試埋新買o既粉底(不過似乎俾我膚色深o左少少...),聽日一定要影好多靚相先得!

My Boss My Hero

自上次《Attention Please!》後我都好少再番工放工睇日劇喇,所以睇得慢o左好多,睇《My Boss My Hero》之前其實仲睇o左《Engine》,而家明珠台都做緊,不過我覺得普普通通,套劇入面o既木村肥o左,有'佬'味,似乎無o左之前o既魅力!!!

睇報紙話《My Boss My Hero》o係日本收視好好,所以吸引o左我睇!!!由於之前未睇過長賴智也o既劇集,事前我唔知原來佢咁誇張搞笑呢!!!我仲記得我睇第一集時笑到氣咳,因為佢個角色係一個無腦o既黑社會大佬,佢o既無腦真係會令人邊笑邊鬧佢蠢,再加上二十有八o既黑社會大佬為成為黑幫第三代o既頭目而要扮十七歲去讀高中呢個咁特別o既題材,的確吸引!!

另外,劇集主題其實幾簡單,講黑社會大佬於校園生活中重拾錯過了o既愛情、友情同學習o既趣味,所以要呢套劇絕對能令人放鬆心情,開懷笑o下,唔錯!

官方網頁: http://www.ntv.co.jp/boss/

 

P.S. 上圖左下方個女仔叫新垣結衣,上網一查發現都幾多fans,佢個樣幾清純,有幾分似初出道o既張柏芝,話唔定佢遲d會好似澤尻咁慢慢上位呢!

畢業袍

好似好耐無寫過日記咁添!!!呢幾日我都幾清閒呀...所以無乜特別o野寫...

今日早少少離開公司,因為約o左同學一齊番CU拎畢業袍!!!好彩我o地算早,去到仲未夠七點,都唔係排o左好耐隊,拎完仲有試身室俾我o地慢慢試!!

兩年前HKU租袍唔使錢,今次CU要錢,我終於知道點解喇!!!因為CU件袍乾洗過,拆開包裝好新淨,質料亦比HKU的厚,又有絲絨,真係幾靚呢!!

至於款式,頂帽同兩年前一樣無分別,袍o既袖口有條紫色邊,襯埋社會科學學院o既青綠領帶邊都幾sharp!!!雖然兩年前我都係綠色,但今次青d同埋係幼邊,所以影出o黎應該都幾唔同,好期待今個星期日開始我一連幾星期o既影畢業相之旅!!!

我的天使

今日下午同媽跟細佬去食味千,原來新出o左好幾款拉麵,其中個麻辣牛肉麵幾值得推介,真係幾麻辣,但唔會食到你流晒汗,辣度適中,唔錯!!!之後同媽shopping,買o左件有花邊o既綠色樽領,下星期影畢業相應該可以大派用場!!!另外仲睇o左boot,靚o既對對過千,要平嘛一百蚊都有,但絕對買唔落手...點解一係咁貴,一係咁cheap??點解無d中價d,五六百o既呢??

===========================================

下午無乜特別o野做,所以用o左d時間update homepage入面Jolin(唯舞獨尊、墓仔埔也敢去MV),小豬(精舞門MV,片尾o既群舞好齊好正!!),Rain(I'm Coming、In My Bed MV,梗係十個正啦!!)同深田恭子o既新消息同最新靚相!!!!(有興趣就去我

homepage/f favourites睇啦!)

其中深田恭子大有收獲,因為我搵到佢最新天使寫真o既相,真係好靚,佢套天使下星期四o係香港上喇,雖然我唔會入戲院睇,但遲d出碟我一定捧場,因為佢永遠都係我心中o既天使!!!

電影《天使》主題曲 《天使が舞い降りてく る日》
 : http://www.youtube.com/watch?v=TSgCwBjWHbk

電影《天使》官方網頁: http://www.tenshi.bz/

價值觀

夜晚發了個惡夢,好得人驚,嚇到哭醒,氣喘了數十分鐘...好得人驚...第一次發d咁'惡'o既夢...

=========================================

Lunch同honey行o左去太和,真係夠無聊呢,哈哈,結果太和原來無o野食,所以去o左附近o既富山食,其實之前都見過o個度夜晚太排長龍,似乎唔錯,所以今日去o左試,味道的確唔錯,咁o既價錢,我覺得幾值呢!!!但honey並唔係咁諗...

我決定之後只陪honey食下午茶算喇...無癮...

疏離感

今日依然樂得清閒,上網睇睇新聞,食個午飯,時間都過得幾快,不過今晚應承o左同事打羽毛球(7-9pm),雖然無o野做,但要等到六點幾先離開office,真唔抵!!!

