尋日先約o左我伴娘Natalie陪我去深水土步買閃石貼for DIY,之後就出去TST百利join埋姊妹Clok去姊妹Karen介紹o既舖頭揀伴娘衫姊妹裙!!由於各花入各眼以及難於約齊人一齊睇衫o既問題,我決定只要大家同色同料同埋係短裙款,大家自己揀衫,yeah~~!!
五點,我同Natalie就去會合我媽一齊去CDL揀衫!!落到去o既時候勁多人,sales都忙到團團轉,無人理我,我o地就唯有自己睇相簿mark衫!睇晒d相簿,老實講,晚裝有d難mark,亂點鴛鴦下,我好似mark o左一半以上係品牌款,點算呢,唔通我真係要加錢租品牌衫???
到mark婚紗,婚紗相對上易mark好多,而且我對婚紗要求係直身同簡單,所以我都feel到我mark o黎mark去件件差唔多!!
等呀等,由五點等到六點都仲未開始試,姊妹Clok,Betty同Jenny都陸續到齊,忍唔住問sales我試得未,點知次次都答'未'...乜咁耐o架...我好心急表演fashion show呀!!!!
終於試得,先試婚紗,因為我唔係好知心目中'the one'係點,所以好想襯姊妹伴娘們未走前聽多d意見!!!
換換換,睇番相,原來我都試o左成十一件婚紗上身!!好多謝各位忠肯o既意見(而且意見都好一致),我最後都係揀o左一件比較清o既...其實當我試到第二件(就係我揀o個件),我已經有少少'叮'o既感覺,不過當然係試多幾件先啦!!!
試到最後再著多次final two,一著番我件心水WG,姊妹Betty即話'睇番呢件覺得好清新呀'!!!Yeah,我就係鍾意清新,雖然影相可能太plain,但既然我個心已經o係呢件WG度,就呢件啦!!(後尾我honey話我知,我問我媽意見佢口講'你鍾意',實質上佢心入面係有答案o既...咦...唔怪得Clok一見我媽就驚嘆我同我媽好似樣啦,我問姊妹伴娘final two邊件好d,其實我又係自己有答案...哈哈,我o既答案同我媽一樣,yeah!!)
我件'The One'當然要留番大日子先曝光啦,至於落選佳麗,其實有d都好掂o架,大家睇下!!
上面呢件一著出o黎個個都話靚,但個個都問'呢件係咩o黎?',因為佢隻色係蝦肉色,個個都以為係晚裝而唔係婚紗!!無奈地要out,後尾我媽講番,唔計隻色,佢原來最鍾意呢件!呢件亦係唯一一件個拖尾大小最合我心水!!
左邊呢件好'女神feel',不過太似我影麥田件衫!!
右邊o個件個款幾可愛,不過著得無咩身型,同埋隻色又係比較'蝦肉色'!!
呢件我其實都好鍾意,可惜佢係upgrade款!!!byebye!!!
呢件就係有幸入圍二強o既裙!!我一著出o黎,伴娘姊妹們一致讚個包膊款著得我膊頭好靚,而且裙身d detail都幾出,咁多人讚喎,當然入選二強!!咁條裙輸o係邊呢?咪就係佢係鋼紗款囉,如果佢拖尾細d,係A-line或直身,我估我好有可能揀o左佢o架喇!!
左邊係魚尾裙款,其實見今年oscar咁多人著魚尾裙,我都心思思想著...可惜呀,CDL魚尾裙款唔多,而呢一件個尾又太大抽,最重要係...我無咁o既曲線去著,byebye!!
右邊呢件係upgrade款,一著出o黎個個大讚靚!!可惜,原來無影到全身個look!!
繼續係上面右邊o個條裙!!!條裙清得o黎又有detail,個拖尾又grand,最重要係佢係直身裙,合我要求...不過,盛惠俾多$1500...byebye喇...好唔捨得!!!
呢件^.^都有揀過,不過佢今次o既命運一樣,落選!
左邊: 見大家讚我著包膊款好睇,於是問sales有無直身包膊款,結果得呢一件!!著出o黎有點灰姑娘變靚前,要幫手打掃o既feel...!!
右邊:見上面要upgrade o個條咁靚,於是問sales有無唔upgrade o既款又係直身又多detail,結果拎o左呢一件!!現場睇呢一件係最閃o既,不過佢下半身包得唔多靚,介乎A-line同直身之間,最麻麻仲要係裙身o既直條紋,而且...個人覺得佢d detail多o左, over o左,bye!!!
