我倆的第二輯婚照 ~ 湖景篇

倒數80日,嘻,各位blog友仔,又係私人分享時間,送上湖景o既入相簿相!!希望大家仲未睇厭啦!!下次到梅花景喇!!

哈哈,大家有無發覺,入相簿相比前面唔入相簿o個d真係多d兩個望鏡頭同埋個人清楚d o架!!!

我第一個DIY花球

今日係我同我honey拍拖9年9個月零9日,嘻!!!

經過兩晚努力,我終於大至上完成o左我第一個DIY花球喇!!無錯,呢個只係第一個,我仲會整多一個,咁到時就可以一個花球襯褂,一個花球襯婚紗!

先睇下d花材先!

圖中橙杏色花大家都可能見過,因為我上石門影相時都有帶去影,我o係淘寶網上買番o黎,係我買o既第一批花材,不過我買o既時候明明覺得佢係淡紫色,本來想用o黎整花球2號,點知收貨時隻色一d都唔紫,變o左橙色...不過d絲花質素真係好掂,可以以假亂真,都唔錯o既!!

淘寶網上面o既圖!

至於圖中深紅色玫瑰就係上次番大陸時買o既,一見就好鍾意,因為隻色好grand,個花形亦好靚!!所以唔理有無用,買o左先,用唔著當屋企裝飾都好!

結果,誤打誤撞,又俾我搵到網上面呢個花球同我d花材幾夾!!結果我就決定整多個花球襯褂喇!!

src: www.brides.com

至於d葉,我見d花球好多都有葉托低,加上我呢個係絲花花球,好易露出穿崩位,所以特登買d葉o黎遮醜用!

加埋鉗,forest tape,鐵線,開工!!

先鉗開晒d花,拆走d葉同花托位o既葉,整到枝花光秃秃!!之後就縛埋d花,我睇youtube d教學話15度15度咁交叉d花會穩d喎!!

由於我怕d花縛得唔實,所以我每縛一枝就圈一次forest tape,結果圈o左成晚先札到個大概,最搞笑仲係我札完唔係圓形,好彩d絲花全部有絲線,我續枝au番正先似番個球形!!

由於青色葉o既分佈不均,我試加o左d綠色葉仔落個花球度~不過最後honey同我都係覺得唔加好d!!最後,由於au完d花後d花好疏落,我再加d深紅花仔塞住d 'lone'!

完成喇!!!呢個DIY花球,價值都唔平~~不過可以自己親自整自己個花球,又幾有成功感!!哈!!

橙杏色花: RMB28(3頭)X5
迷你深紅色花: RMB8
橙杏色花+迷你深紅色花淘寶運費: 35RMB
深紅色花: RMB25
--------------------
總值: RMB208 (好意頭喎!)

而家只差未縛絲帶包住d核突鐵線腳o者,大家覺得點呀?第一次DIY花球,算唔錯o卦...哈哈...我自己就幾滿意喇!!

6月20號,honey就會拎住佢去接我喇!!哈哈!!

P.S.過去兩日好難得唔使再左撲右撲,不過就兩日都上o左新屋抹抹抹,好支力呀!!

BB大鬧office!

尋日同事抱o左個女番公司玩(佢放一星期大假涹女,等屋企人可以去旅行!),不過,由於太多哥哥姐姐姨姨叔叔圍住佢,呢位十三個月小朋友被嚇到好驚,全程扭住媽咪要抱,成日縐住眉頭含住泡眼淚,好可憐咁!!!

好彩,熱身兩個鐘後佢終於稍為relax d,佢終於肯笑下,仲有同事同佢玩時成功攬o左BB一下添,哈哈!!

最後,o係無午睡下,BB女終於捱唔住去o左覺覺豬,睇o黎佢好支力呢!!

周太?!

呢個星期分別向唔同組別o既朋友仔發出我o既e-save the date card,陸續收到各位o既回覆,好開心各位都賞面話會到,仲好踴躍咁問我有咩幫手,真係好開心,覺得自己好幸福!!!其實有大家o既出席,我已經好心滿意足o架喇!!!

o係云云reply中,今日收到o既呢句印像比較深刻!!

'Mr Chau, take good care of soon-to-be Mrs Chau!!!'

巧合地,今日打去傢俬公司更改送貨時間時,對方叫o左我一聲'周太'...當時真係唔識反應呀...只識傻傻咁笑住答'哦~~係呀...'...

坦白講,我覺得呢個稱呼唔係太型呀,我覺得我要一段時間先接受到呢個稱呼...甚至有d唔想跟我honey姓!!!因為我覺得我個姓型過佢o個個好多...哈哈!!!!

又一個充實的週末

我發現而家d星期六日我都fully occupied咁滯,有時真係覺得平日番工反而更似休息...

剛過去o既星期六日,我完成o左以下事項:

1.拎o左d帖去昌記印,星期四就有稿對,希望無咩錯漏,順利o既話個幾星期後應該可以拎帖喇!!
2.經過德祥買o左鐵線,襟花手花DIY應該隨時可以開工!!
3.買o左衣櫃書櫃飯台同埋床,好肉赤,不過幾滿意!
4.租o左奶奶衫,鬆一口氣,終於唔使再左睇右睇!