不知不覺番o左工差唔多四個月喇,觀察能力麻麻o既我近排硬係覺得同事們o既關係好似有變咁呢!!!!

第一: 我剛入職時同事們往往一大堆人一齊食飯,近排少o左好多,呢個話係Canteen食,o個個又有約...所以佢o地都好耐無一齊打NDS喇...

第二: 同事們少走埋o黎我個位同我吹水喇,可能我同另一位同事'不再新'啦,同事們失去o左同我o地'吹水'o既興趣....

第三: 而家無乜人打羽毛球喇,還記得我入職時,每場羽毛球大約六至八人去玩o架,而家成日唔夠人...唔夠人但book晒場,好浪費...

第四: 曾以為以男士為多o既工作環境是非較少,但我發現某某特別多怨言,仲同某某埋了堆,雖然並非搬弄是非,但男人之家成日埋怨似乎小家了點...

雖然以上都係d小事,但的確令我感到同事們關係o既疏離...其實同事們都好好人,雖然同我年紀小少少gap,但我真係想多d同佢o地玩同佢o地熟落,希望呢種各顧各o既疏離感唔好再嚴重落去啦!!

======================================

夜晚打羽毛球,本來諗住打一個鐘,但後尾打到興起就打晒兩個鐘,我feel到自己有進步呀,連打得好勁o個d同事都好肉緊較我'剎'波,因為我剎極都剎唔到,成日差少少...哈哈,今日打到好支力,第一次打到出汗同兩塊面紅晒!!!

我的名字

尋日清o左大部份工作,今日終於可以清閒少少,好耐都無試過番工時間得閒睇Yahoo News呢,哈哈!!!

無意中係Yahoo知識睇到一d關於英文名o既website,所以就查o下自己個名!!

'Feon'呢個名係我爸幫我改o既,細個時曾經係'fiona',但唔知點解後尾改o左做'feon',連串發都怪怪o地!!!雖然曾經有鬼婆miss 話我個名唔係讀'fion',但我都用o左個名咁耐,而且我又覺得咁串發幾特別,包唔會同人撞名,所以都無諗過串番'fion'!!!

曾經有位高人(舊同事)講過,不同名字係有不同性格的,人係會'適應'自己的名字,若果改名,人o既性格就會慢慢同個新名'夾'起來,培養出新名的'性格'!!!!!雖然唔知真唔真,但我諗'唔怕生壞命,最怕改壞名'呢句說話咁多人講背後總有原因吧!!

其實都有朋友話覺得'feon'呢個名同我個人好襯,唔知大家又覺得我個人同以下講o既性格特質又大幾分相似呢??

 

FIONA FANNY,Fannie同Frances,Fanny被描繪為黑髮，豐潤的女孩，快樂，風趣，非常活潑有時讓人有鲁莽的感覺。

FIONA 最初是蘇格蘭作家威廉夏普的筆名。他曾經撰寫一系列取自克爾特民間故事題材的小說。他的筆名選用的很恰當。因為愛爾蘭的許多名字都帶有『finn-』或『fionn-』這個前綴；這兩個克爾特語前綴的意思是『美麗』和『白色』。據古代傳說，在愛爾蘭曾居住著一批巨人。他們當中，有一个英雄名叫Finn，又名Fionn或Fingal。此外，人們還傳說愛爾蘭住著一位『白肩姑娘』(克爾特語為Fionnguala，她是李爾王的女兒。後來她變為天鵝，在漫長的幾百年間，游蕩在愛爾蘭的河川湖泊中。
Src:http://www.iselong.com/English/0008/8706.htm

你的名字：Fionn
含義：責任心强，實際，適合從事科技等全身心投入的工作。意志堅强，果斷，不喜歡改變，口頭表達力差。家庭和孩子對你很重要，渴望安定的生活。
中文譯名：費安
這個名字來自：凱爾特
相關名人：
Src: http://www.57name.com/enname/enname_search_detail.asp?en_name=Fionn

F)你身邊的人都滿喜歡你，一定不乏追求者。
E)你是一個勇敢面對挑戰的人。
O)你的思想屬於開明的一類，對不同的意見你也會重視思考。
N)你是熱愛工作的大忙人，却永遠渴望有個能放鬆的假期。
Src: http://www.iselong.com/English/0008/8689.htm

安康

不知不覺中,爸媽年紀大了,身體慢慢出現毛病,幸好我爸媽都有間中檢查身體!!好似今日,我爸就要去醫院check o野,因為個醫生好忙,我媽同爸要等佢成個下午,結果朝早八點去到醫院,夜晚九點幾十點先番到屋企...好彩只係發炎,無乜特別o野,我都安心d!!!

