老朋友出嫁~Day1

今日係我認識最耐,亦係o係我心目中好重要o既一位好朋友PatPat出嫁o既大囍日子,恭喜一對新人,祝你o地白頭到老,永遠幸福快樂!!!!

今日七點幾起身,其實訓得好差,因為尋晚好夜先訓,仲搞到眼腫腫,不過好彩,今次女家o係我個屋苑(其實今次姊妹們好幸福,因為大部份都係住新娘附近!),所以唔使好似上次咁五點幾起身,無咁辛苦呢!!!

新娘係咪好靚呢?

八點半上到新娘屋企,嘩,我好多年無上去呢,好有親切感!!!化妝、戴手花、同新娘影相、預備接新娘遊戲用具,不知不覺攝影師同兄弟們都到喇,嘻嘻哈哈玩完遊戲後新郎順利接到新娘,當然唔少得鍚番啖啦,哈哈!!!!

之後由於新娘親友眾多,敬茶需時,屋企地方唔夠,所以兄弟姊妹先落車等,等o左都有成個鐘,雖然我無睇到過程,但可以想像新人們一定跪到好支力,哈哈!!!!!

等出門其間同兄弟傾計,其中一個話今次係佢做十六次兄弟以o黎最容易o既一次,哈哈,咁我都唔否認今次係易o既,因為我o地開得一次會咋,而且姊妹團都係見過兩次,未熱身氣勢一定差少少,不過易又好難又好,最重要無過吉時嘛,哈哈!!!!

十二點幾出門去男家,由於新郎係圍村人,所以我o地要去圍村,好特別呀,平時真係無乜機會去圍村呢!!!一到圍村,佢o地仲燒炮丈添,好熱鬧!!!行入圍村,仲見到好多屋簷外都有燕子巢,仲有燕子BB申長頸等燕子媽媽餵添,好得意,不過我一向以為圍村一定好多狗,點知今日一聲狗吠都聽唔到喎,有d出奇呢!!

 

圍村!!!                                           申長頸等食o既燕子BB!!

由於新娘要拜祖先同敬茶,我o地一眾兄弟姊妹同女家親友先食盤菜,雖然d料無乜特別,但個汁好好味,都可以話係我食過o既盤菜入面味道最好呢,唔通圍村盤菜真係最正宗o既????食完o野無乜o野做,我o地班姊妹就一個個咁同PatPat o既六歲中法混血表弟影相,佢真係好cute好靚仔呀,仲好乖好可愛,任我o地擺佈都無反抗,好搞笑!!!!

好大盤呀,姊妹們當然食唔晒啦...不過真係幾好味!!!

中法混血表弟,係咪好靚仔呢?中文同法文都好叻,大個實迷倒萬千少女呢!!!

見有時間,我走o左去同新娘爸媽傾計,由於我小學一年班已經認識Pat Pat,佢爸媽都可以話係睇住我大,由於而家好少撞到,所以今日可以同佢o地傾番幾句真係好開心,恭喜晒佢o地呢!!(P.S. 有樣o野不得不讚,就係新娘爸十年如一日,keep得真係好好呢!!!!)另外,今日仲見番PatPat細佬添,仲記得今朝入女家時由一個男仔開門俾我,我當時仲諗呢個係邊個o黎,點知個男仔先開口問 '咦,呢個咁似XXX (我全名)o既?'...噢...原來佢係PatPat細佬呀,成十年無見喇,以前明明個子唔高,仲肥嘟嘟(仲有d百厭,哈哈!),估唔到而家真係咁高大(之前都聽過人講佢高o左好多!!),真係唔認得呢!!!!

除新娘爸媽細佬外,今日仲一次過見到PatPat以前成日提及o既堂哥堂細佬表姐表弟,聽到d名好有親切感呀,因為我大部份都聽過,有d仲見過,仲記得中學時有年中秋我都有同過佢d 堂細佬(當時d 堂細佬仲係五六歲吧?)玩o架,估唔到眨下眼女朋友都有喇,真係不得不認老呢!!!!總之,今日見到咁多由細到大聽慣聽熟o既PatPat親友,感覺既陌生又親切,好得意呢!!!

兩點半兄弟姊妹們解散喇,番到屋企仲好早,雖然有d眼訓,但都唔算太支力,不過為o左聽日o既註冊同六十幾圍o既晚宴,今晚都要早d訓先得!!!

P.S. 今日應該係好好日,因為今日o係女家附近仲見到另外一班兄弟姊妹團同另外一輛花車呢!!