諗新居裝修

都話上星期上深圳睇傢俬後我一定會重新燃起我對新居裝修o既衝勁啦,結果過去一個星期我真係上網不斷參考網上面o既裝修設計,仲copy底自己鍾意o既家居design圖片,今日仲同honey上o左新居度尺添!!!

不過可能係呢排太潮濕太熱,我o地竟然發現主人房同細房o既天花出面黑色點點,範圍仲唔細呀,明明之前一直都唔見有o架,我覺得似係呢個月我新居無開窗無開冷氣,而樓上就開冷氣,一冷一熱天花起o左水氣,而屋內空氣又唔流通,焗到天花發霉都未定喇!!!唔知係咪裝修完批過晒d牆就會無事o既呢??

d印好勁呢!!!

之後我o地出o左沙田,去o左一田百貨迫人...嘩,個個都拎住幾個枕頭,好似好抵買,最衰自己仲未需要買呢d家居用品,唔係我諗我都會買埋一份!!因為一田實在太多人喇,好快我o地就唔想迫,去o左宜家傢俬o個邊睇傢俬!!!

呢個商場翻o左新,開番好多傢俬舖,呢d傢俬舖唔知係咪裝修前o個d呢,但感覺好似高級o左咁,我同honey都唔難搵到心水,仲俾我o地發現到上星期行好百年時睇中張床o既舖頭,原來香港都有分店,價錢仲比深圳平,不過就無訂造,但價錢合理,good!!!!

由於今次度過尺先o黎睇傢俬,準備充足下我o地真係比較有目標,至少o係睇中款式後,知道新居其實夠唔夠位放嘛!!!今日我o地已經睇中sofa,床,衣櫃,電視櫃,鞋櫃同梳妝台,勁呀!!不過...我o地其實秋天先開始裝修,咁早睇o黎都無用,或者我下個月又會睇中其他呢,哈哈!!

最後,我o地行o左轉ikea,左搵右搵,原來都係ikea o既花樽最o岩心水,價錢合理得o黎質素唔錯,可惜今日要去釣墨魚,唯有聽日再o黎買花樽啦!!!