好,到EG喇,之前咪話我mark o左一部份試o既,但唔知點解最後好似一件都無試到(其實我都唔記得自己揀o左d咩衫!),最後sales只跟據我口講o既顏色要求去搵衫俾我試!!!
第二件就試我件dream gown,我o係一年前同^.^行婚紗展已經睇中,當時己經同^.^講我要著呢件上身!!Sales依我description搵到呢件EG我試,我發覺,原來我已經唔係太記得件衫喇,見到件衫時只係識問sales'真係呢件?仲有無類似款?',不過sales就好肯定一定係呢件!!
一著,一個字,正!!!至少我係咁認為,哈哈!!
由於呢件係品牌款,所以及後o既EG,我只試非品牌款...至於我都好鍾意,^.^試過o個件紅色敬酒EG,由於係品牌衫,我只有同佢講Bye Bye喇!!! (^.^ & ^____^件紅色EG,大家可以去落選佳麗曝光睇!)
之後邊等邊試,明明當時三個試身室得番我一個試,但d sales成日唔見晒,所以有時都要等好耐先換到第二件去睇!!EG Total試o左12件,最難就係confirm敬酒衫!!估唔到CDL o既紅色EG比想像中少,而且好唔好彩,其中有件睇中o既紅色直身EG已經俾人hold o左!!至於送客裝我只試o左一件咋,如果唔係當時已經八點半有多,大家都支力,我真係想試多少少先confirm o架,不過而家confirm o左呢件大家都一致讚好,唔錯!!
以下就係落選佳麗喇,相對WG,我個人覺得CDL o既EG唔算太多合我口味,下面除o左直身紅色裙係比較喜歡外,其餘一律唔鍾意!!不過,要揀最終都揀得到o既,只係選擇未必太多,同埋要花多d時間,辛苦姊妹們幫我狂翻相簿搵合我條件o既衫o者!!!
藍色!我知我媽唔鍾意我著藍色,但我照試,當時我媽話隨得我!!但我honey講番我知,我媽應該都係唔鍾意!!
右邊呢條係候選敬酒衫,幾清幾OK o架,差d當選o架喇!!!
呢隻紫我好鍾意,不過個款唔得,而且裙尾太重,敬酒o既話有d困難!!(其實真係好想搵到好似Mrs So o個件咁靚o既紫色直身EG...可惜CDL無...)
左邊呢件一著,個個都話著得無咩身型!!不過影相出o黎又唔覺喎,個款算幾有特色,反而係隻色太沉,好似無咩精神!!
右邊呢件金色EG,個款都OK,但隻色太近皮膚顏色!
左邊件裙款都幾OK,但感覺似奶奶衫多d!!
右邊呢件一睇,真係唔多想著!!著到上身,比想像中好少少,但...好聖誕...唔掂!!
左邊呢件隻色都OK,但個款...唉...
成晚honey影得一張相,就係呢張...
最後揀埋褂,confirm埋婚前一個星期去final fitting,yeah!!!
褂我試o左兩件,大家估下我揀左定右!!
同姊妹Betty分別後,我o地一家人去細佬介紹o既食店食雲南米線!!一上到去好出奇,我妹都係度喎,佢係稀客o黎呀(佢除過時過節同生日係屋企食晚飯外,基本上好少夜晚同屋企人食飯!),好驚喜呀,難得齊人六口子食晚飯,好開心呀!!!
番屋企同屋企人鬥快,我同honey坐巴士,屋企人就坐火車再轉私家車,結果,o係我同honey去到我屋企樓下,以為win梗o既時候,我屋企人o係屋企打俾我...原來佢o地剛入門口...輸o左個馬鼻,哈哈,但好好笑,好好玩!!
今日,真係好多謝家人伴娘同姊妹們出o黎幫我揀衫,至於無o黎o既姊妹Karen同Athena,我知你o地都好想o黎o架,不過咁o岩你o地分別尋日同今日生日,我明o架!!!我覺得有大家陪我,我真係好幸福呢!!!
P.S.番屋企睇番d相,完來大家掛住影我試衫,完全無幫我honey影過...其實我自己忙都團團轉,都無留心我honey揀咩!!後尾問番佢有無揀腰封同領帶/煲太,原來無喎,我諗婚前一星期先揀都OK o卦!!!另外,雖然我媽同honey都話我身型剛好,但睇番相,可能我膊幾橫啦,我硬係覺得我仲係好大隻...真係要努力keep多兩keep先得!!
再P.S.,是晚我唔係好訓得著,個腦仲好興奮,不段回憶換靚衫o既moments, hahaha!!!
沒有留言:
張貼留言