至於我自己,咁大個女仲未做過body check呢,最衰我而家係contract...無medical,希望出年成功轉做perm之後個medical plan有d 平d o既body check plan 就好喇!

祝我一家五口身心安康!!!

======================================

呢幾日office唔知點解好靜,d同事少o左行o黎行去,我今日下午好似一句o野都未講過呢~口都臭,哈哈!!!

=======================================

從來都覺得拍拖係兩個人o既事,但奈何現實仲有好多人呢...雖然我還是頗高興興聽到我爸說的話...但呢d都係可免則免啦!

理財

今日同屋企出o左沙田,爸爸介紹我o地去食西田樓下o既"嚼江南",d食物質素同份量都唔錯呢~!之後同媽window shopping,我發覺自己番o左工後好似愛上o左睇鞋,成日都想買呢,不過d 鞋其實都唔平o架...o黎緊冬天仲要要boot,實要大出血喇...!!!

用了兩日時間整理我的私財政報告,因為之前只係log低支出收入,並沒有詳細分析那些支出收入去o左邊、幾時使!!!而家整理好,每月支出收入一目了然,仲有埋分類,可以知道d錢使o左去邊類事項上(e.g. 食飯、坐車、睇戲、做運動、投資),同埋知道係使o係咩人身上(e.g. 自己、大姐會、番工、拍拖),希望有助我好好計劃將來o既理財大計啦!!!

滋擾電話

今朝一早睇見手機有個SMS, 係由一個我唔識o既手機number send o黎, 打開一睇,寫住: "Today I see u, really u r so sweet and beautifvl"!!!嘩,嚇死我, 我第一時間以為係有睇我blog o既人,好驚,以為我自己曾經好唔小心係網上disclose o左自己手機號碼...!!!!

為o左得知對方係邊個,我回番SMS問"Who are you? Do I know you?", 得到o既回覆係: "Good Morning.  U r so beautiful eyes, lips if i see u i want to see u continue"!!!Grammar錯成咁,我開始懷疑對方係小朋友...!!

將件事話俾我honey知,佢於是用133打去個電話number聽o下對方係何許人!!!!一聽之下,從對方唔咸唔淡o既英文口音得知,對方似乎係一個印巴藉人士,而且仲要係精神有問題,因為我o地無出聲,對方竟然不斷係電話另一邊"Halo~"、"Halo~"、"喂~"、"Do u speak English?"..."Halo"足兩分幾鐘無停過亦無收線!!!!

哦~!印巴藉人士?!一切終於真相大白!!!!!事緣我尋晚同honey傾電話途中,我手機響起,接聽後,我聽到一名男子用奇怪o既口音同我講類似英文o既o野,由於肯定唔係搵我,我用英文講o左句"Maybe you have dialed a wrong number"!!!我Honey聽到我講英文都覺奇怪,所以對呢個神秘電話有印像!!!!!似乎件事係咁o既,原來尋日呢個印巴藉人士白撞電話,聽到我係女仔於是發SMS作滋擾,並非真係知道我係邊個,咁都無咁驚!!!!

雖然唔驚,但我之後繼續收到變態SMS同來自該號碼o既來電,仲有無顯示來電號碼o既來電,我統統唔敢接,希望我不作回應下,對方盡快停止滋擾啦!!

======================================

今日同Honey去o左街巿食新o野,係一間泰國o野,都OK好味,可以再去!!終於唔使食o黎食去都係o個幾間喇!

約爸爸食lunch

番工幾個月,第一次撞o岩爸爸過海開會,所以今日約o左爸爸一齊午飯!!可惜我o地無準備,所以只係求其搵o左間茶餐廳食,當然,呢餐係我俾啦,出o黎做o野後都無乜機會單獨同爸食飯,機會難得嘛!!!!食完好早,行o左落灣仔睇office用o既"碌碌"椅,因為屋企想買呢!!!

下午番到office勁凍,凍到好似雪櫃,我又唔夠衫,真怕自己會凍病呢!!!

大日子5 - 生日飯

今日到同事同我慶祝生日,lunch去o左泰簡單食泰菜,有我最喜愛o既冬陰公湯,Yummy!!!!

一連串o既慶祝活動暫告一段落,大日子6同大日子7將會係今個月尾先會出現,因為每年我都會相約好友Pat同Nata交換生日禮物!!!!

似乎係時候暫停一下約朋友o既活動先得,一o黎要休息休息,二o黎要為荷包著想,因為我上個月使大o左呢!!!

