裝修進度忽然開o左turbo~

大家都知我間屋裝修o左好耐,由天氣乾燥裝修到天氣潮濕...終於,裝修工程o係停工個幾月後於大約兩星期前重新展開!!

由過年前停工起,再加上過去兩星期我又團拜又婚紗展又番大陸影相,大大話話個半月無上過新屋,都真係唔知而家間屋整成點!!上星期四,忽然收到我爸send俾我o既新屋相,嘩,裝修進度做乜好似開o左turbo咁o既,連冷氣都裝埋,好快手好驚喜!!

開心唔夠一陣,我再細心睇d相,好似有d o野出事喎...

飯廳大鏡:

原意設計:

 

網上找到的參考圖                                                  用photoshop製作o既設計效果

爸爸send俾我o既圖

塊鏡我最先最先,係想造茶色當邊框,但後來我改變主意,想用番無色!!唔知係我無講定我爸記錯,結果都係造o左茶色邊,而且,風車形o既邊框變o左只係兩條直加兩條橫鏡就算,完全唔跟我原意設計(要知道我係印晒圖俾師傅o既,呢個錯好明顯係師傅唔細心!),仲有仲有,明明話五塊鏡都要四邊造車邊,點知無做到!!

另外,o係爸爸send俾我o既圖入面,仲見到神秘東東都出o左少少事,要知道成間我最花心思就係呢樣o野,雖然個錯係好少,但我好介意,激動到係公司眼濕濕,即打俾我爸問過究竟,佢著我實地睇下先!!

************************************************************

放工,怒氣沖沖咁衝去新屋,唔知係咪太'怒',腳程不自覺好快,由巴士站行上山到新屋用o左15min,比想像中快,而且仲無我想像中咁支力(條斜路都幾長幾斜!)...睇o黎我當時真係'怒'到唔識支力...哈...

第一次夜麻麻一個人入屋,可能又係'怒'氣沖昏o左我頭腦,我仲以為我唔習慣新屋環境會怕添,點知完全唔驚,實在太好!

開燈,嘩,好靚!!

點解我會造咁大塊鏡?因為我屋企一樣都係咁o架,由我有印像開始我屋企已經有一塊牆咁大o既鏡,屋企因此好光猛闊落,所以新屋都一定要有!將窗外夜境帶入屋,正!!

塊鏡雖然同我本來設計相差太遠,但而家個效果都唔錯喎!!隻茶色幾靚,而且,因為無車邊,邊框其實用唔用風車形o既拼法其實都唔覺眼,真係錯有錯著!!好,收貨!!(雖然錯有錯著,但我覺得出錯都係因為我爸做中間人o既關係,真後悔自己再忙,點解重新裝修後唔親力親為跟足d!)

 

星期六朝早再同honey上多次新屋睇!

至於神秘東東,現場睇,個錯誤真係只有我先留意到,而且其實錯o既程度好輕微,未至於令我覺得篤眼篤鼻,既然重造o既工程太繁覆,我決定讓步收貨!o個一刻,我真係怒氣全消,自己都鬆一口氣!!

走廊吊櫃:

個吊櫃o係批完牆之後完全隱o左形喇(想睇佢未隱形前,可以去新居裝修情況睇番!),哈哈,我都差d唔記得佢o既存在!!下邊右圖係走廊壁燈位置,我將會用水晶粒DIY佢!!

 

o係書房望番個吊櫃!!話俾大家知,個吊櫃d門並唔係你睇見咁開o架!!原因在於最開頭整時個師傅太stupid...唉...算啦,唔改喇,橫掂吊櫃唔係成日要開o既...

主人房:

我間主人房唔太大,所以一直好想整鏡,但塊鏡對住床好似話風水唔好,不過好好彩,俾我上網搵到呢張圖,點解一路無諗到可以放鏡係床頭位置呢?而家,間房望落光o左大o左呢!!

網上找到的參考圖,冷氣是我key上去的,
重點係...我只是參考塊鏡,我間房style唔會係咁,亦應該整唔到咁靚..!

整得似唔似呢?

由睡房望番過去書房!!打通兩間房原意係想兩個人分別o係兩間房時都可以sense到大家(其實將來apply落初生BB度都可以!),我真係好鍾意呢個idea!!(係我好姊妹個建築師男友諗o架!)

如果大家留意到,冷氣都裝好晒喇!其實我唯一要求係要有一級能源標簽,咩牌子外形都OK,所以交俾師傅搵,唔使自己煩!廳o個部分體式好輕巧,同十年前大成幾倍o個部大牛龜無得比!!至於睡房部冷氣本來都夠凍,但好嘈,聽我爸勸,最後都係換埋!!我細佬話佢會過番錢俾我,當送部冷氣俾我呀,聽到真係好驚喜!!我無諗expect細佬妹會送咁貴o野俾我o架,好窩心呢,多謝細佬!!!

似乎間屋只差油油同廁所d水龍頭同座廁未換咋喎,預計三月中度應該可以完工,我同honey就快可以為新居添置傢俱喇,yeah!!