我的聖誕假!

24/12

老公要去飲,於是我放工後就番娘家陪爸媽過平安夜(其實係佢地陪我過平安夜吧!!)!!爸爸買o左美味油雞/雞油飯,越式拼盤同米線番o黎做聖誕餐,嘻,好有新鮮感,至少唔係年年都食o既大家X牛扒餐呢!!

飯後我同爸爸玩Wii,因為爸爸借o左佢同事部機番o黎,兩父女玩到嘻嘻哈哈,我仲肉緊到手都軟咁滯,不過真係好開心(相信爸媽都一樣吧,嘻!!)

番到屋企沖埋涼十點左右,乖乖等老公子番,開頭仲以為我又要失望,點知老公子剛好o係倒數前15分鐘番到,好開心,話晒係婚後第一個平安夜嘛,老公子點可以唔陪我過!!

===========================================================

25/12

今日無節目,我同老公子不嬲都係懶鬼,連出街同人迫都費事,今日決定留o係屋企!!下午一齊睇幾年前o既"舞出真我",之後我就煮o野食!!!

大家估o下我o地聖誕大餐係咩??!!

哈哈,就係公仔麵+壽司喇!!聖誕節,我o地就係咁簡單渡過!!

============================================================

26/12

年年我屋企o個邊都唔會同親友過聖誕,不過今年好特別,舅父邀請o左大家去佢屋企開Party呢!!我就當然最開心啦,冬至無得同親友做節,今日可以補番,yeah!!

我o地一大班人11點半先去明星海鮮舫飲茶,咁大個女第一次去咋,不過其實無咩特別,係某D地方裝飾比較古式古香啦,不過我無帶相機,所以一張相都無影!!

之後大家就去舅父屋企喇!!舅父入伙時我好似搞緊wedding吧??所以我今日係第一次去咋,過千尺屋四正又實用,好正呀,廚房仲大到可以放台麻雀都應該仲有位行添呀!!爸爸仲叫我唔使羡慕,著我同老公子以此為目標努力喎,哈哈!!

我地2點就落去打波,因為舅父book o左羽毛球場同乒乓波俾我o地玩!!!我都係第一次同親友做運動咋,超好玩呀,我又打乒乓又打羽毛球,最後連籃球都打埋,玩足2個鐘呀,再加埋前日同我爸玩完Wii手臂已經痛痛地,今日又做咁多運動,真係成身散晒!!

下午四五點番上舅父屋企開始就不斷食,因為舅母預備o左好多美食,一睇就知舅母落o左好多心思預備呢!!

美食有桂花榚(仲要有三款味: 桂花杞子, 桂花桂圓同埋桂花雪耳!!), 吞拿魚Pizza (分辣同唔辣兩款口味!), 雞翼, 鮑魚雞湯, 鴨舌...

以上只係飯前小食!!正式開餐仲有: 羊肉 (超好味,好騷,正!!), 糖醋骨, 煎薯餅, 帶子剌身, 蟹柳, 鮮果沙律, 芝士通粉,同埋應節食品9磅火雞一大隻!!!不過食物份量實在太多太豐富喇,火雞又鞋口喎,所以咁多人只係消滅左四份一隻火雞都無,咁大隻火雞就要辛苦主人家處置佢喇!!

今日真係過得好開心,又做運動又食咁多o野,真係好盡興呀!!多謝舅父舅母招待呢!!

=============================================================

27/12

今日老公子踼波爸爸番工,所以lunch得我同我媽兩個!!食個lunch兩母女行o下超巿我就番屋企做家務喇!!

今晚有朋友o黎,雖然屋企本身都好整齊,但點都要執o下先見得人o既,今日仲抹埋窗添,真係勁污漕!!

夜晚8點半幾位中學同學都o黎到參觀,haha,大家都好似幾鍾意我屋企o既佈置呀,多謝大家呀,不枉我o地曾經花過心思呀!!之後大家又去參觀另一示範單位,haha~~大家今日o既目的好似變o左睇樓咁,好搞笑呢!!最後,本來我o地諗住去埋另一個屋苑o架,但太夜,於是決定再約過,期待下次再聚呀!!