港女?

唔知大家星期日有無睇星期日檔案呢,個集'港男講女'?個節目好搞笑,講香港男士點睇香港女士,話'港女'有拜金主義特質,周身名牌,同男士單獨約會奉旨要男士俾錢,又有'公主病',要男友當自己公主一樣對待,最搞笑仲要係無論五尺定五尺十寸高,體重都追求100磅,花好多錢去扮靚!!

至於女士當然都有反駁啦,話自己周身名牌又花錢去執靚自己都係為男士,想男士帶自己出街時臉上貼金咁喎...咁都得...!!

睇完節目後同honey傾電話,佢第一句就話'好彩你無呢d港女特質o者!!',哈!!

講真,我認識o既女性朋友,似乎都無咩邊個係'港女'!不過我都幾認同,香港呢個咁物質主義o既社會,出產多'港女'都唔出奇!

下集,到港女講男喇,我猜香港女士對男士o既投訢都不礙於沒風度,沒主見,只識搵靚女又唔注意自己儀容(如秃頭,肥胖等),好期待下一集!!

無論港男又好港女又好,我個人認為最妙仲係呢批看似互相投訴對方不是o既人其實咪仲係互相玩緊尋尋覓覓o既遊戲!!或者,呢d就係兩性之間相處最有情趣o既地方!!