另外,完成以上項目時仲有少少感想:

1.話說星期六由朝行到晚,好支力,想去搵地方坐下但又無位o既時候,我同Honey面矇矇咁去o左OSIM promotion area坐按摸椅!!坐足半個鐘,真係好正好舒服,我無諗過佢按得咁貼身o架,按完落地o個下我同honey都覺得雙腿真係鬆晒,輕o左好多,即刻充滿力氣再去行過,哈哈!!如果第二時我屋企有位,我又有多餘錢(呢樣都幾難!),買部機番屋企當SOFA都真係唔錯,哈哈!!(發下夢先!)

2.夜晚揀衣櫃時仲以為會買得好快,點知諗得最耐竟然係櫃入面o既層板同埋燙櫃,我諗我考慮o左半個鐘都有先決定到,同honey討論其間仲發現到原來大家對點用衣櫃o既習慣都好唔同,睇o黎生活習慣上o既磨合都係大家將來相處中o既一個重大挑戰!!

3.金都間心妍幾值得推介俾各位準奶奶媽咪!!因為嚴小姐(應該係老闆娘)服務態度very good之餘仲俾我地feel到佢o地好有heart!!佢o地俾o左好多好有見地o既意見我o地,例如身份唔同應該要著唔同o既衫,好似奶奶衫就一定要莊重同有壓場感,媽咪衫反而可以西式d輕巧d,我o地都覺得好有道理,經佢手推介o既衫真係幾靚著出o黎好sharp!!最後未來99揀o個兩件衫都好靚,個人覺得配合身份下,佢d衫靚過我o個d添!!

P.S.未來99認為過大禮日子(5月31)太遲,唔夠時間派帖,掉轉之前我媽又認為我揀o既五月十號過大禮太早...16號唔知又好唔好呢?

再P.S. 今日收到證婚律師o個邊o既電話,原來佢o地係時候交張擬結婚通知書上去喇,哈!!

矇主席

上次個生日會我好似仲未寫番...話咁快又到下次生日會喇!!

今次係我第一次以大姐會主席身份搞生日會,不過我呢個主席矇盛盛,搞到神秘生日會PIC呼之欲出,搞到大家都好易估唔好玩!!哈哈,所以成晚最好玩o既應該係我,因為得我一個知道晒成晚發生咩事...哈哈...!!!

等我綜合一下今日犯o既矇事先!!

1. 呢排私人事繁忙,我事前完全無諗過今晚要點保護PIC免佢身份敗露,所以我真係毫無準備!

2. PIC之一o既珍妮食飯前襯機俾o左D禮物我,其中兩份放o左係我環保袋,毛毛娜份禮物就放o左係我番工袋,結果...唔好意思,送禮物時我竟然完全忙記o左有份禮物係我番工袋...!!所以送禮物時我有D措手不及,因為我唔知點解得一份禮物...

3. 我無記清邊個係邊個PIC!!當Rebec提醒我有份禮物係我手袋後我先如夢初醒,但係,拎住兩份禮物後我都係唔知點算,因為我唔知邊份係邊個o既...所以又要Rebec提醒...搞到Rebec呼之欲出,係人都知佢係PIC...

4. 食完飯顧住傾計,完全無諗過要幫手叫waiter上蛋榚!!話時話,唔會講我係主席呀,其實咁多年生日會我都好似無試過做呢個task!!所以矇矇下o既我o係Rebec提完後即舉手向waitress示意,嚇得Rebec即刻提我應該要扮去廁所先做...哈哈...係喎...

另外,仲有幾樣預計唔到o既事,哈哈,諗起都仲覺得好好笑!!

1. PIC留位已經好醒,留o左姓高,點知拎位時個waitress向我重複o左兩次'係咪Rebecca Ko'留位...仲要俾生日主角茄雲聽到...當刻真係好無奈,個心好想同個waitress講,就咁叫我個姓咪夠囉,無咩人姓高又咁o岩訂o左位o卦...哈哈...

2. 千算萬算都算唔到,我放工等巴士時竟然排我後面o既係茄雲!!今次相遇同上次食Buffet一樣,又係約都無咁夾,仲要係超近距離相遇...但就因為咁,PIC無機會將禮物交到我手,亦無機會事先溝通!!

原來保護PIC呢個task都唔係咁易,上屆主席Rebec一做就做得咁好,真係要讚!!嘻,有o左今次經驗,我下次唔會再咁大頭蝦,下一個神秘PIC請放心,放心~~!!!

我倆的第二輯婚照 ~ 第二擊

倒數90日,送埋湖景第二part俾大家睇!!

呢張honey好似路過咁!!

呢張個人係咪好細呢?

咁呢張呢???哈哈...

呢張同下面o個張兩張我都好鍾意,不過最後都係揀o左上面呢張落相簿,無揀到下o個張!

Honey佢話佢第一眼睇,以為自己坐o左係我膊頭到喎...!

下次post梅花景喇!!