西貢行山+海鮮大餐之旅

三日假期最後一日,今朝依然要七點起身,因為九點我要入到西貢同同事們行山去!!!

由於得我同另一個同事先係西貢碼頭等,而呢個同事今日要帶埋分別五歲半同四歲的仔仔出發,所以我o地打的去到集合地點五塊田時已經遲晒到lu!!!

今日有兩個同事帶埋拖友,兩個'爸爸級'同事帶埋一家大細,所以都差唔多成十六七人一齊行山,好熱鬧,而我都有幫手拖小朋友行,所以都唔太悶!!全程行o左兩個鐘多少少,其實我覺得好唔夠喉,但有小朋友無法!!

之後大家打的去布袋奧食海鮮,我第一次去咋,原來都幾偏僻,不過好有漁村風貌!!!我o地叫o左套餐,有蝦、蟹、上湯龍蝦伊麵、椒鹽鮮魷、石班等等,不過我覺得個龍蝦淡o左少少,條魚亦不太彈牙呢!!!!埋單每人二百大元,雖然無我想像中咁好食,但好彩我今日胃口唔錯,由頭食到尾,抵番無咁肉痛!!!哈哈!!!

食完差唔多兩點幾,呢幾日內透支晒所有精力o既我跟同事及他的兩名仔仔打的出番去西貢碼頭,沿途兩名小朋友不斷"Feon姐姐"前,"Feon姐姐"後同我玩,好開心,不過小朋友的BB話有時都幾嚇人,認真人細鬼大!!!!

番到屋企四點...要補寫番咁多日日記,實有排寫!!呢幾日假真係過得極之充實,仲支力 過番工,好想快d到星期六放假休息休息呢!!!

大日子4 - Prison Break!!!

由夢想世界Disneyland返回繁榮o既都巿,會合Agnes同May殺入赤柱!!

到o左赤柱監獄,因為係懲教署秋季賣物會,所以遊人好多,球場內攤位原來分別由全港總共二十六個監獄的懲教職員負責,賣o既o野好多都係由犯整出o黎,好平呢!!!見到好多人都大有收獲!!!

大會仲安排o左劉雅麗,少林功夫表演,而最好睇o既應該都算係警犬表演,場邊坐滿晒人,好熱鬧!!!之後,為當了懲教主任的阿簡帶o左我o地參觀呢!!!有主任做導遊真係難得,真係唔係咁易有機會認識監獄呢個地方呢(有睇Prison Break的May比我同Agnes對監獄更有認識呢!!!哈!!)!!

離開監獄,我o地去o左赤柱巿集行逛,夜晚再出銅鑼灣食飯行街!!

左上: 相中左上方窄窄的,其實係重犯的單人囚室o既窗,而後方天台上啡色衫的人仔就係犯人喇,佢o地正係度戶外活動,睇見呢個場面我覺得好似睇緊戲咁呢!!

左中: 警犬表演

左下: 運送犯人的囚車,比我想像中靚呢!!

右上: 當懲教主任的阿簡,May,Agnes同我!!!後面o既賣物會人頭湧湧呢!

右中: 全港最高度設防o既赤柱監獄,有圍場o架!!

右下: 運送極度重犯的囚車,比左下那架勁好多,主任話運送葉繼歡就係呢種車喇!!

大日子3 - 廸士尼夢幻生日

Honey為我精心安排的生日節目終於揭盅,原來係去廸士尼呢個夢想世界呀,好開心甜蜜呢!!

Honey約o左我3/11朝早八點出門口,還記得前幾日我以為自己猜錯Honey安排的節目,但原來係我honey特登故弄玄虛,直到今日honey帶我坐機場巴士先知原來我無猜錯,好驚喜呢!!!

抱住驚喜、期待o既心情終於到達廸士尼樂園喇,樂園開o左一年多我先第一次去咋,唔好怪我咁大驚小怪呢!!!由於honey book了Disney Hotel,所以我o地先去Hotel放低行裝,然後正式殺入廸士尼夢想世界!!!

雖然我事先無'做足準備',但因為樂園不大,所以我都知道晒邊d遊戲同劇場不可以錯過,再加上唔多人,所以朝早已經玩o左Space Mountain、巴斯光年、幸會史廸仔、馳車天地,食埋火箭餐廳o既叉燒漢堡同炸雞之後再玩埋Winnie the Pooh、睇米奇金獎音樂劇、坐火車、睇迪士尼巡遊表演、3D Show同獅子王慶典,再參觀埋泰山屋!!!玩到天黑,由於我同honey都勁支力,所以無等到睇煙花就番酒店喇!!!

番到酒店,由於無book位,所以食唔到自助餐,就咁食o左咖喱雞同Pasta!!食到中途忽然音樂響起,原來酒店有Band即場演奏,好好feel呢!!番到房間,而家先細心留意房間有無廸士尼人物,點知除o左Toilet的鏡係白雪公主同七個小矮人外就唔多覺有其他公仔喇,似乎唔夠多呢!!

夜晚十點,忽然有人敲門,原來我Honey一早向酒店做了Birthday Request,訂了一個小蛋榚,好surprise呀,都係第一次試有餐車推入房咋!!唱過生日歌、收過禮物再食埋個蛋榚,真係甜到漏呀...因為個蛋榚勁多cream呢!!!

====================================

第二朝八點起身,其實十一點先check out,但我想襯朝早好陽光要係酒店四周拍照留念,所以唯有訓少d!!今日有機會慢慢欣賞房外靚景,既望到園景又有海景,好正!!!我同Honey再用提供o既咖啡壺沖o左杯香濃o既咖啡坐係房慢慢品嘗,感覺好寫意呢!!

Check Out喇,忽然見到酒店大堂好多人排隊,原來白雪公主同愛麗斯o黎o左酒店呀,我當然唔會錯過同佢o地拍照o既機會啦!!忽然我honey見到前面有個小朋友拎住本小冊子叫Snow White簽名,於是靈機一觸叫我拎Disney Hotel送俾我o既生日卡俾Snow White同Alice簽名,實在太醒目喇!!!

就係咁,今日再入樂園o既主要目的就係狂搵廸士尼朋友簽名同影合照!!!!除o左尋日o既巴斯光年外,今朝o既Snow White同Alice, 今日同o左Mickey (Mickey好鬼馬,推開我honey同我兩個人影,仲鍚我添呀,哈哈!!), Minnie, Pluto(佢放簽完名後放張卡入個口度,要我係佢條脷度拎番!), Goofy (Goofy用手豆我下巴,影相時仲用手庶住我塊面添,好衰!!), Pooh, Mushu (花木蘭入面條紅色龍,佢投訴卡上面無佢份呢!), Donald (Donald今日無Daisy陪,所以推開我honey同我兩個影,哈!)同埋Chips & Dale (松鼠),佢o地o既名簽滿我生日卡,再加上今日終於拎到生日badge,巡遊時連跳舞o既都有同我講Happy Birthday,呢個生日真係過得好開心,收獲好豐富!!!

好多謝honey為我安排o既夢幻生日,鍚晒你!!! ^3^

大日子2 - 家庭生日大餐

今日雖然係我大日子,但我無請假,因為我請星期五就可以連放三日假,更方便honey同我慶祝,至於今日呢,本來都有諗過請埋假,但我呢個small potato小小一個生日請兩日假又實在太誇,所以最後今日都係上班去!!!

今日心情靚,人當然都要靚d啦,所以今日帶con,人都特別精神爽利!!!雖然要番工,但我又無覺得自己好慘喎,反而令我覺得今日其實都可以同平時一樣,無乜必要自我放大自己o係呢個特別日子o既重要性!!!!哈哈!!!

同事們其實定o左下星期一同我食生日飯,至於今日,我當然唔會帶飯盒啦,無理由仲要一個人lunch係公司食飯盒咁子孤單嘛...!!!但既然下星期一同事請我食飯,咁今日同同事食飯,佢o地又會唔會要我俾錢呢?...正煩擾間,同事們各自都話Lunch另有appointment,我o既煩惱似乎多餘了...但係...我Lunch咪無人陪我食囉???

...好彩, 最後我都唔使一個人食,仲去o左唱lunch K添,好驚喜呢!!!短短兩星期唱o左三次K,都算破o左自己記錄!!多謝同事o既offer呀,真不敢想像今日無人陪我食Lunch o既情景!!!

眨o下眼放工,比平時早少少走,join埋細佬一齊去沙田會我爸,因為佢去o左買今晚o既大餐:乳鴿、大蝦伊麵同咕嚕肉!!番到屋企,爸爸忽然興起話要用video拍底慶祝o既情境留為紀念,好彩我今日唔太烏'wear',可憐我媽猛話唔想上鏡,好搞笑呢!!!

最後,好多謝Honey,Jenny, Cindy, Bess同Athena o既電話、May,Brian,Nata, Menu,綿羊仔, Stephen, Beta, Emily o既Message, Pat 同其他朋友o既e-Card,同埋同事們o既一句'生日快樂'!!